ତିରୁପତି ଦଳାଚକଟା: ଟୋକନ ‌କେନ୍ଦ୍ରରେ ଉପଲବ୍ଧ ନଥିଲା ଆମ୍ବୁଲାନ୍ସ

ଅମରାବତୀ: ଆନ୍ଧ୍ରପ୍ରଦେଶର ପ୍ରସିଦ୍ଧ ତିରୁପତି ମନ୍ଦିରରେ ଦଳାଚକଟା ହୋଇ ତାମିଲନାଡ଼ୁ ସାଲେମ ଜିଲ୍ଲାର ଜଣେ ମହିଳାଙ୍କ ସମେତ ୬ ଜଣଙ୍କର ମୃତ୍ୟୁ ହୋଇଛି ଓ ଶତାଧିକ ଆହତ ହୋଇଛନ୍ତି। ଏହି ଦଳାଚକଟାକୁ ନେଇ ଏବେ ନୂଆ ନୂଆ ତଥ୍ୟ ହସ୍ତଗତ ହେବାରେ ଲାଗିଛି। 

ସୂତ୍ର ଅନୁଯାୟୀ ନିର୍ଦ୍ଦେଶାବଳୀକୁ ଅନୁସରଣ କରି ଦଳାଚକଟା ଘଟିଥିବା ଟୋକନ୍ କେନ୍ଦ୍ରଗୁଡ଼ିକରେ କୌଣସି ଆମ୍ବୁଲାନ୍ସକୁ ପ୍ରସ୍ତୁତ ରଖାଯାଇ ନଥିଲା। ଦଳାଚକଟା ପରେ ମଧ୍ୟ ଆମ୍ବୁଲାନ୍ସଗୁଡ଼ିକୁ ଘଟଣାସ୍ଥଳରେ ପହଞ୍ଚିବାକୁ ୧୫-୨୦ ମିନିଟ୍ ସମୟ ଲାଗିଥିଲା।

ଟୋକନ୍ କାଉଣ୍ଟରରେ ଧାଡ଼ିରେ ଅପେକ୍ଷା କରିଥିବା ଜଣେ ଅଚାନକ ସେଠାରେ ତଳେ ଟଳି ପଡ଼ିଥିଲେ। ତାଙ୍କୁ ହସ୍ପିଟାଲ ନେବା ପାଇଁ ଫାଟକ ଖୋଲାଯାଇଥିଲା। କିନ୍ତୁ ଲୋକମାନେ ତାହାର ସୁଯୋଗ ନେଇ ଭିତରକୁ ପଶି ଆସିଥିଲେ। ଯାହା ଫଳରେ ଦଳାଚକଟା ଆରମ୍ଭ ହୋଇଥିଲା।

ଘଟଣା ପରେ ସାମ୍ବାଦିକମାନଙ୍କ ସହ କଥାବାର୍ତ୍ତା କରି ତିରୁମାଲା ତିରୁପତି ଦେବସ୍ଥାନମ୍ସ (ଟିଟିଡି)ର ବୋର୍ଡ ସଦସ୍ୟ ଭାନୁ ପ୍ରକାଶ ରେଡ୍ଡୀ କହିଛନ୍ତି ଯେ ଗୁରୁବାର ସକାଳେ ଆରମ୍ଭ ହେବାକୁ ଥିବା ଟୋକନ୍ ବଣ୍ଟନ ପାଇଁ ୯୧ଟି କାଉଣ୍ଟର ଖୋଲାଯାଇଥିଲା।

ବୈକୁଣ୍ଠ ଏକାଦଶୀ ଏବଂ ବୈକୁଣ୍ଠ ଦ୍ବାର ଦର୍ଶନ ଉପଲକ୍ଷେ ଶ୍ରୀନିବାସମ୍‌, ବୈରାଗୀପେଟ୍ଟାଡା ରାମାନାଇଡୁ ସ୍କୁଲ ଓ ସତ୍ୟନାରାୟଣପୁରମ୍‌ ନିକଟରେ ଆଗୁଆ ଟିକେଟ ବିକ୍ରି କରାଯିବାକୁ ଘୋଷଣା କରାଯାଇଥିଲା। ବୈରାଗୀ ପେଟ୍ଟାଡା ପାର୍କ ନିକଟ ବୈକୁଣ୍ଠ ଦ୍ବାର ଦର୍ଶନ ଟିକେଟ୍‌ କେନ୍ଦ୍ରରେ ଗତକାଲି ପୂର୍ବ‌ାହ୍ନରେ ଶ୍ରଦ୍ଧାଳୁଙ୍କର ଲମ୍ବା ଲାଇନ୍‌ ଲାଗିଥିଲା। ରାତିରେ ଭିଡ଼ ଅସମ୍ଭବ ଭାବେ ବୃଦ୍ଧି ପାଇବାରୁ ଦଳାଚକଟା ସ୍ଥିତି ସୃଷ୍ଟି ହୋଇଥିଲା।