ଭାରତର ଏହି ସ୍ଥାନରେ ଅଛି ବିଶ୍ୱର ସବୁଠାରୁ ବଡ଼ ଅଶୋଧିତ ତୈଳ ବିଶୋଧନକାରୀ ପ୍ଲାଣ୍ଟ
ଟପ-୩ ରିଫାଇନାରୀ କେଉଁଠି ଅଛି ଜାଣନ୍ତୁ
ନୂଆଦିଲ୍ଲୀ: ଆପଣ ଗାଡ଼ିରେ ପକାଉଥିବା ପେଟ୍ରୋଲ ଓ ଡିଜେଲ ମୁଖ୍ୟତଃ ଅଶୋଧିତ ତୈଳକୁ ବିଶୋଧନ କରିବା ପରେ ନିର୍ଗତ ହୋଇଥାଏ | ତେବେ ଆପଣ କେବେ ଭାବିଛନ୍ତି କି ବିଶ୍ୱର ସର୍ବାଧିକ ଅଶୋଧିତ ତୈଳ ବିଶୋଧନ କେଉଁଠାରେ ହୋଇଥାଏ ? ଆଜି ଆମେ ଆପଣଙ୍କୁ ଏବାବଦରେ କହିବୁ | ବିଶ୍ୱର ସବୁଠାରୁ ବଡ଼ ତୈଳ ବିଶୋଧନ ବା ରିଫାଇନାରୀ ପ୍ଲାଣ୍ଟ ଭାରତର ଜାମନଗରରେ ରହିଛି | ଗୁଜୁରାଟର ଜାମନଗରରେ ଥିବା ଏହି ପ୍ଲାଣ୍ଟ ରିଲାଏନ୍ସ ଇଣ୍ଡଷ୍ଟ୍ରି ଦ୍ୱାରା ପରିଚାଳନା ହେଉଥିବାବେଳେ ଭାରତରେ ବ୍ୟବହୃତ ହେଉଥିବା ସମୁଦାୟ ଏକ ତୃତୀୟାଂଶ ପେଟ୍ରୋଲ-ଡିଜେଲ ଏଠାରୁ ହିଁ ଆସିଥାଏ |
Sambad is now on WhatsApp
Join and get latest news updates delivered to you via WhatsApp
୭୫୦୦ ଏକରରେ ପରିବ୍ୟାପ୍ତ ଏହି ରିଫାଇନାରୀ ଦିନକୁ ପ୍ରାୟ ୧୨ ଲକ୍ଷ ୪୦ ହଜାର ବ୍ୟାରେଲ ତୈଳ ବିଶୋଧନ କରିବାର କ୍ଷମତା ରଖିଛି | ୫୦ଟି ପ୍ରୋସେସିଂ ୟୁନିଟ ସହ ଏହାକୁ ସମ୍ପୂର୍ଣ୍ଣ କରିବା ପାଇଁ ୩ ବର୍ଷ ସମୟ ଲାଗିଥିଲା | ରିଲାଏନ୍ସ ରିଫାଇନାରୀ ପରେ ଦ୍ଵିତୀୟ ସର୍ବବୃହତ ବିଶୋଧନକାରୀ ପ୍ଲାଣ୍ଟ ଭେନେଜୁଏଲାର ପାରାଗୁଏନାଠାରେ ରହିଛି | ଏହି ରିଫାଇନାରୀରେ ଦିନକୁ ୯ ଲକ୍ଷ ୫୫ ହଜାର ବ୍ୟାରେଲ ତୈଳ ବିଶୋଧନ ହୋଇଥାଏ |
ବିଶ୍ୱର ତୃତୀୟ ସର୍ବବୃହତ ରିଫାଇନାରୀ ସାଉଥ କୋରିଆରେ ରହିଛି | ଏହି ରିଫାଇନାରୀ ଦକ୍ଷିଣ କୋରିଆର ଅଲସନଠାରେ ଥିବାବେଳେ ଏହାର ବିଶୋଧନ କ୍ଷମତା ଦିନକୁ ୮ ଲକ୍ଷ ୫୦ ହଜାର ବ୍ୟାରେଲ ରହିଛି | ଏହି ରିଫାଇନାରୀ ପେଟ୍ରୋଲ, ଡିଜେଲ, ଗ୍ୟାସଲୀନ, ଏଲପିଜି ଉତ୍ପାଦନ କରିଥାଏ |