ଏକ୍ସରେ ଟ୍ରମ୍ପ-ମସ୍କ ଆଲୋଚନା: ବାଇଡେନ, ହାରିସ୍‌ଙ୍କ ବିରୋଧରେ ବିଷ ଉଗାରିଲେ ଟ୍ରମ୍ପ

ୱାସିଂଟନ: ରିପବ୍ଲିକାନ୍ ରାଷ୍ଟ୍ରପତି ପ୍ରାର୍ଥୀ ଡୋନାଲ୍ଡ ଟ୍ରମ୍ପଙ୍କ ସହ ଏକ୍ସରେ ଏଲନ୍ ମସ୍କଙ୍କ ବହୁ ପ୍ରତୀକ୍ଷିତ ସାକ୍ଷାତ୍‌କାର ପ୍ରକାଶ ପାଇଛି। ଏଥିରେ ଅଭିଯୋଗ, ବ୍ୟକ୍ତିଗତ ଆକ୍ରମଣ ଓ ଦାବିର ମିଶ୍ରଣ ଦେଖିବାକୁ ମିଳିଥିଲା। ବୈଷୟିକ ତ୍ରୁଟି କାରଣରୁ ପ୍ରାୟ ୪୦ ମିନିଟ୍ ବିଳମ୍ବିତ ହୋଇଥିବା ଏହି ସାକ୍ଷାତ୍‌କାର ସମୟରେ ଟ୍ରମ୍ପ୍ ଦାବି କରିଥିଲେ ଯେ ଜୋ ବାଇଡେନ ହ୍ୱାଇଟ୍ ହାଉସ୍ ଦୌଡ଼ରୁ ବିଦାୟ ନେବା ଘଟଣା ଦଳୀୟ ‘ବିଦ୍ରୋହ’ର ପରିଣତି ଥିଲା। ବିତର୍କରେ ମୁଁ ବାଇଡେନଙ୍କୁ ଏତେ ଶୋଚନୀୟ ଭାବେ ପରାସ୍ତ କରିଥିଲି ଯେ ତାଙ୍କୁ ଦୌଡ଼ରୁ ବାଦ୍ ଦିଆଯାଇଥିଲା ବୋଲି ୭୮ ବର୍ଷୀୟ ଟ୍ରମ୍ପ କହିଛନ୍ତି।

ରାଷ୍ଟ୍ରପତି ନିର୍ବାଚନରେ ଶେଷ ଯାଏ ଲଢ଼ିବାକୁ ଦୃଢ଼ ମନୋବଳ ରଖିଥିବା ବାଇଡେନ ଗତ ମାସରେ ହଠାତ୍ ଏଥିରୁ ଓହରି ଯାଇ ଉପରାଷ୍ଟ୍ରପତି କମଳା ହାରିସଙ୍କୁ ଏହି ପଦ ପାଇଁ ସମର୍ଥନ କରିଥିଲେ। ଜୁନ୍ ୨୮ରେ ଡୋନାଲ୍ଡ ଟ୍ରମ୍ପଙ୍କ ସହ ନୈରାଶ୍ୟଜନକ ବିତର୍କ ପ୍ରଦର୍ଶନ ପରେ ସାଥୀ ଡେମୋକ୍ରାଟମାନଙ୍କ ଚାପରେ ୮୧ ବର୍ଷୀୟ ବାଇଡେନ ଏହି ନିଷ୍ପତ୍ତି ନେଇଥିଲେ। ଏଲନ୍ ମସ୍କଙ୍କ ସହ କଥାବାର୍ତ୍ତା ବେଳେ ଟ୍ରମ୍ପ ବାଇଡେନଙ୍କ ସ୍ଥାନରେ କମଳା ହାରିସଙ୍କୁ ଡେମୋକ୍ରାଟିକ୍ ପ୍ରାର୍ଥୀ କରାଯିବା ନେଇ କ୍ଷୋଭ ପ୍ରକାଶ କରିଥିଲେ। ମସ୍କ କମଳା ହାରିସଙ୍କୁ ‘ପ୍ରବଳ ବାମପନ୍ଥୀ’ (ଫାର୍ ଲେଫ୍ଟ) ବୋଲି କହିଥିବା ବେଳେ ଟ୍ରମ୍ପ ତାଙ୍କୁ ‘ଉଗ୍ର ବାମପନ୍ଥୀ ପାଗଳ’(ରେଡିକାଲ ଲେଫ୍ଟ ଲୁନାଟିକ୍) ବୋଲି କହିଛନ୍ତି। ସାକ୍ଷାତକାରରେ ଉପରାଷ୍ଟ୍ରପତି ପ୍ରାର୍ଥୀ ଟିମ୍ ୱାଲ୍‌ଜଙ୍କୁ ମଧ୍ୟ ଟାର୍ଗେଟ କରିଥିଲେ।

