ରାଞ୍ଚି: ପ୍ରଥମେ ବନ୍ଧୁତା ଓ ତାପରେ ସୁଯୋଗ ଦେଖି ମୋବାଇଲ ଲୁଟୁଥିବା ଜଣେ ମୋବାଇଲ ଚୋରକୁ ଧରାଇଦେଇଛି ସ୍ମାର୍ଟୱାଚ | କଥାଟି ଶୁଣିବାକୁ ଅଜବ ଲାଗୁଥିଲେ ବି ଏକଥା ଏକଦମ ସତ | ଝାଡ଼ଖଣ୍ଡର କୋଡର୍ମା ଜିଲ୍ଲାରୁ ଏଭଳି ଏକ ମାମଲା ସାମ୍ନାକୁ ଆସିଛି। ମିଳିଥିବା ସୂଚନା ମୁତାବକ ଦୁଇଦିନ ତଳେ ହାଟିଆ-ଇସଲାମପୁର ଏକ୍ସପ୍ରେସର ଜଣେ ଯାତ୍ରୀ ମୋବାଇଲ ଚୋରି ନେଇ ଅଭିଯୋଗ କରିଥିଲେ | ଆଉ ଅଭିଯୋଗ ପାଇବା ପରେ ରେଲୱେ ପ୍ରୋଟେକ୍ସନ ଫୋର୍ସର କର୍ମଚାରୀ ଟ୍ରେନରେ ପହଞ୍ଚି ଛାନଭିନ କରିଥିଲେ | ଆଉ ଛାନଭିନ ସମୟରେ ଜଣାପଡିଥିଲା ଯେ କେବଳ ଜଣେ ନୁହେଁ ବରଂ ସେହିଦିନ ସେହି ଟ୍ରେନରୁ ୫ ଜଣଙ୍କର ମୋବାଇଲ ଚୋରି ହୋଇଛି | ଏହା ପରେ ପୁଲିସ କର୍ମଚାରୀମାନେ ଲଗାତାର ଖୋଜାଖୋଜି କରିଥିଲେ ବି ମୋବାଇଲ ଚୋରା ବାବଦରେ ଜାଣିପାରିନଥିଲେ |
Sambad is now on WhatsApp
Join and get latest news updates delivered to you via WhatsApp
ତେବେ ମୋବାଇଲ ଚୋରି ହୋଇଥିବା ଜଣେ ଯାତ୍ରୀ ଏକ ସ୍ମାର୍ଟୱାଚ ପିନ୍ଧିଥିଲେ, ଯାହା ତାଙ୍କ ମୋବାଇଲ୍ ସହିତ ସଂଯୁକ୍ତ ଥିଲା | ସ୍ମାର୍ଟୱାଚ୍ ଦ୍ୱାରା ଯେତେବେଳେ ଯାତ୍ରୀଜଣକ ଲଗାତାର ତାଙ୍କ ଫୋନକୁ କଲ କରିଥିଲେ ସେତେବେଳେ ଫୋନ ଜଣେ ଯୁବକଙ୍କ ପାଖରେ ବାଜିଉଠିଥିଲା | ଏହାପରେ ପୁଲିସ ତୁରନ୍ତ ପହଞ୍ଚି ଉକ୍ତ ଯୁବକଙ୍କୁ ଧରି ପଚରାଉଚୁରା କରିଥିଲେ | ଏହାପରେ ଟିକେଟ ନିରୀକ୍ଷକ ଆସି ଯେତେବେଳେ ଉକ୍ତ ଯୁବକଙ୍କ ବାବଦରେ ଛାନଭିନ କରିଥିଲେ ସେତେବେଳେ ତାଙ୍କର ନାମ ଶେଖର ରଂଜନ ବୋଲି ଜଣାପଡିଥିଲା | ଉକ୍ତ ଯୁବକଙ୍କ ଘର ବିହାରର ଗୟା ଜିଲ୍ଲାର ୱାଜିରଗଞ୍ଜ ବୋଲି ଜଣାପଡିଥିଲା ।
ଏହାପରେ ପୁଲିସ ଟିମ୍ ଯେତେବେଳେ ତାଙ୍କ ବ୍ୟାଗ୍ ଯାଞ୍ଚ କରିଥିଲେ, ସେତେବେଳେ ୫ଟି ମୋବାଇଲ ଫୋନ, ଏକ ସୁନା ଲକେଟ୍ ଏବଂ ୯ଟି ଏକ ରୂପା ମୁଦ୍ରା ଏବଂ ନଗଦ ୩୦୦୦ ଟଙ୍କା ଜବତ କରାଯାଇଥିଲା | ଯେତେବେଳେ ପୁଲିସ ଟିମ ତାଙ୍କୁ ପଚରାଉଚରା କଲା, ସେତେବେଳେ ସେ ଦୋଷ ସ୍ୱୀକାର କରି କହିଥିଲେ ଯେ ଟ୍ରେନରେ ଯାତ୍ରୀ ହୋଇ ସେ ଯାନ୍ତି ଏବଂ ସୁଯୋଗ ପାଇଲେ ପର୍ସ ଓ ମୋବାଇଲ ଚୋରି କରନ୍ତି | ଏବେ ତାଙ୍କୁ ଗିରଫ କରାଯାଇ କୋର୍ଟ ଚାଲାଣ କରାଯାଇଛି |