ଆଫଗାନିସ୍ତାନରେ ଫସିଛି କ୍ରିକେଟର ରସିଦ ଖାନଙ୍କ ପୂରା ପରିବାର, ତଥାପି ଜାରି ରଖିଛନ୍ତି ଦମଦାର ପ୍ରଦର୍ଶନ

ଲଣ୍ଡନ୍: ତାଲିବାନ କାବୁଲକୁ ଅକ୍ତିଆର କରିବା ପରେ ଆଫଗାନିସ୍ତାନରେ ସ୍ଥିତି ସଙ୍ଗୀନ ରହିଛି । ହଜାର ହଜାର ଲୋକ ଭୟରେ ଦେଶ ଛାଡି ପଳାୟନ କରୁଥିବା ବେଳେ ଦେଶବାସୀ କଠିନ ସମୟ ଦେଇ ଗତି କରୁଛନ୍ତି । ଆଉ ଏହି ସଙ୍କଟଜନକ ସ୍ଥିତିରୁ ଜଣାଶୁଣା କ୍ରିକେଟର ରସିଦ ଖାନ୍ ମଧ୍ୟ ବର୍ତ୍ତିନାହାନ୍ତି । ଇଂଲଣ୍ଡରେ ଏବେ କ୍ରିକେଟ ଖେଳୁଥିବା ରସିଦଙ୍କ ପରିବାର  ଆଫଗାନିସ୍ତାନରେ ଫସି ରହିଛନ୍ତି । ଏହା ରସିଦଙ୍କ ଚିନ୍ତା ବଢାଇ ଦେଇଛି।

ପୂର୍ବରୁ ସୋସିଆଲ ମିଡ଼ିଆରେ ଦେଶରେ ଶାନ୍ତି ଫେରାଇ ଆଣିବା ପାଇଁ ଅପିଲ କରିଥିଲେ ରସିଦ ଖାନ୍ । ଏହାସହ ଆଫଗାନିସ୍ତାନକୁ ଏଭଳି ସଙ୍କଟଜନକ ସ୍ଥିତିରୁ ରକ୍ଷା କରିବା ପାଇଁ ବିଶ୍ୱବାସୀଙ୍କୁ ମଧ୍ୟ ଅପିଲ କରିଥିଲେ । ଗଣମାଧ୍ୟମରେ ପ୍ରକାଶିତ ରିପୋର୍ଟ ଅନୁଯାୟୀ, ଆଫଗାନିସ୍ତାନରେ ସାଧାରଣ ଲୋକଙ୍କୁ ହତ୍ୟା କରାଯାଉଥିବା ବେଳେ ଘର ଭାଙ୍ଗି ଦିଆଯାଉଛି । ଏପରିକି ଲୋକଙ୍କ ସମ୍ପତ୍ତି ଲୁଟ୍ କରାଯାଉଛି । ଲକ୍ଷ ଲକ୍ଷ ଲୋକ ଏବେ ବଞ୍ଚିବା ପାଇଁ ସଂଘର୍ଷ କରୁଛନ୍ତି ।  ଏଭଳି ଅରାଜକତା  ସୃଷ୍ଟି ହୋଇଥିବା ବେଳେ ଆଫଗାନିସ୍ତାନକୁ ଏକା ନ ଛାଡିବାକୁ ଅନୁରୋଧ କରିଥିଲେ ରସିଦ । ଆଫଗାନିସ୍ତାନକୁ ବରବାଦ ହେବାରୁ ରୋକିବା ସହ ଶାନ୍ତି ଫେରାଇ ଆଣିବାକୁ ବିଶ୍ୱର ବିଭିନ୍ନ ଦେଶର ନେତାଙ୍କୁ ଆବେଦନ କରିଥିଲେ ସେ।