ପୁଣି ଲକ୍‌ଡାଉନ୍‌ ଘୋଷଣା ଆଶଙ୍କାରେ ବେଙ୍ଗାଲୁରୁ ଛାଡ଼ି ଚାଲିଯାଉଛନ୍ତି ହଜାର ହଜାର ଲୋକ

ବେଙ୍ଗାଲୁରୁ: କୋଭିଡ୍-୧୯ ସଂକ୍ରମଣ ବୃଦ୍ଧି ଏବଂ ପୁଣି ଥରେ ଲକ୍‌ଡାଉନ୍‌ ଘୋଷଣା ହେବା ଆଶଙ୍କା କରି ବେଙ୍ଗାଲୁରୁରେ ରହୁଥିବା ହଜାର ହଜାର ଲୋକ ପୁଣି ସେମାନଙ୍କ ବାସସ୍ଥାନକୁ ଫେରି ଯାଉଛନ୍ତି। ତେଣୁ ଶନିବାର ଦିନ ସହରର ପ୍ରସ୍ଥାନ ପଥରେ ଅନେକ ଲୋକ ଧାଡ଼ିବାନ୍ଧି ଥିଲେ।

ଏସ୍‌ଏସ୍ଏଲ୍‌ସି ପରୀକ୍ଷା ପରେ ପୁଣି ଲକ୍‌ଡାଉନ୍‌ ଘୋଷଣା ହେବ ବୋଲି ଉଡ଼ାଖବର ପ୍ରଚାରିତ ହେଉଥିବା ବେଳେ କର୍ଣ୍ଣାଟକର ଅନ୍ୟାନ୍ୟ ଅଞ୍ଚଳରୁ ମଧ୍ୟ କେତେକ ଶ୍ରମିକ ସେମାନଙ୍କ ଘର ଅଭିମୁଖେ ବାହାରିଥିଲେ।

ତୁମାକୁରୁ ରୋଡ୍ ଏବଂ ସହରର ଅନ୍ୟାନ୍ୟ ପ୍ରସ୍ଥାନ ପଥରେ ବଡ଼ ଜନଗହଳି ହୋଇଥିଲା। କେତେକ କହୁଥିଲେ ଯେ, ସେମ‌ାନେ ସହରରେ ଥିବା ସେମାନଙ୍କ ଘର ଛାଡ଼ି ଚିରଦିନ ପାଇଁ ଫେରିଯାଉଛନ୍ତି। ସରକାରୀ କର୍ତ୍ତୃପକ୍ଷମାନେ କହିଛନ୍ତି ଯେ, ମରାମତି କାମ ଚାଲିଥିବାରୁ ମହୀଶୂର ରୋଡ୍‌ରେ ଟ୍ରାଫିକ୍ ଜାମ୍ ହୋଇଥିଲା। ଶନିବାର ରାତି ୮ଟାରୁ ରବିବାର ପର୍ଯ୍ୟନ୍ତ ସମ୍ପୂର୍ଣ୍ଣ ଲକ୍‌ଡାଉନ୍ ଘୋଷଣା ହେବାରୁ ଲୋକେ ପ୍ରତ୍ୟୁଷରୁ ସହର ଛାଡ଼ି ଚାଲି ଆସିଥିଲେ।

କର୍ଣ୍ଣାଟକ ରୋଡ୍‌ ଟ୍ରାନ୍‌ସ୍ପୋର୍ଟ କର୍ପୋରେସନ୍ ଅଧିକାରୀମାନେ କହିଛନ୍ତି ଯେ, ୧୦ମ ଶ୍ରେଣୀ ପରୀକ୍ଷା ଶେଷ ହେବାରୁ ଅନେକ ଲୋକ ବେଙ୍ଗାଲୁରୁ ବାହାରକୁ ଚାଲି ଯାଉଛନ୍ତି।

‌ଗତ ୧୦ ଦିନ ହେବ ବେଙ୍ଗାଲୁରୁରେ କୋଭିଡ୍-୧୯ ସଂକ୍ରମଣ ବୃଦ୍ଧି ପାଇଥିବାରୁ ଭିତ୍ତିଭୂମି ସଂକଟ ଉପୁଜିଛି। ଜୁଲାଇ ୪ ତାରିଖ ସୁଦ୍ଧା ସହରରେ ୭, ୨୫୦ଜଣ କରୋନାଭାଇରସ୍ ଆକ୍ରାନ୍ତ ଚିକିତ୍ସିତ ହେଉଥିଲେ।