ୱାସିଂଟନ: ଇରାନ-ଇସ୍ରାଏଲ ସଂଘର୍ଷ ନେଇ ମଧ୍ୟପ୍ରାଚ୍ୟ ଏବେ ଯୁଦ୍ଧମୁହାଁ ହେଉଥିବା ବେଳେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଇରାନକୁ କଡ଼ା ଚେତାବନୀ ଦେଇଛନ୍ତି।  ଆମେରିକାର ସାମରିକ ପ୍ରତିଷ୍ଠାନ ଉପରେ କୌଣସି ଆକ୍ରମଣ କଲେ ଏହାର ଅତି ଭୟାନକ ପରିଣାମ ଇରାନକୁ ଭୋଗିବାକୁ ପଡ଼ିବ ଏବଂ ଇରାନ ନିଶ୍ଚିହ୍ନ ହୋଇଯିବ ବୋଲି ଟ୍ରମ୍ପ କହିଛନ୍ତି । ‘ଯଦି ଇରାନ ଆମ ଉପରେ  କୌଣସି ପ୍ରକାର ଆକ୍ରମଣ କରେ, ତେବେ ଆମେରିକୀୟ ସଶସ୍ତ୍ର ବାହିନୀର ସମ୍ପୂର୍ଣ୍ଣ ଶକ୍ତି ଏବଂ ସାମର୍ଥ୍ୟ ପ୍ରୟୋଗ କରାଯିବ। ଏଭଳି ଭୟାନକ ଆକ୍ରମଣ କରାଯିବ, ଯାହାକି ପୂର୍ବରୁ କେବେ ଇରାନ ଦେଖିନଥିବ’ ବୋଲି ଟ୍ରମ୍ପ ଏକ ବିବୃତିରେ କହିଛନ୍ତି। 

Advertisment

ଇରାନ ଉପରେ ଇସ୍ରାଏଲର ରାତାରାତି ଆକ୍ରମଣରେ ଆମେରିକାର କୌଣସି ଭୂମିକା ନାହିଁ ବୋଲି ଟ୍ରମ୍ପ ତାଙ୍କ ଟ୍ରୁଥ୍ ସୋସିଆଲ ପ୍ଲାଟଫର୍ମରେ ଦାବି କରିଛନ୍ତି । ସେ କହିଛନ୍ତି ଯେ ଇରାନ ଓ ଇସ୍ରାଏଲ ମଧ୍ୟରେ ଏକ ଚୁକ୍ତି ସେ କରି ପାରିବେ ଏବଂ ଏହି ସଂଘର୍ଷର ଅନ୍ତ କରିପାରିବେ। ତେବେ ଏଥିପାଇଁ ଇରାନକୁ ପରମାଣୁ ଚୁକ୍ତିରେ ସାମିଲ ହେବାକୁ ପଡ଼ିବ ବୋଲି ଟ୍ରମ୍ପ କହିଛନ୍ତି। ଅନ୍ୟପକ୍ଷରେ ଇସ୍ରାଏଲ ବିରୋଧରେ ତେହରାନ ‘ଅପରେସନ ଟ୍ରୁ ପ୍ରମିସ୍‌’କୁ ଅଧିକ ବ୍ୟାପକ କରି  ଆଜି ଦିନରେ ବି ପ୍ରଚଣ୍ଡ ଆକ୍ରମଣ କରିଛି ।  ଇରାନ ଉପରେ ଚାଲିଥିବା ଆକ୍ରମଣ ପାଇଁ ଆମେରିକା ହିଁ ଦାୟୀ ବୋଲି ଆଜି ଇରାନ ପୁଣି ଦୋହରାଇଛି।