ଟିଏମ୍‌ସି ନେତା ମୁକୁଲ ରୟ ନିଖୋଜ: ଗତକାଲି ଦିଲ୍ଳୀରେ ପହଞ୍ଚିଥାନ୍ତେ, ହୋଇପାରୁନି ଯୋଗାଯୋଗ

କୋଲକାତା: ସୋମବାର ବିଳମ୍ବିତ ରାତିରୁ ଟିଏମସିର ବରିଷ୍ଠ ନେତା ମୁକୁଲ ରୟ ନିଖ‌ୋଜ ଅଛନ୍ତି ବୋଲି ତାଙ୍କ ପରିବାର ସଦସ୍ୟ ଅଭିଯୋଗ ଆଣିଛନ୍ତି। ସୋମବାର ସନ୍ଧ୍ୟାରେ ତାଙ୍କର ଦିଲ୍ଲୀରେ ପହଞ୍ଚିବାର କାର୍ଯ୍ୟକ୍ରମ ଥିଲା। ହେଲେ ସେବେଠାରୁ ତାଙ୍କ ସହିତ ଯୋଗାଯୋଗହୋଇ ପାରୁନାହାନ୍ତି କି ତାଙ୍କୁୁ ଦେଖିବାକୁ ମିଳୁନାହିଁ।

ତେବେ ଏ ନେଇ ମୁକୁଲ ରୟଙ୍କ ପୁଅ ଶୁଭ୍ରାଂଶୁ କହିଛନ୍ତି, ‘ଏବେ ସୁଦ୍ଧା ମୁଁ ମୋ ବାପାଙ୍କ ସହ କୌଣସି ବି ଯୋଗାଯୋଗ କରି ପାରିନାହିଁ।’

ପୂର୍ବତନ ରେଳ ମନ୍ତ୍ରୀଙ୍କ ଘନିଷ୍ଠ ସହଯୋଗୀଙ୍କ କହିବା ଅନୁଯାୟୀ, ରୟ ସୋମବାର ସନ୍ଧ୍ୟାରେ ଦିଲ୍ଲୀ ଅଭିମୁଖେ ଯାତ୍ରା କରିବାର କାର୍ଯ୍ୟକ୍ରମ ରହିଥିଲା। ସେ ୯ଟା ସୁଦ୍ଧା ଦିଲ୍ଲୀ ବିମାନବନ୍ଦରରେ ଅବତରଣ କରିଥାନ୍ତେ। ମାତ୍ର ଏପର୍ଯ୍ୟନ୍ତ ତାଙ୍କର କୌଣସି ଖୋଜ୍‌ଖବର ନାହିଁ।

ଟିଏମ୍‌ସି ଦଳରେ ମତଭେଦ ପରେ ରୟ ୨୦୧୭ ମସିହାରେ ବିଜେପିରେ ଯୋଗ ଦେଇଥିଲେ। ତାଙ୍କୁ ବିଜେପିର ଜାତୀୟ ଉପ-ସଭାପତି କରାଯାଇଥିଲା। ତେବେ, ବିଜେପି ଟିକେଟରେ ୨୦୨୧ ମସିହାରେ ପଶ୍ଚିମବଙ୍ଗ ନିର୍ବାଚନରେ ସଫଳତାର ସହ ପ୍ରତିଦ୍ୱନ୍ଦ୍ୱିତା କରିବା ପରେ ରୟ ତୃଣମୂଳ କଂଗ୍ରେସକୁ ଫେରିଥିଲେ।