ମସ୍କଙ୍କ ସହ ଆଲୋଚନାରେ ଟ୍ରମ୍ପ ତାଙ୍କ ବିରୋଧରେ ହୋଇଥିବା ହତ୍ୟା ଉଦ୍ୟମକୁ ମଧ୍ୟ ମନେ ପକାଇଥିଲେ। ଗତ ମାସରେ ପେନ୍ସିଲଭେନିଆର ବଟଲରରେ ଏକ ପ୍ରଚାର ରାଲିରେ ଏହି ହତ୍ୟା ଉଦ୍ୟମ ପରେ ସେ ଡୋନାଲ୍ଡ ଟ୍ରମ୍ପଙ୍କ ରାଷ୍ଟ୍ରପତି ପ୍ରାର୍ଥିତ୍ବକୁ ସମର୍ଥନ କରିଥିଲେ ବୋଲି ମସ୍କ କହିଛନ୍ତି। ଟ୍ରମ୍ପ କମଳା ହାରିସଙ୍କୁ ବାଇଡେନଙ୍କ ‘ବର୍ଡର ଜାର୍’ ଆଖ୍ୟା ଦେଇ ସେ ବାହାର ଦେଶର ଅପରାଧୀ ଓ ମାନସିକ ରୋଗୀଙ୍କୁ ଦେଶରେ ପୂରାଉଥିବା ଦାବିକୁ ଦୋହରାଇଛନ୍ତି। ଯଦି ସେ ନିର୍ବାଚିତ ହୁଅନ୍ତି, ତେବେ ସେ ଆମେରିକା ଇତିହାସରେ ‘ସବୁଠାରୁ ବଡ଼ ପ୍ରତ୍ୟର୍ପଣ’ର ତଦାରଖ କରିବେ ବୋଲି ପ୍ରତିଶ୍ରୁତି ଦେଇଛନ୍ତି। ମସ୍କ କହିଛନ୍ତି ଯେ ଆମେରିକା ବେଆଇନ ପ୍ରବାସୀଙ୍କୁ ସୀମିତ କରିବା ଆବଶ୍ୟକ। ଅତୀତରେ ଜୋ ବାଇଡେନଙ୍କର ‘ଆଇକ୍ୟୁ’ କମ୍ ରହିଛି ବୋଲି କହିଥିବା ଡୋନାଲ୍ଡ ଟ୍ରମ୍ପ ଏଲନ୍ ମସ୍କଙ୍କ ସହ କଥାବାର୍ତ୍ତା ବେଳେ ନିଜର ଆକ୍ରମଣକୁ ବଢ଼ାଇଥିଲେ। ସେ କହିଛନ୍ତି ଯେ ଆମେରିକା ରାଷ୍ଟ୍ରପତିଙ୍କର ଆଦୌ ‘ଆଇକ୍ୟୁ’ ବି ନ ଥାଇପାରେ।

ରୁଷ୍-ୟୁକ୍ରେନ ଯୁଦ୍ଧ ନେଇ ଟ୍ରମ୍ପ କହିଛନ୍ତି ଯେ ଯଦି ୟୁକ୍ରେନ କେବେ ନାଟୋର ଅଂଶ ହୋଇଯାଏ ତେବେ ଏହାର ପରିଣାମ ବିଷୟରେ ରୁଷ୍‌ ସ୍ପଷ୍ଟ ଥିଲା। ଟ୍ରମ୍ପ ଦାବି କରିଛନ୍ତି ଯେ ଯଦି ସେ ଆମେରିକାର ରାଷ୍ଟ୍ରପତି ହୋଇଥାନ୍ତେ ତେବେ ରୁଷ୍ ୟୁକ୍ରେନ ଉପରେ କେବେ ବି ଆକ୍ରମଣ କରିନଥାନ୍ତା। ଦୁଇ ଘଣ୍ଟା ଧରି ଚାଲିଥିବା ଆଲୋଚନାରେ ଏଲନ୍ ମସ୍କ ୭୮ ବର୍ଷୀୟ ଟ୍ରମ୍ପଙ୍କ ପ୍ରଶାସନରେ ଭୂମିକା ଗ୍ରହଣ କରିବାକୁ ପ୍ରସ୍ତାବ ଦେଇଥିଲେ। ମସ୍କ ଟ୍ରମ୍ପଙ୍କୁ କହିଛନ୍ତି, ମୁଁ ଭାବୁଛି ଏକ ସରକାରୀ ଦକ୍ଷତା ଆୟୋଗ ରହିଲେ ବହୁତ ଭଲ ହେବ, ଯାହା ଟିକସଦାତାଙ୍କ କଠିନ ପରିଶ୍ରମରେ ଅର୍ଜିତ ଅର୍ଥକୁ ଭଲ ଉପାୟରେ ଖର୍ଚ୍ଚ କରିବାକୁ ସୁନିଶ୍ଚିତ କରିବ। ଏଭଳି କମିସନରେ ସାହାଯ୍ୟ କରିବାର ସୁଯୋଗ ପାଇଲେ ମୁଁ ଖୁସି ହେବି ବୋଲି ସେ କହିଛନ୍ତି।

