ପ୍ରସବ ପରେ ଅସହ୍ୟ ହେଲା ଯନ୍ତ୍ରଣା, କରୋନା ସଂକ୍ରମଣ ଭୟରେ ୪ଟି ଡାକ୍ତରଖାନା ଭର୍ତ୍ତି କରିବାକୁ ମନା କରିବା ପରେ ଆଖି ବୁଜିଲେ ମହିଳା
ଡେରାଡୁନ: କରୋନା ମହାମାରୀ ସମୟରେ କିଛି ରୋଗୀ ଡାକ୍ତରଖାନାର ଅବହେଳା ଯୋଗୁଁ ମୃତ୍ୟୁବରଣ କରୁଥିବା ଖବର ସାମ୍ନାକୁ ଆସିଛି | ସଂକ୍ରମଣ ଭୟରେ କିଛି ଡାକ୍ତରଖାନା ରୋଗୀଙ୍କୁ ଭର୍ତ୍ତି ନକରିବା ସହ ଅନ୍ୟ ଡାକ୍ତରଖାନାକୁ ଯିବା ପାଇଁ କହିବା ଘଟଣା ଅନେକ ସାମ୍ନାକୁ ଆସିଥିବା ବେଳେ ଡେରାଡୁନରେ କିଛି ସେଭଳି ଘଟଣା ଘଟିଥିବା ଦେଖିବାକୁ ମିଳିଛି | ସମୟ ପୂର୍ବରୁ ପ୍ରସବ କରିଥିବା ମହିଳାଙ୍କୁ ଠିକ ସମୟରେ ଚିକିତ୍ସା ନମିଳିବା ପରେ ତାଙ୍କର ମୃତ୍ୟୁ ହେବା ଘଟଣାକୁ ନେଇ ଏବେ ତୀବ୍ର ପ୍ରତିକ୍ରିୟା ଦେଖିବାକୁ ମିଳିଛି | ମହିଳା କରୋନା ସଂକ୍ରମିତ ହୋଇଥିବା ଭାବି ୪ଟି ଡାକ୍ତରଖାନା ଫେରାଇବା ପରେ ଶେଷରେ ସ୍ଥାନୀୟ ବିଧାୟକଙ୍କ ସାହାଯ୍ୟରେ ତାଙ୍କୁ ଏକ ସରକାରୀ ଡାକ୍ତରଖାନାରେ ଭର୍ତ୍ତି କରାଯାଇଥିଲା | କିନ୍ତୁ ଠିକ ସମୟରେ ଚିକିତ୍ସା ନମିଳିଥିବାରୁ ସେଠାରେ ତାଙ୍କର ମୃତ୍ୟୁ ଘଟିଥିବା ଜଣା ପଡିଛି |
Sambad is now on WhatsApp
Join and get latest news updates delivered to you via WhatsApp
ମୃତ ସୁଧାଙ୍କ ସ୍ୱାମୀ କମଲେଶଙ୍କ କହିବା ମୁତାବକ, ସୋମବାର ୭ମାସର ଗର୍ଭବତୀ ଥିବା ସୁଧାଙ୍କର ପ୍ରସବ ଯନ୍ତ୍ରଣା ହେବାରୁ ତାଙ୍କୁ କମଲେଶ ସ୍ଥାନୀୟ ସରକାରୀ ଡାକ୍ତରଖାନାକୁ ନେଇଥିଲେ | ସେଠାରେ ଡାକ୍ତର ରକ୍ତ କମ ଥିବା କହି ୯ମାସ ପୁରିବା ପରେ ଆସିବା ପାଇଁ କହିଥିଲେ | ଡାକ୍ତରଖାନାରୁ ଆସିବା ପରେ ସେ ନିଜ ଘରେ ଯମଜ ସନ୍ତାନକୁ ଜନ୍ମ ଦେଇଥିଲେ | କିନ୍ତୁ ଜନ୍ମ ହେବାର କିଛି ସମୟ ପରେ ଦୁଇ ନବଜାତଙ୍କ ମୃତ୍ୟୁ ଘଟିଥିଲା | ପ୍ରସବ ପରେ ସୁଧାଙ୍କ ଅବସ୍ଥା ଗମ୍ଭୀର ହେବାରୁ ଚିକିତ୍ସା ପାଇଁ କମଲେଶ ତାଙ୍କୁ ୨ଟି ସରକାରୀ ଓ ୨ଟି ବେସରକାରୀ ଡାକ୍ତରଖାନା ନେଇଥିଲେ ମଧ୍ୟ ଶରୀରର ତାପମାତ୍ରା ଅଧିକ ଥିବାରୁ କରୋନା ଆକ୍ରାନ୍ତ ହୋଇଥିବା ସନ୍ଦେହ କରି କେହି ବି ତାଙ୍କୁ ଭର୍ତ୍ତି କରି ନଥିଲେ | ପରେ ସ୍ଥାନୀୟ ବିଧାୟକଙ୍କ ସହାୟତାରେ ଏକ ସରକାରୀ ଡାକ୍ତରଖାନାରେ ସୁଧାଙ୍କୁ ଭର୍ତ୍ତି କରାଯାଇଥିଲେ ମଧ୍ୟ ସେଠାରେ ତାଙ୍କର ମୃତ୍ୟୁ ଘଟିଥିଲା |
ଏବେ ସୁଧାଙ୍କ ମୃତ୍ୟୁ ପରେ ଘଟଣାର ତଦନ୍ତ ପାଇଁ ଉତ୍ତରପ୍ରଦେଶ ସ୍ୱାସ୍ଥ୍ୟ ସଚିବ, ମୁଖ୍ୟ ଚିକିତ୍ସା ଅଧିକାରୀ ଏବଂ ଜିଲ୍ଲା ମାଜିଷ୍ଟ୍ରେଟଙ୍କ ଦ୍ୱାରା ଅନୁସନ୍ଧାନ ପାଇଁ ତିନୋଟି ପୃଥକ ଆଦେଶ ଦିଆଯାଇଛି ।