ଭୋକିଲା ଥିଲା, କିଛି ଖାଦ୍ୟ ଚୋରି କରିବାରୁ ଲୋକେ ପିଟି ପିଟି ମାରିଦେଲେ
କୋଚି: କେରଳର ପଲକ୍କଡ ଜିଲ୍ଲାରେ ଜଣେ ଆଦିବାସୀ ବ୍ୟକ୍ତି ଖାଦ୍ୟ ଚୋରି କରୁଥିବା ଅବସ୍ଥାରେ ଧରାପଡି ଲୋକଙ୍କ ମାଡ଼ରେ ମୃତ୍ୟୁବରଣ କରିଛି । ଏହାକୁ ନେଇ ସାରା ରାଜ୍ୟରେ ପ୍ରବଳ ଜନଅସନ୍ତୋଷ ଦେଖାଦେଇଛି । ଏହି ଘଟଣାର ପ୍ରତିବାଦରେ ବିଜେପି ପକ୍ଷରୁ ମନରକଡ ତାଲୁକରେ ଆଜି ବନ୍ଦ ଡାକରା ଦିଆଯାଇଛି ।
Sambad is now on WhatsApp
Join and get latest news updates delivered to you via WhatsApp
ଘଟଣାରୁ ପ୍ରକାଶ ଯେ ଗତକାଲି ଆଟାଟପାଡିର ୨୭ ବର୍ଷୀୟ ମଧୁ ନାମକ ଆଦିବାସୀ ଯୁବକକୁ କେତେକ ସ୍ଥାନୀୟ ଲୋକ ଧରି ବାନ୍ଧିଦେବା ପରେ ପ୍ରବଳ ମାଡ଼ ମାରିଥିଲେ । ତା ବିରୋଧରେ ଅଭିଯୋଗ ଥିଲା ଯେ ସେ ଉକ୍ତ ଅଂଚଳର ଦୋକାନଗୁଡ଼ିକରୁ ନିୟମିତଭାବେ ଚାଉଳ ଓ ଅନ୍ୟ ଖାଦ୍ୟ ସାମଗ୍ରୀ ଚୋରି କରେ । ଲୋକଙ୍କ ଦ୍ୱାରା ପ୍ରବଳ ମାଡ଼ ଖାଇବା ପରେ ସେ ସଂଜ୍ଞାହୀନ ହୋଇ ପଡିଯାଇଥିଲା । ଡାକ୍ତରଖାନା ନିଆଯିବା ବାଟରେ ତାର ମୃତ୍ୟୁ ହୋଇଥିଲା । ଦୁର୍ଭାଗ୍ୟଜନକ କଥା ହେଉଛି ତାକୁ ମାଡ଼ ମାରିବା ପରେ କିଛି ସ୍ଥାନୀୟ ଯୁବକ ତା ସହ ସେଲଫି ଉଠାଇଥିଲେ ।
ଏହି ଘଟଣାକୁ ନେଇ ସାରା ରାଜ୍ୟରେ ପ୍ରବଳ ପ୍ରତିକ୍ରିୟା ପ୍ରକାଶ ପାଇଛି । ମୁଖ୍ୟମନ୍ତ୍ରୀ ଏହି ଘଟଣାକୁ ନିନ୍ଦା କରିବା ସହ ଦୋଷୀମାନଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି । ଆବଶ୍ୟକ କାର୍ଯ୍ୟାନୁଷ୍ଠାନ ପାଇଁ ଡିଜିପିଙ୍କୁ ଆବଶ୍ୟକ ନିର୍ଦ୍ଦେଶ ଦିଆଯାଇଛି ବୋଲି ସେ କହିଛନ୍ତି । ଇତି ମଧ୍ୟରେ ପୁଲିସ୍ କେତେଜଣ ଅଭିଯୁକ୍ତଙ୍କୁ ଗିରଫ କରିଛି । ଅନ୍ୟପକ୍ଷରେ ବିଜେପି ପକ୍ଷରୁ ମଧ୍ୟ ଏହି ଘଟଣାକୁ ନେଇ ବନ୍ଦ ଡାକରା ଦିଆଯାଇଛି ।