ଜଳବାୟୁ ପରିବର୍ତ୍ତନକୁ ଉପହାସ କଲେ, ସମୁଦ୍ର ପତ୍ତନ ବଢ଼ିଲେ ତଟରେ ସମ୍ପତ୍ତି ବି ବଢ଼ିବ

ୱାସିଂଟନ: ଆମେରିକାର ପୂର୍ବତନ ରାଷ୍ଟ୍ରପତି ତଥା ଚଳିତ ନିର୍ବାଚନର ରିପବ୍ଲିକାନ ରାଷ୍ଟ୍ରପତି ପ୍ରାର୍ଥୀ ଡୋନାଲ୍ଡ ଟ୍ରମ୍ପ ଜଳବାୟୁ ପରିବର୍ତ୍ତନକୁ ନେଇ ଉପହାସ କରିଛନ୍ତି। ଟେସ୍‌ଲା ଓ ‘ଏକ୍ସ’ର ମାଲିକ ଏଲନ୍‌ ମସ୍କଙ୍କ ସହ ଆଲୋଚନା ବେଳେ ଟ୍ରମ୍ପ୍‌ କହିଛନ୍ତି ଏବେ ସମୁଦ୍ର ପତ୍ତନ ବୃଦ୍ଧିକୁ ନେଇ ଅନେକ ଉଦ୍‌ବେଗ ପ୍ରକାଶ କରୁଛନ୍ତି, କିନ୍ତୁ ଏଭଳି ବୃଦ୍ଧି ସମୁଦ୍ର ସମ୍ମୁଖ ସମ୍ପତ୍ତି ମଧ୍ୟ ବଢ଼ାଇବ। ଟ୍ରମ୍ପ୍‌ଙ୍କ ଏଭଳି ଯୁକ୍ତି ପରିବେଶପ୍ରେମୀଙ୍କୁ ବିସ୍ମିତ କରିଛି। ଆଶ୍ଚର୍ଯ୍ୟର କଥା ହେଉଛି, ପ୍ୟାରିସ୍ ଜଳବାୟୁ ଚୁକ୍ତିରୁ ଓହରିଯିବା ନିଷ୍ପତ୍ତିକୁ ନେଇ ୨୦୧୭ରେ ଟ୍ରମ୍ପଙ୍କ ପରାମର୍ଶଦାତା ପରିଷଦରୁ ବିଦାୟ ନେଇଥିବା ଏଲନ୍ ମସ୍କ ଟ୍ରମ୍ପଙ୍କ ମନ୍ତବ୍ୟକୁ ଆଦୌ ଚ୍ୟାଲେଞ୍ଜ କରିନଥିଲେ। ଏହି ନିରବତା ମସ୍କଙ୍କ ପୂର୍ବ ବୟାନର ବିପରୀତ ବୋଲି କୁହାଯାଉଛି। ଏହା ପୂର୍ବରୁ ସେ କହିଥିଲେ ଯେ ଟେସ୍‌ଲା ପୃଥିବୀର ସମସ୍ତ ପ୍ରଜାତିକୁ ପ୍ରଭାବିତ କରୁଥିବା ଜଳବାୟୁ ପରିବର୍ତ୍ତନର ବିପଦକୁ ହ୍ରାସ କରିବାରେ ସାହାଯ୍ୟ କରିବା ପାଇଁ ପ୍ରସ୍ତୁତ ଅଛି। ଅନ୍ୟପଟେ ଟ୍ରମ୍ପ ମସ୍କଙ୍କ ଟେସ୍‌ଲା ନେତୃତ୍ୱକୁ ଦର୍ଶାଇ ଇଲେକ୍ଟ୍ରିକ୍ ଯାନକୁ ନେଇ ନିଜର ସମାଲୋଚନାକୁ ନରମ କରିଛନ୍ତି। ଏବେ ଟ୍ରମ୍ପ ମସ୍କଙ୍କ ସୋସିଆଲ ମିଡିଆ ପ୍ଲାଟଫର୍ମକୁ ଜୋରଦାର ପ୍ରତ୍ୟାବର୍ତ୍ତନ କରିଥିବାରୁ ଆଗାମୀ ଦିନରେ ନିର୍ବାଚନ ପ୍ରଚାର ଏହାକୁ ନେଇ ବେଶ୍‌ ସରଗରମ ହେବ ବୋଲି କୁହାଯାଉଛି।