ନିର୍ବାଚନ ପ୍ରଚାର ସାମଗ୍ରୀ ପ୍ରସ୍ତୁତିରେ ଆଉ ବ୍ୟବହାର ହୋଇ ପାରିବ ନାହିଁ ପ୍ଲାଷ୍ଟିକ; ନିଷେଧାଦେଶ ଲଗାଇଲେ ସୁପ୍ରିମ୍ କୋର୍ଟ
ନୂଆଦିଲ୍ଲୀ: ପ୍ଲାଷ୍ଟିକ୍ର ବ୍ୟବହାର ଉପରେ ଏବେ ସବୁ କ୍ଷେତ୍ରରେ ନିଷେଧାଦେଶ ଜାରି କରାଯାଉଥିବା ବେଳେ ଏଣିକି ନିର୍ବାଚନ କାଳରେ ମଧ୍ୟ ପ୍ଲାଷ୍ଟିକ୍ର ବ୍ୟବହାର କରାଯାଇ ପାରିବ ନାହିଁ। ନିର୍ବାଚନ ପ୍ରଚାର କାଳରେ କୌଣସି ଦଳ ବା ପ୍ରାର୍ଥୀ ପ୍ଲାଷ୍ଟିକ୍ରୁ ପ୍ରସ୍ତୁତ କୌଣସି ପ୍ରକାରର ସାମଗ୍ରୀ ବ୍ୟବହାର କରିପାରିବେ ନାହିଁ ବୋଲି ଆଜି ଦେଶର ସର୍ବୋଚ୍ଚ ଅଦାଲତ ସୁପ୍ରିମ୍ କୋର୍ଟ ସ୍ପଷ୍ଟ କରିଦେବା ସହ ଅବିଳମ୍ବେ ଏହି ନିଷ୍ପତ୍ତିକୁ କାର୍ଯ୍ୟକାରୀ କରିବା ପାଇଁ ନିର୍ବାଚନ କମିଶନ ଓ କେନ୍ଦ୍ର ସରକାରଙ୍କୁ ନୋଟିସ ଜାରି କରିଛନ୍ତି।
Sambad is now on WhatsApp
Join and get latest news updates delivered to you via WhatsApp
ଉଲ୍ଲେଖଯୋଗ୍ୟ, ନିର୍ବାଚନ ପ୍ରଚାର କାଳରେ ପ୍ରାୟ ସବୁ ଦଳ ଓ ପ୍ରାର୍ଥୀଙ୍କ ପକ୍ଷରୁ ପଭିସି ପଲିଥିନ୍, ସିନ୍ଥେଟିକ୍ ପ୍ଲାଷ୍ଟିକ, ପଲିମରରେ ବିଭିନ୍ନ ପ୍ରକାରର ପ୍ରଚାର ସାମଗ୍ରୀ ପ୍ରସ୍ତୁତ କରୁଛନ୍ତି। ଏବଂ ନିର୍ବାଚନ ସରିଯିବା ପରେ ଏସବୁ ପ୍ଲାଷ୍ଟିକରେ ପ୍ରସ୍ତୁତ ପ୍ରଚାର ସାମଗ୍ରୀକୁ ଏଣେତେଣେ ଫିଙ୍ଗି ଦେଉଛନ୍ତି। ଯାହାକି ପରବର୍ତ୍ତୀ ସମୟରେ ପରିବେଶ ପାଇଁ ହାନୀକାରକ ସାବ୍ୟସ୍ତ ହେବା ସହ ପରିବେଶକୁ ପ୍ରଦୂଷିତ କରୁଛି। ତେଣୁ, ଏହାକୁ ଦୃଷ୍ଟିରେ ରଖି ନିର୍ବାଚନ ପ୍ରଚାର କାଳରେ ପ୍ଲାଷ୍ଟିକର ବ୍ୟବହାର ଉପରେ ନିଷେଧାଦେଶ ଜାରି କରିବା ପାଇଁ ଏକ ଆବେଦନ ଆଗତ କରା ଯାଇଥିଲା।
ସୁପ୍ରିମ୍ କୋର୍ଟର ବିଚାରପତି ଜଷ୍ଟିସ୍ ନାଗେଶ୍ୱର ରାଓ ଓ ଜଷ୍ଟସ୍ ହେମନ୍ତ ଗୁପ୍ତାଙ୍କୁ ନେଇ ଏକ ଖଣ୍ଡପୀଠ ଆଜି ଏହି ମାମଲାର ଶୁଣାଣି କରିବା ସହ ଏଣିକି ନିର୍ବାଚନ କାଳରେ ମଧ୍ୟ ପ୍ଲାଷ୍ଟିକ୍ର ବ୍ୟବହାର କରାଯାଇ ପାରିବ ନାହିଁ ବୋଲି ସ୍ପଷ୍ଟ କରି ଦେଇଛନ୍ତି। ଏଥିସହ ନିର୍ବାଚନ ପ୍ରଚାର କାଳରେ କୌଣସି ଦଳ ବା ପ୍ରାର୍ଥୀ ପ୍ଲାଷ୍ଟିକ୍ରୁ ପ୍ରସ୍ତୁତ କୌଣସି ପ୍ରକାରର ସାମଗ୍ରୀ ବ୍ୟବହାର କରିପାରିବେ ନାହିଁ ବୋଲି ନିର୍ଦ୍ଦେଶ ଦେବା ସହ ଏହାକୁ ତୁରନ୍ତ କାର୍ଯ୍ୟକାରୀ କରିବା ପାଇଁ ନିର୍ବାଚନ କମିଶନ ଓ କେନ୍ଦ୍ର ସରକାରଙ୍କୁ ନୋଟିସ ଜାରି କରିଛନ୍ତି।