ଭାରତ ସମର୍ଥକ ମାର୍କୋ ରୁବିଓଙ୍କୁ ବୈଦେଶିକ ସଚିବ ଭାବେ ମନୋନୀତ କଲେ ଟ୍ରମ୍ପ

ୱାସିଂଟନ: ଆମେରିକାର ନବନିର୍ବାଚିତ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ବରିଷ୍ଠ ସିନେଟର ମାର୍କୋ ରୁବିଓଙ୍କୁ ବୈଦେଶିକ ସଚିବ (ବିଦେଶ ମନ୍ତ୍ରୀ) ପଦ ପାଇଁ ମନୋନୀତ କରିଛନ୍ତି। ଯଦି ଏହା ନିଶ୍ଚିତ ହୁଏ, ତେବେ ରୁବିଓ ହେଉଛନ୍ତି ପ୍ରଥମ ଲାଟିନୋ ଯିଏ କି ଜାନୁଆରିରେ ଟ୍ରମ୍ପ ଦାୟିତ୍ୱ ଗ୍ରହଣ କରିବା ପରେ ଆମେରିକାର ଶୀର୍ଷ କୂଟନୀତିଜ୍ଞ ଭାବରେ କାର୍ଯ୍ୟ କରିବେ। ଫ୍ଲୋରିଡାର ବାସିନ୍ଦା ରୁବିଓ ବର୍ଷ ବର୍ଷ ଧରି ଆମେରିକାର ଶତ୍ରୁମାନଙ୍କ ପ୍ରତି ଦୃଢ଼ ଆଭିମୁଖ୍ୟ ଗ୍ରହଣ କରିବା ସହ ଚୀନ୍, ଇରାନ୍ ଓ କ୍ୟୁବା ଭଳି ଦେଶ ଦ୍ୱାରା ସୃଷ୍ଟି ହୋଇଥିବା ଆହ୍ୱାନର ଦୃଢ଼ ଜବାବ ଦେବାକୁ ଆହ୍ୱାନ ଦେଇଛନ୍ତି। ରୁବିଓ ଭାରତ ସହିତ ସମ୍ପର୍କକୁ ସୁଦୃଢ଼ କରିବାକୁ ଚାହାନ୍ତି। ବିଶେଷ କରି ପ୍ରତିରକ୍ଷା ଓ ବାଣିଜ୍ୟ କ୍ଷେତ୍ରରେ ଆମେରିକା-ଭାରତ ସହଯୋଗକୁ ଆହୁରି ସୁଦୃଢ଼ କରିବା ପାଇଁ ସେ ପ୍ରୟାସ ଜାରି ରଖିଛନ୍ତି।

ଭାରତ ପ୍ରତି ରୁବିଓଙ୍କ ସମର୍ଥନ ଏସିଆରେ ଚୀନ୍‌ର ପ୍ରଭାବକୁ ସନ୍ତୁଳିତ କରିବା ପାଇଁ କଂଗ୍ରେସରେ ଦ୍ୱିପାକ୍ଷିକ ପ୍ରୟାସ ସହିତ ଯୋଡ଼ି ହୋଇଛି। ସେ ବାରମ୍ବାର ଏକ ସୁଦୃଢ଼ ଭାରତ-ଆମେରିକା ସମ୍ପର୍କର ରଣନୈତିକ ଗୁରୁତ୍ୱ ଉପରେ ଆଲୋକପାତ କରିଛନ୍ତି ଏବଂ ଏପରି ନୀତି ପାଇଁ ପରାମର୍ଶ ଦେଇଛନ୍ତି ଯାହା କେବଳ ପାରସ୍ପରିକ ଅର୍ଥନୈତିକ ସ୍ୱାର୍ଥକୁ ପ୍ରୋତ୍ସାହିତ କରେ ନାହିଁ ବରଂ ଉଭୟ ରାଷ୍ଟ୍ରର ଗଣତାନ୍ତ୍ରିକ ନୀତିକୁ ମଧ୍ୟ ସୁଦୃଢ଼ କରେ। ଚୀନ୍‌କୁ ନେଇ ରୁବିଓଙ୍କ ଆଭିମୁଖ୍ୟ ଅତ୍ୟନ୍ତ କଠୋର। ସିନେଟରେ ଚୀନ୍ ନୀତି ବିରୋଧରେ ସ୍ୱର ଉତ୍ତୋଳନ କରି ସେ ଦକ୍ଷିଣ ଚୀନ୍ ସାଗରରେ ଚୀନ୍ କମ୍ୟୁନିଷ୍ଟ ପାର୍ଟି (ସିସିପି)ର ମାନବାଧିକାର ଉଲ୍ଲଂଘନ, ବାଣିଜ୍ୟ ଅଭ୍ୟାସ ଓ ଆକ୍ରମଣାତ୍ମକ କାର୍ଯ୍ୟକଳାପକୁ ସମାଲୋଚନା କରିଛନ୍ତି। ଚୀନ୍ ଉପରେ ଆର୍ଥିକ ଚାପ ବଢ଼ାଉଥିବା ନୀତିକୁ ସେ ସମର୍ଥନ କରିଛନ୍ତି, ଯେଉଁଥିରେ କଟକଣା ଓ ଟେକ୍ନୋଲୋଜି ହସ୍ତାନ୍ତର ଉପରେ ପ୍ରତିବନ୍ଧକ ମଧ୍ୟ ରହିଛି। ରୁବିଓଙ୍କ ଆଭିମୁଖ୍ୟ ଚୀନ୍‌କୁ ଘରୋଇ ଓ ଅନ୍ତର୍ଜାତୀୟ ସ୍ତରରେ ତା’ର କାର୍ଯ୍ୟ ପାଇଁ ଉତ୍ତରଦାୟୀ କରିବା ଉପରେ ଗୁରୁତ୍ୱାରୋପ କରେ। ଭାରତ, ଜାପାନ ଓ ଦକ୍ଷିଣ କୋରିଆ ଭଳି ଆଞ୍ଚଳିକ ସହଯୋଗୀଙ୍କ ସହ ସମ୍ପର୍କକୁ ସୁଦୃଢ଼ କରିବା ସହ ଚୀନ୍ ପ୍ରଭାବ ବିରୋଧରେ ଆମେରିକାର ଦୃଢ଼ ଆଭିମୁଖ୍ୟ ଉପରେ ସେ ଜୋର ଦେବେ ବୋଲି ତାଙ୍କ ଟ୍ରାକ୍ ରେକର୍ଡରୁ ଜଣାପଡ଼ିଛି। 

