ଭାରତରେ ସମୁଦାୟ କରୋନାଭାଇରସ୍ ଆକ୍ରାନ୍ତଙ୍କ ସଂଖ୍ୟା ୬୫୬
ନୂଆଦିଲ୍ଲୀ: ୨୧ଦିନିଆ ଲକଡାଉନ୍ ପଦକ୍ଷେପ ସମଗ୍ର ଦେଶରେ କରୋନାଭାଇରସ ସଂକ୍ରମଣକୁ ପ୍ରତିହତ କରିବ ବୋଲି ଭାରତୀୟ ସରକାରୀ କର୍ତ୍ତୃପକ୍ଷମାନେ ଆଶା କରୁଛନ୍ତି। ଏହି ଭୂତାଣୁର ଦ୍ରୁତ ସଂକ୍ରମଣ ନିୟନ୍ତ୍ରଣ କରିବାକୁ ଭାରତ ସମେତ ବିଶ୍ୱର ଅନେକ ଦେଶ ଯଥାସାଧ୍ୟ ଉଦ୍ୟମ ଚଳାଇଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଗୁରୁବାର ସକାଳ ସୁଦ୍ଧା ବିଭିନ୍ନ ରାଜ୍ୟରୁ ପ୍ରାପ୍ତ ସୂଚନା ଅନୁସାରେ, ଦେଶରେ ସମୁଦାୟ କରୋନାଭାଇରସ୍ ଆକ୍ରାନ୍ତଙ୍କ ସଂଖ୍ୟା ୬୫୬ରେ ପହଞ୍ଚିଛି । ଆକଳନ ଅନୁସାରେ ଗତ ପାଞ୍ଚ ଦିନ ହେବ ଆକ୍ରାନ୍ତଙ୍କ ସଂଖ୍ୟା ଦୈନିକ ଅନ୍ୟୁନ ୬୦ ବୋଲି ଜଣାପଡ଼ିଛି ।
ବୁଧବାର ସୁଦ୍ଧା ସମୁଦାୟ ୫୬ଜଣ କରୋନାଭାଇରସ୍ ଆକ୍ରାନ୍ତ ବ୍ୟକ୍ତି ସୁସ୍ଥ ହୋଇଛନ୍ତି । ଏବେ କରୋନଭାଇରସ୍ ସଂକ୍ରମଣ ଗୋଆକୁ ବ୍ୟପିଯାଇଛି । ସେଠାରେ ୩ଜଣ ସଂକ୍ରମଣ ହୋଇଥିବା ଜଣାପଡ଼ିଛି । ଉତ୍ତରପୂର୍ବ ଭାରତୀୟ ରାଜ୍ୟ ମଣିପୁର ଓ ମିଜୋରାମରେ ମଧ୍ୟ ଜଣେ ଲେଖାଏଁ ଏଥିରେ ଆକ୍ରାନ୍ତ ହୋଇଥିବା ଖବର ଆସିଛି ।
ବୁଧବାର ଦିନ କୋଡ଼ିଏ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳରେ ୯୪ଟି ନୂଆ କରୋନାଭାଇରସ୍ ସଂକ୍ରମଣ କେସ୍ ଆସିଛି । ସୋମବାର ପରେ ଏହା ହେଉଛି ଗୋଟିଏ ଦିନରେ ସର୍ବାଧିକ ସଂକ୍ରମଣ କେସ୍ ।
ଗୋଆରେ ୨୫, ୨୯ ଓ ୫୫ ବର୍ଷର ତିନିଜଣ ପୁରୁଷ କରୋନାଭାଇରସ୍ ଦ୍ୱାରା ଆକ୍ରାନ୍ତ ହୋଇଛନ୍ତି । ନିକଟ ଅତୀତରେ ସେମାନେ ସ୍ପେନ୍, ଅଷ୍ଟ୍ରେଲିଆ ଏବଂ ଆମେରିକାରୁ ଗୋଆ ଫେରିଥିଲେ ।୧୫ଟି ନୂଆ କେସ୍ ସହ ସଂକ୍ରମଣରେ ମହାରାଷ୍ଟ୍ର କେରଳକୁ ଟପିଯାଇଛି ।