କଷି ଆମ୍ବ ଚୋରି କରିବାରୁ ଦୁଇ ନାବାଳକଙ୍କୁ ବାନ୍ଧି ଗୋବର ଖୁଆଇବାର ଚେଷ୍ଟା କଲେ ବଗିଚା ମାଲିକ
ହାଇଦ୍ରାବାଦ: ଗଛରେ କଷି ଆମ୍ବ ଦେଖି ଲୋଭ ଆସିଲା, ଆଉ ଆମ୍ବ ତୋଳିବାକୁ ବଗିଚାରେ ପଶିଲେ | ହେଲେ ଆମ୍ବ ତୋଳୁତୋଳୁ ବଗିଚା ମାଲିକ ହାତରେ ଧରାପଡ଼ିଲେ, ଆଉ ଅକଥନୀୟ ଯନ୍ତ୍ରଣା ସହିଲେ | ଆମ୍ବଚୋରି କରିବାର ଚେଷ୍ଟା ଆଉ ଏହା ପାଇଁ ମିଳିଥିବା ଶାସ୍ତିର ଆଜି ଆମେ ଆପଣଙ୍କୁ ଏମିତି ଏକ ସତ କାହାଣୀ କହିବୁ, ଯାହାକି ଆପଣଙ୍କୁ ଆଶ୍ଚର୍ଯ୍ୟ କରିଦେବ | କିଛି ଆମ୍ବ ପାଇଁ ଜଣେ ବଗିଚା ମାଲିକ ଏତେ ତଳକୁ ଖସିଯାଇପାରେ ଆପଣ ବିଶ୍ୱାସ କରିପାରିବେ ନାହିଁ |
Sambad is now on WhatsApp
Join and get latest news updates delivered to you via WhatsApp
ତେଲେଙ୍ଗାନାର ମେହବୁବାବାଦ୍ ଜିଲ୍ଲାର ଏକ ଭିଡିଓ ସୋସିଆଲ ମିଡିଆରେ ଦିନକୁ ଦିନ ଭାଇରାଲ ହେବାରେ ଲାଗିଛି, ଯେଉଁଥିରେ ଦୁଇ ନାବାଳକଙ୍କ ହାତ ବାନ୍ଧି ଗୋବର ଖୁଆଇବାକୁ ଚେଷ୍ଟା କରାଯାଉଛି | ମିଳିଥିବା ସୂଚନା ମୁତାବକ ୧୩ ଏବଂ ୧୬ ବର୍ଷର ଦୁଇ ଜଣ ନାବାଳକ ବଗିଚାରେ ପଶି ସେଠାରୁ ଆମ୍ବ ତୋଳୁଥିଲେ । ଠିକ୍ ସେତିକିବେଳେ ସେଠାରେ ଉପସ୍ଥିତ ଥିବା ଦୁଇଜଣ ବ୍ୟକ୍ତି ତାଙ୍କୁ ଦେଖି ପ୍ରବଳ ମାଡ଼ ମାରିଥିଲେ । ଏତିକିରେ ଦଣ୍ଡ ଅଟକି ନଥିଲା ।
ଏହି ଦୁଇ ଜଣ ବ୍ୟକ୍ତି କ୍ରୁରତାର ସମସ୍ତ ସୀମା ଟପିଯାଇ ପିଲାମାନଙ୍କର ହାତକୁ ବାନ୍ଧି ଗୋବର ଖୁଆଇବାକୁ ଚେଷ୍ଟା କରିଥିଲେ। ଏହି ସମୟ ମଧ୍ୟରେ ଜଣେ ବ୍ୟକ୍ତି ଘଟଣାର ଭିଡିଓ ପ୍ରସ୍ତୁତ କରି ସୋସିଆଲ ମିଡିଆରେ ପୋଷ୍ଟ କରିଥିଲେ । ମେହବୁବାବାଦ ଜିଲ୍ଲାପାଳ ତୁରନ୍ତ ଏହି ମାମଲାକୁ ଗୁରୁତର ସହ ନେଇ ଆଇପିସିର ଧାରା ୩୪୨, ୩୨୪ ଅନୁଯାୟୀ ଅଭିଯୁକ୍ତଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ନିର୍ଦ୍ଦେଶ ଦେଇଥିଲେ | ଯାହା ପରେ ଉଭୟ ଅଭିଯୁକ୍ତଙ୍କୁ ଗିରଫ କରାଯାଇଥିଲା।