ଅନୁବ୍ରତ ମଣ୍ଡଳଙ୍କ ଝିଅଙ୍କୁ ଗିରଫ କଲା ଇଡି

ନୂଆଦିଲ୍ଲୀ : ଟିଏମ୍‌ସି ‌ନେତା ଅନୁବ୍ରତ ମଣ୍ଡଳଙ୍କ ଝିଅ ସୁକନ୍ୟା‌ ମଣ୍ଡଳଙ୍କୁ ଆଜି ଇଡି (ପ୍ରବର୍ତ୍ତନ ନିର୍ଦ୍ଦେଶାଳୟ) ଗିରଫ କରିଛି। ଗୋ ଚୋରାଚାଲାଣ ମାମଲାରେ ଇଡି ଆଜି ସୁକନ୍ୟା ମଣ୍ଡଳଙ୍କୁ ଜେରା କରିବାପରେ ଗିରଫ କରିଥିଲା। ସୁକନ୍ୟା ମଣ୍ଡଳଙ୍କ ଆୟ ବହିର୍ଭୁତ ସମ୍ପତ୍ତି ଏବଂ ତାଙ୍କ ବ୍ୟାଙ୍କ ଆକାଉଣ୍ଟ୍‌ରେ ଏତେ ପରିମାଣରେ ଟଙ୍କା ପାଇଁ ଇଡି ସୁକନ୍ୟାଙ୍କୁ ସମନ କରିଥିଲା। ମାମଲାରେ ସୁକନ୍ୟାଙ୍କ ସମ୍ପୃକ୍ତି ଥିବା ନେଇ ଇଡି ଆଜି ସୁକନ୍ୟାଙ୍କୁ ଜେରା କରିଥିଲା। ସୁକନ୍ୟା ମଣ୍ଡଳ ହେଉଛନ୍ତି ବୃତ୍ତିରେ ଜଣେ ଶିକ୍ଷକ।

ଏକ ସରକାରୀ ପରିଚାଳିତ ପ୍ରାଥମିକ ସ୍କୁଲ୍‌ରେ ସେ ଶିକ୍ଷକତା କରୁଛନ୍ତି। କିନ୍ତୁ ତାଙ୍କ ନାମରେ ବିପୁଳ ସମ୍ପତ୍ତି ଅଛି। ପୂର୍ବରୁ ମଧ୍ୟ ତାଙ୍କୁ କେନ୍ଦ୍ରୀୟ ତଦନ୍ତକାରୀ ସଂସ୍ଥା ଦ୍ବାରା ସମନ କରାଯାଇଥିଲା। କିନ୍ତୁ ସେ ହାଜର ହୋଇନଥିଲେ। ଉଲ୍ଲେଖଯୋଗ୍ୟ, ଏହି ଗୋ ଚୋରାଚାଲାଣ ମାମଲାରେ ଇଡି ବୀରଭୂମ ଜିଲ୍ଲା ଟିଏମ୍‌ସି ମୁଖ୍ୟ ଅନୁବ୍ରତ ମଣ୍ଡଳଙ୍କୁ ଗିରଫ କରିଥିଲା। ସିବିଆଇ ଦ୍ବାରା ଗିରଫ ହେବାପରେ ସେ ନ୍ୟାୟିକ ହାଜତରେ ଥିଲେ।