ସ୍କୁଟିକୁ ଧକ୍କା ଦେଇ ଘୋଷାରି ନେଲା ଟ୍ରକ୍; ୬ ବର୍ଷର ଶିଶୁ ଓ ଜେଜେବାପା ମୃତ

ନୂଆଦିଲ୍ଲୀ : ଆଉ ଏକ ହିଟ୍-ଆଣ୍ଡ୍-ଡ୍ରାଗ୍ ଘଟଣା ଘଟିଛି ଉତ୍ତରପ୍ରଦେଶର ମହୋବା ଅଞ୍ଚଳରେ। ଛଅ ବର୍ଷର ନାତି ସାତ୍ତ୍ବିକକୁ ପଛରେ ବସାଇ ଜେଜେବାପା ସ୍କୁଟିରେ ଯାଉଥିବା ବେଳେ ଏକ ଡମ୍ପର ଟ୍ରକ୍ ତାଙ୍କୁ ଧକ୍କା ଦେଇ ୨ କିମି ଘୋଷାରି ନେଇଥିଲା। ଏଥିରେ ନାତି ସାତ୍ତ୍ବିକ ସହ ଜେଜେବାପା ୬୭ ବର୍ଷୀୟ ଉଦିତ ନାରାୟଣ ଚାନସୋରିଆଙ୍କର ଘଟଣାସ୍ଥଳରେ ମୃତ୍ୟୁ ଘଟିଛି। ଜେଜେ-ନାତି ବଜାରକୁ ଯାଉଥିବା ବେଳେ ଏକ ଦ୍ରୁତଗାମୀ ଟ୍ରକ୍ ତାଙ୍କୁ ଧକ୍କା ଦେଇଥିଲା।

ଏଥିରେ ଜେଜେ ଉଦିତଙ୍କର ଘଟଣାସ୍ଥଳରେ ମୃତ୍ୟୁ ଘଟିଥିବା ବେଳେ ନାତି ସାତ୍ତ୍ବିକ ଓ ସ୍କୁଟିକୁ ଟ୍ରକ୍‌ଟି ୨ କିମି ଘୋଷାରି ନେଇଥିଲା। କାନପୁର-ସାଗର ହାଇୱେ ଏନ୍‌ଏଚ୍୮୬ରେ ଏହି ଘଟଣା ଘଟିଥିଲା। ଏହାର ଏକ ଭିଡିଓ ସୋସିଆଲ ମିଡ଼ିଆରେ ଭାଇରାଲ ହୋଇଛି। ଏଥିରେ ଦେଖିବାକୁ ମିଳୁଛି,ଲୋକମାନେ ଟ୍ରକ୍ ଡ୍ରାଇଭରକୁ ସଚେତନ କରାଇଥିଲେ ମଧ୍ୟ ସେ ଗାଡ଼ି ଅଟକାଇ ନ ଥିଲା। ଶେଷରେ ବାଇକରେ ଲୋକମାନେ ଟ୍ରକ୍‌ର ପିଛା କରିବା ସହ ଟେକାପଥର ଫୋପାଡ଼ିବାରୁ ଦୁଇ କିମି ପରେ ସେ ଟ୍ରକ୍ ଅଟକାଇଥିଲା। ସ୍ଥାନୀୟ ଲୋକମାନେ ଟ୍ରକ୍ ଡ୍ରାଇଭରକୁ ମାଡ଼ ମାରିଥିଲେ। ପୁଲିସ ଟ୍ରକ୍‌କୁ ଜବତ କରିବା ସହ ଡ୍ରାଇଭରକୁ ଗିରଫ କରିଛି।