ଲସ୍କର୍‌ର ଶୀର୍ଷ ଆତଙ୍କୀ ସୈଫୁଲ୍ଲା ନିହତ: ପାକିସ୍ତାନର ସିନ୍ଧ୍‌ ପ୍ରଦେଶରେ ଗୁଳିକରି ହତ୍ୟା

ନୂଆଦିଲ୍ଲୀ: ଭାରତରେ ଅନେକ ବଡ଼ ଆତଙ୍କବାଦୀ ଆକ୍ରମଣରେ ସଂପୃକ୍ତ  ଲସ୍କର-ଏ-ତୋଏବାର ଜଣେ ଶୀର୍ଷ ଆତଙ୍କବାଦୀ ସୈଫୁଲ୍ଲା ଖାଲିଦକୁ ପାକିସ୍ତାନର ସିନ୍ଧ ପ୍ରଦେଶରେ ଗୁଳିକରି ହତ୍ୟା କରାଯାଇଛି। ତାକୁ କିଛି ଅଜଣା ଦୁର୍ବୃତ୍ତ ଆକ୍ରମଣ କରିଥିଲେ। ୨୦୦୫ରେ ବେଙ୍ଗାଲୁରୁରେ ଭାରତୀୟ ବିଜ୍ଞାନ କଂଗ୍ରେସ (ଆଇଏସ୍‌ସି) ଆକ୍ରମଣ, ୨୦୦୬ରେ ନାଗପୁରରେ ରାଷ୍ଟ୍ରୀୟ ସ୍ୱୟଂସେବକ ସଂଘ (ଆର୍‌ଏସ୍‌ଏସ୍‌) ମୁଖ୍ୟାଳୟ ଉପରେ ଆକ୍ରମଣ ଏବଂ ୨୦୦୮ରେ ରାମପୁରରେ ସିଆର୍‌ପିଏଫ କ୍ୟାମ୍ପ ଆକ୍ରମଣ ଭଳି ତିନୋଟି ବଡ଼ ଆକ୍ରମଣର ମୁଖ୍ୟ ଷଡ୍‌ଯନ୍ତ୍ରକାରୀ ଥିଲା ଖାଲିଦ ।

ନାଗପୁର, ରାମପୁର ଓ ବେଙ୍ଗାଲୁରୁ ଆକ୍ରମଣରେ ସଂପୃକ୍ତ ଥିଲା

ତିନି ବର୍ଷ ମଧ୍ୟରେ ହୋଇଥିବା ଏହି ଆତଙ୍କବାଦୀ ଆକ୍ରମଣରେ ଅନେକ ଲୋକ ପ୍ରାଣ ହରାଇଥିଲେ ଏବଂ ଭାରତରେ  ଲସ୍କର-ଏ-ତୋଏବାର  ନେଟ୍‌ୱର୍କ ବଢ଼ାଇବାରେ ଖାଲିଦର ବଡ଼ ଭୂମିକା ଥିଲା। ନିଜକୁ ‘ବିନୋଦ କୁମାର’  ବୋଲି ମିଥ୍ୟା ପରିଚୟ ଦେଇ ଖାଲିଦ ଅନେକ ବର୍ଷ ଧରି ନେପାଳରେ ରହୁଥିଲା  ଏବଂ ନଗମା ବାନୁ ନାମକ ଜଣେ ସ୍ଥାନୀୟ ମହିଳାଙ୍କୁ ବିବାହ କରିଥିଲା।  ନେପାଳରୁ ସେ ଲସ୍କର ପାଇଁ ସମନ୍ୱିତ କାର୍ଯ୍ୟକଳାପ ଜାରି ରଖିବା ସହ  ଭାରତରେ ଥିବା ଆତଙ୍କବାଦୀଙ୍କ ନିକଟକୁ ଅସ୍ତ୍ରଶସ୍ତ୍ର ପଠାଉଥିଲା।

ନିକଟରେ ଖାଲିଦ ପାକିସ୍ତାନର ସିନ୍ଧ ପ୍ରଦେଶର ବାଦିନ ଜିଲ୍ଲାର ମାତଲିକୁ ନିଜର ବେସ୍ ସ୍ଥାନାନ୍ତର କରିଥିଲା। ସେଠାରେ ସେ ଲସ୍କର ଏବଂ ଜାତିସଂଘ ଦ୍ୱାରା ନିଷିଦ୍ଧ ପାକିସ୍ତାନୀ ଆତଙ୍କବାଦୀ ସଂଗଠନ  ଜମାତ-ଉଦ-ଦାଵା ପାଇଁ କାର୍ଯ୍ୟ ଜାରି ରଖିଥିଲା। ମୁଖ୍ୟତଃ ଆତଙ୍କବାଦୀ ଅଭିଯାନ ପାଇଁ ନିଯୁକ୍ତି ଏବଂ ପାଣ୍ଠି ସଂଗ୍ରହ ଉପରେ ସେ ଧ୍ୟାନ ଦେଉଥିଲା। ଗତ ସପ୍ତାହରେ ଦକ୍ଷିଣ କଶ୍ମୀରର ସୋପିଆନ୍ ଜିଲ୍ଲାରେ ସୁରକ୍ଷାବାହିନୀ ସହ ଏନ୍‌କାଉଣ୍ଟରରେ ଲସ୍କର ‘ଅପରେସନ୍ କମାଣ୍ଡର’ ସାହିଦ କୁଟ୍ଟେ  ସମେତ ଆଉ ୩ ଜଣ ଲସ୍କର ଆତଙ୍କବାଦୀ ନିହତ ହୋଇଥିଲେ। କୁଟ୍ଟେ ସହ  ଖାଲିଦ ଲଗାତାର ସଂପର୍କରେ ରହିଥିଲା ବୋଲି ତଦନ୍ତରୁ ଜଣାପଡ଼ିଛି।