ଟିଏମ୍ସି-ବିଜେପି ସଂଘର୍ଷ: ପଶ୍ଚିମବଙ୍ଗ ଅଶାନ୍ତ, ଆଜି ବନ୍ଦ
୮ ମୃତ ଆଶଙ୍କା, ୪ ଜଣଙ୍କ ଶବ ଉଦ୍ଧାର, ଅନ୍ତିମ ସଂସ୍କାରକୁ ନେଇ ପୁଲିସ-ବିଜେପି ସମର୍ଥକ ମୁହାଁମୁହିଁ
କୋଲକାତା: ପଶ୍ଚିମବଂଗରେ ରାଜନୈତିକ ହିଂସା ଉଗ୍ର ରୂପ ନେଇଛି। ଶାସକ ତୃଣମୂଳ କଂଗ୍ରେସ (ଟିଏମ୍ସି) ଏବଂ ବିରୋଧୀ ଦଳ ବିଜେପିର କାର୍ଯ୍ୟକର୍ତ୍ତାଙ୍କ ମଧ୍ୟରେ ଦୁଇଟି ସ୍ଥାନରେ ବଡ଼ ଧରଣର ସଂଘର୍ଷ ଓ ଗୁଳିମାଡ଼ ଯୋଗୁଁ ୮ ଜଣଙ୍କ ମୃତ୍ୟୁ ଆଶଙ୍କା କରାଯାଉଛି। ଉତ୍ତର ୨୪ ପ୍ରଗଣା ଜିଲ୍ଲାରେ ଘଟିଥିବା ଏହି ହିଂସାକୁ ନେଇ ତୀବ୍ର ଉତ୍ତେଜନାପୂର୍ଣ୍ଣ ସ୍ଥିତି ଲାଗି ରହିଛି। ଆଜି ସନ୍ଧ୍ୟା ସୁଦ୍ଧା ୪ ଜଣଙ୍କ ମୃତଦେହ ଉଦ୍ଧାର ହୋଇଥିବା ବେଳେ ଆଉ ୪ ଜଣ ନିଖୋଜ ଅଛନ୍ତି। ଆଜି ବସିରହାଟରେ ୩ ବିଜେପି କାର୍ଯ୍ୟକର୍ତ୍ତାଙ୍କ ଶବକୁ ଶେଷ ଦର୍ଶନ ପାଇଁ ବିଜେପି କାର୍ଯ୍ୟାଳୟକୁ ନିଆଯିବା ବେଳେ ରାସ୍ତାରେ ପୁଲିସ ଶବ ଅଟକାଇବାରୁ ପୁଲିସ ଏବଂ ବିଜେପି ସମର୍ଥକ ମୁହାଁମୁହିଁ ହୋଇଥିଲେ। ହଜାର ହଜାର ଲୋକ ରାସ୍ତା ଅବରୋଧ କରିବାରୁ ସ୍ଥିତି ଜଟିଳ ହୋଇଥିଲା। ପୁଲିସ ୩ କାର୍ଯ୍ୟକର୍ତ୍ତାଙ୍କ ଶବକୁ ଦଳୀୟ କାର୍ଯ୍ୟାଳୟକୁ ଯିବାକୁ ଅନୁମତି ନଦେଲେ ରାସ୍ତା ଉପରେ ହିଁ ଶବ ସଂସ୍କାର ପାଇଁ ବିଜେପି ନେତାମାନେ ଚେତାବନୀ ଦେଇଥିଲେ। ଏହି ଘଟଣାର ପ୍ରତିବାଦରେ ବିଜେପି ଆସନ୍ତାକାଲି ପଶ୍ଚିମବଂଗରେ ୧୨ ଘଣ୍ଟିଆ ବନ୍ଦ ଡାକରା ଦେଇଛି।
Sambad is now on WhatsApp
Join and get latest news updates delivered to you via WhatsApp
୨୪ ପ୍ରଗଣା ଜିଲ୍ଲାର ପ୍ରାୟ ୬ଟି ସ୍ଥାନରେ ଆଜି ମଧ୍ୟ ବିଜେପି-ଟିଏମ୍ସି କର୍ମୀଙ୍କ ମଧ୍ୟରେ ସଂଘର୍ଷ ହୋଇଛି ଏବଂ ଏଥିରେ ୪୦ରୁ ଅଧିକ ଆହତ ହୋଇଥିବା ଜଣାପଡ଼ିଛି। ଗତକାଲି ଅପରାହ୍ନରୁ ହିଂସା ଲାଗି ରହିଥିବା ବେଳେ ପରିସ୍ଥିତି ଅଣାୟତ୍ତ ହେଉଥିବାରୁ କେନ୍ଦ୍ର ସରକାର ଏଥିରେ ହସ୍ତକ୍ଷେପ କରିଛନ୍ତି। ହିଂସା ସୃଷ୍ଟିକାରୀ ଏବଂ ପକ୍ଷପାତ ନୀତି ଧରିଥିବା ପୁଲିସ କର୍ମୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ପାଇଁ କେନ୍ଦ୍ର ଗୃହ ମନ୍ତ୍ରାଳୟ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେଇଛନ୍ତି। ହିଂସାକାଣ୍ଡ ସଂପର୍କିତ ବିସ୍ତୃତ ରିପୋର୍ଟ ଦାଖଲ କରିବାକୁ ରାଜ୍ୟ ପୁଲିସ ମୁଖ୍ୟଙ୍କୁ କୁହାଯିବା ସହ ଆଇନ ଶୃଙ୍ଖଳା ରକ୍ଷା ଦିଗରେ କୌଣସି ସାଲିସ୍ ନ କରିବାକୁ କୁହାଯାଇଛି। ବିଜେପିର ୩ ଜଣ କାର୍ଯ୍ୟକର୍ତ୍ତାଙ୍କ ମୃତ୍ୟୁ ଘଟିଥିବା ପୁଲିସ ସ୍ପଷ୍ଟ କରିଥିବା ବେଳେ ପ୍ରକୃତରେ ୫ ଜଣ କାର୍ଯ୍ୟକର୍ତ୍ତାଙ୍କୁ ଗୁଳି କରି ହତ୍ୟା କରାଯାଇଥିବା ବିଜେପି କହିଛି। ବିଜେପିର ୧୮ ଜଣ କର୍ମୀ ଉତ୍ତର ୨୪ ପ୍ରଗଣା ଜିଲ୍ଲାରେ ନିଖୋଜ ଥିବା ନେଇ ମଧ୍ୟ ମାମଲା ରୁଜୁ ହୋଇଛି। ଟିଏମ୍ସିର ବରିଷ୍ଠ ନେତାମାନେ କହିଛନ୍ତି ଯେ ହାଟଗାଛିରେ ୩ ଜଣ ଦଳୀୟ କାର୍ଯ୍ୟକର୍ତ୍ତାଙ୍କୁ ହତ୍ୟା କରାଯାଇଛି। ଦଳ ପକ୍ଷରୁ ସେମାନଙ୍କ ଫଟୋ ସୋସିଆଲ ମିଡିଆରେ ପୋଷ୍ଟ୍ କରାଯାଇଥିବା ବେଳେ ପୁଲିସ କିନ୍ତୁ ଜଣେ ଟିଏମ୍ସି କାର୍ଯ୍ୟକର୍ତ୍ତାଙ୍କୁ ହତ୍ୟା କରାଯାଇଥିବା କହିଛି।
ମମତାଙ୍କୁ ଦାୟୀ କଲା ବିଜେପି
ପଶ୍ଚିବଂଗରେ ଲାଗି ରହିଥିବା ରାଜନୈତିକ ହିଂସା ପାଇଁ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ବିଜେପି ଦାୟୀ କରିଛି। ବରିଷ୍ଠ ନେତା ମୁକୁଲ ରାୟ କହିଛନ୍ତି ଯେ ପ୍ରତ୍ୟେକ ଜିଲ୍ଲାରେ ହିଂସା ପାଇଁ ଟିଏମ୍ସି ନେତାମାନେ କର୍ମୀଙ୍କୁ ଉସୁକାଉଛନ୍ତି ଏବଂ ବିଜେପିର ଦକ୍ଷ ସଂଗଠକମାନଙ୍କୁ ଯୋଜନାବଦ୍ଧ ଭାବେ ଟାର୍ଗେଟ୍ କରାଯାଉଛି । ରାଜ୍ୟ ବିଜେପି ପକ୍ଷରୁ ହିଂସା ନେଇ କେନ୍ଦ୍ର ସରକାରଙ୍କୁ ଏକ ରିପୋର୍ଟ ପ୍ରଦାନ କରାଯାଇଛି । ବିରିଷ୍ଠ ବିଜେପି ନେତାମାନେ ହିଂସାଗ୍ରସ୍ତ ଅଂଚଳ ପରିଦର୍ଶନ କରିବା ସହ ହତ୍ୟାର ଶିକାର ହୋଇଥିବା ପ୍ରଦୀପ ମଣ୍ଡଳ, ତପନ ମଣ୍ଡଳ ଏବଂ ସୁକାନ୍ତ ମଣ୍ଡଳଙ୍କ ପରିବାରକୁ ଭେଟିଛନ୍ତି।