ମଧ୍ୟପ୍ରଦେଶରେ ମାଲବାହୀ ଟ୍ରେନ ଲାଇନଚ୍ୟୁତ

ଭୋପାଳ: ମଧ୍ୟପ୍ରଦେଶରେ ସୋମବାର ଏକ ମାଲବାହୀ ଟ୍ରେନର କେତେକ ବଗି ଲାଇନଚ୍ୟୁତ ହୋଇଛି । ଭୋପାଳରୁ ଇଟାର୍ସି ଅଭିମୁଖେ ଯାଉଥିବା ଏହି ମାଲବାହୀ ଟ୍ରେନ୍ ଲାଇନଚ୍ୟୁତ ହୋଇଥିଲା। ଟ୍ରେନ୍ ଦୁର୍ଘଟଣା ସମ୍ପର୍କରେ ସୂଚନା ପାଇବା ପରେ ମଧ୍ୟପ୍ରଦେଶର ପ୍ରଶାସନିକ ଅଧିକାରୀ ଏବଂ ରେଳବାଇ ଅଧିକାରୀମାନେ ଘଟଣାସ୍ଥଳରେ ପହଞ୍ଚି ମାଲବାହୀ ଟ୍ରେନର ଓଲଟି ଯାଇଥିବା ବଗିଗୁଡ଼ିକୁ ଟ୍ରାକକୁ ଫେରାଇ ଆଣିବା ପାଇଁ କାର୍ଯ୍ୟ କରୁଛନ୍ତି।

ଭୋପାଳ ଡିଭିଜନର ରେଳ ପିଆରଓ ନଭାଲ ଅଗ୍ରୱାଲ କହିଛନ୍ତି ଯେ ଭୋପାଳରୁ ଇଟାର୍ସି ଅଭିମୁଖେ ଯାଉଥିବା ଏକ ମାଲବାହୀ ଟ୍ରେନର ତିନୋଟି ବଗି ମିସ୍ରୋଡ ଏବଂ ମଣ୍ଡିଦୀପ ରେଳ ଷ୍ଟେସନ ମଧ୍ୟରେ ଲାଇନଚ୍ୟୁତ ହୋଇଛି। ମରାମତି କାମ ଚାଲିଛି, ଟିମ୍ ଘଟଣାସ୍ଥଳରେ ରହିଛି। ତିନି ଲାଇନ୍ ବିଶିଷ୍ଟ ଏହି ସେକ୍ସନ ଯୋଗୁଁ ଟ୍ରେନ୍ ଚଳାଚଳ ପ୍ରଭାବିତ ହୋଇନାହିଁ।