ଉତ୍ତରପ୍ରଦେଶ ଆକାଶରେ ଉଡ଼ିଲା ଏଲିଏନ!
ନୋଏଡା: ଆକାଶରେ ଉଡ଼ିଲା ଏଲିଏନ | ଏଭଳି ଅଜବ ଖବର ଆସିଛି ଉତ୍ତରପ୍ରଦେଶରୁ | ଉତ୍ତରପ୍ରଦେଶ ଆକାଶରେ ଏକ ଅଜବ ଜିନିଷ ଉଡ଼ୁଥିବାର ଦେଖି ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ଖେଳିଯାଇଥିଲା | ତୁରନ୍ତ ଏ ନେଇ ପୁଲିସକୁ ସୂଚନା ଦିଆଯିବା ପରେ ପୁଲିସ ଘଟଣା ସ୍ଥଳରେ ପହଞ୍ଚି ଆକାଶରେ ଉଡୁଥିବା ଏଲିଏନ ଭଳି ଜିନିଷକୁ ଧରିଥିଲା, ଯାହା ପରେ ତାହା ଏଲିଏନ ନୁହେଁ ବରଂ ଆଇରନ ମ୍ୟାନ ଆକୃତିର ବେଲୁନ ବୋଲି ଜଣା ପଡ଼ିଥିଲା | ଘଟଣାଟି ଘଟିଛି ଉତ୍ତରପ୍ରଦେଶର ଗ୍ରେଟର ନୋଏଡାରେ ଥିବା ଡାନକୌର ସହରରେ |
Sambad is now on WhatsApp
Join and get latest news updates delivered to you via WhatsApp
ପୁଲିସର କହିବା ମୁତାବକ, ଶନିବାର ଦିନ କେହି ଜଣେ ଆଇରନ ମ୍ୟାନ ଭଳି ଦିଶୁଥିବା ବେଲୁନରେ ପବନ ଭରି ଆକାଶରେ ଉଡାଇଦେଇଥିଲା | ବେଲୁନଟି କିଛି ବାଟ ଉଡିବା ପରେ ଏକ କେନାଲ କୂଳରେ ଯାଇ ପଡ଼ିଥିଲା | ବେଲୁନର ଅଧା ଅଂଶ କେନାଲ ପାଣିରେ ବୁଡି ରହିଥିବାରୁ ଏହା ପାଣିର ଲହଡିରେ ହଲିବାକୁ ଲାଗିଥିଲା, ଯାହାକୁ ଦୂରରୁ ସ୍ଥାନୀୟ ଲୋକେ ଦେଖି ଡରି ଯାଇଥିଲେ | ପରେ ପାଖକୁ ଯାଇ ଦେଖିବା ପରେ ତାହା ବେଲୁନ ବୋଲି ଜଣା ପଡ଼ିଥିଲା | ବେଲୁନର ଏଭଳି ଆକୃତି ଦେଖି ନଥିବା ଲୋକେ ଏହାକୁ ଦେଖି ଡରି ଯାଇଥିବା କହିଛି ପୁଲିସ | ତେବେ ଏହାକୁ କିଏ ଉଡ଼ାଇଥିଲା, ସେ ନେଇ ପୁଲିସ ପାଖରେ କୌଣସି ସୂଚନା ନାହିଁ |