ରୁବିଓଙ୍କ ବୈଦେଶିକ ନୀତି ଅଭିଜ୍ଞତା ୟୁରୋପ ପର୍ଯ୍ୟନ୍ତ ବିସ୍ତାରିତ। ସେ ଉତ୍ତର ଆଟଲାଣ୍ଟିକ୍ ଟ୍ରିଟି ଅର୍ଗାନାଇଜେସନ୍ (ନାଟୋ)ର କଠୋର ସମର୍ଥକ। ରୁବିଓ ତାଙ୍କ ସିନେଟ୍ କ୍ୟାରିୟରରେ ବିଶ୍ୱ ସ୍ଥିରତା ବଜାୟ ରଖିବା ଏବଂ ରୁଷୀୟ ଆକ୍ରମଣର ମୁକାବିଲା କରିବାରେ ନାଟୋ ମେଣ୍ଟର ଗୁରୁତ୍ୱ ଉପରେ ଯୁକ୍ତି ବାଢ଼ିଛନ୍ତି। ରୁବିଓ ନାଟୋକୁ ‘ଆମେରିକୀୟ ନିରାପତ୍ତାର ସ୍ତମ୍ଭ’ ବୋଲି କହିବା ସହ ଉଭୟ ରୁଷ୍ ଓ ଅନ୍ୟ ବୈଶ୍ୱିକ ବିପଦର ମୁକାବିଲା କରିବାରେ ଏହାର ଭୂମିକା ଉପରେ ଗୁରୁତ୍ୱାରୋପ କରିଛନ୍ତି। ୟୁକ୍ରେନ ଯୁଦ୍ଧ ରୁବିଓଙ୍କ ଏଜେଣ୍ଡାରେ ଶୀର୍ଷରେ ରହିବ। ଫ୍ଲୋରିଡା ସିନେଟର ନିକଟରେ ଦେଇଥିବା ସାକ୍ଷାତ୍‌କାରରେ କହିଛନ୍ତି ଯେ ୟୁକ୍ରେନ୍ ଗତ ଦଶନ୍ଧିରେ ରୁଷ୍‌ ନେଇଥିବା ସମସ୍ତ ଅଞ୍ଚଳର ପୁନରୁଦ୍ଧାର ଉପରେ ଧ୍ୟାନ ଦେବା ପରିବର୍ତ୍ତେ ରୁଷ୍ ସହିତ ବୁଝାମଣାରେ ସମାଧାନ କରିବା ଆବଶ୍ୟକ। ୟୁକ୍ରେନ ପାଇଁ ଏପ୍ରିଲରେ ପାରିତ ହୋଇଥିବା ୯୫ ବିଲିୟନ ଡଲାରର ସାମରିକ ସହାୟତା ପ୍ୟାକେଜ୍ ବିରୋଧରେ ଭୋଟ୍ ଦେଇଥିବା ୧୫ ଜଣ ରିପବ୍ଲିକାନ ସିନେଟରଙ୍କ ମଧ୍ୟରୁ ସେ ଅନ୍ୟତମ ଥିଲେ। ସେପ୍ଟେମ୍ବରରେ ରୁବିଓ କହିଥିଲେ, ମୁଁ ରୁଷ୍‌ର ପକ୍ଷରେ ନୁହେଁ- କିନ୍ତୁ ବାସ୍ତବତା ହେଉଛି ୟୁକ୍ରେନ୍ ଯୁଦ୍ଧ କେବଳ ବୁଝାମଣା ମାଧ୍ୟମରେ ଶେଷ ହୋଇପାରିବ। ମଧ୍ୟପ୍ରାଚ୍ୟରେ ହମାସ-ଇସ୍ରାଏଲ ବିବାଦକୁ ନେଇ ରୁବିଓ ଦୃଢ଼ ଆଭିମୁଖ୍ୟ ଗ୍ରହଣ କରିଛନ୍ତି। ସେ ଦୀର୍ଘ ଦିନ ଧରି ଇସ୍ରାଏଲକୁ ଆମେରିକାର ଏକ ପ୍ରମୁଖ ସହଯୋଗୀ ଭାବରେ ସମର୍ଥନ କରିବା ସହ ଆଞ୍ଚଳିକ ସ୍ଥିରତା ପାଇଁ ବିପଦ ସୃଷ୍ଟି କରୁଥିବା ହମାସ ଓ ଅନ୍ୟ ଗୋଷ୍ଠୀକୁ ସମାଲୋଚନା କରି ଆସୁଛନ୍ତି। ରୁବିଓ ଇସ୍ରାଏଲ ପାଇଁ ସୁରକ୍ଷା ସହାୟତାକୁ ସମର୍ଥନ କରିବା ସହ ଗାଜାରୁ ସୃଷ୍ଟି ହେଉଥିବା ହିଂସା ଉପରେ ନିର୍ଣ୍ଣାୟକ ଜବାବ ଦେବାକୁ ଆହ୍ୱାନ ଦେଇଛନ୍ତି।