ତାଜମହଲ ଆମକୁ ବିମୋହିତ କରିଛି, ଏହା ସମୃଦ୍ଧ ଭାରତୀୟ ସଂସ୍କୃତିର ପ୍ରମାଣ : ଟ୍ରମ୍ପ
ନୂଆଦିଲ୍ଲୀ : ମୋଗଲ-ଭାରତୀୟ ଭାସ୍କର୍ଯ୍ୟର ଅପୂର୍ବ ନିଦର୍ଶନ ତାଜମହଲ ପରିଦର୍ଶନ କରି ବିମୋହିତ ହୋଇଯାଇଛନ୍ତି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଓ ତାଙ୍କ ପତ୍ନୀ ମେଲେନିଆ ଟ୍ରମ୍ପ ।
ଏହି ଅବସରରେ ତାଜମହଲ ପରିସରରେ ରଖାଯାଇଥିବା ପରିଦର୍ଶକ ପୁସ୍ତିକାରେ ଟ୍ରମ୍ପ ଦମ୍ପତ୍ତି ସ୍ୱାକ୍ଷର କରିବା ସହ ଲେଖିଛନ୍ତି, “ତାଜମହଲ ଆମକୁ ବିମୋହିତ କରିଛି । ଏହା ସମୃଦ୍ଧ ଓ ବିବିଧତାରେ ପରିପୂର୍ଣ୍ଣ ଭାରତୀୟ ସଂସ୍କୃତିକୁ ଯୁଗେ ଯୁଗେ ପ୍ରମାଣିତ କରିଆସିଛି ।”
ଟ୍ରମ୍ପ ଦମ୍ପତ୍ତିଙ୍କ ତାଜମହଲ ଭ୍ରମଣର ଆଉ ଏକ ନିଆରା କଥା ହେଉଛି ସେମାନେ ପ୍ରସିଦ୍ଧ ଡାଏନା ବେଞ୍ଚ ନିକଟରେ ଛିଡ଼ାହୋଇ ଫଟୋ ଉଠାଇଥିଲେ ମଧ୍ୟ ସେଥିରେ ବସିନଥିଲେ । ୧୯୯୨ ମସିହାରେ ବ୍ରିଟେନର ତତକାଳୀନ ଯୁବରାଣୀ ଡାଏନା ଏକୁଟିଆ ଏଠାରେ ବସି ଫଟୋ ଉଠାଇଥିଲେ । ତାପରଠାରୁ ଏହା ଡାଏନା ବେଞ୍ଚ ଭାବେ ପରିଚିତ ହୋଇଛି । ଭାରତକୁ ଆସୁଥିବା ରାଷ୍ଟ୍ରମୁଖ୍ୟ ଓ ପ୍ରସିଦ୍ଧ ବ୍ୟକ୍ତିମାନେ ଏଠାରେ ବସି ଫଟୋ ଉଠାନ୍ତି ।
Sambad is now on WhatsApp
Join and get latest news updates delivered to you via WhatsApp
ଏହା ପୂର୍ବରୁ ଆଗ୍ରା ଏୟାରବେସରେ ପହଞ୍ଚିବା ପରେ ଟ୍ରମ୍ପଙ୍କୁ ଉତ୍ତରପ୍ରଦେଶ ରାଜ୍ୟପାଳ ଆନନ୍ଦିବେନ ପଟେଲ, ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ପ୍ରମୁଖ ସ୍ୱାଗତ ଜଣାଇଥିଲେ ।
ତାଙ୍କର ଏହି ଗସ୍ତ ପାଇଁ କେନ୍ଦ୍ର ସରକାର ଓ ଉତ୍ତରପ୍ରଦେଶ ସରକାରଙ୍କ ପକ୍ଷରୁ କଡ଼ା ସୁରକ୍ଷା ବ୍ୟବସ୍ଥା କରାଯାଇଛି । ଅନ୍ୟପକ୍ଷରେ ଆଗ୍ରା ସହର ବିଶେଷକରି ତାଜମହଲ ଆଖପାଖରେ ପ୍ରବଳ ମାଙ୍କଡ଼ ଥିବାରୁ ସେମାନେ ଯେପରି ସମସ୍ୟାସୃଷ୍ଟି ନକରନ୍ତି ତାହାଉପରେ ରାଜ୍ୟପ୍ରଶାସନ ବିଶେଷ ଦୃଷ୍ଟି ରଖିଛି । ତାଜମହଲ ଆଖପାଖରେ ଥିବା ବିଭିନ୍ନ କୋଠାର ଛାତରେ ପ୍ରାୟ ୧୨୫ ପୁଲିସକର୍ମୀଙ୍କୁ ମାଙ୍କଡ଼ ଘଉଡ଼ାଇବା କାର୍ଯ୍ୟରେ ନିୟୋଜିତ କରାଯାଇଛି । ଏହା ସହିତ ୫ଟି ଲଙ୍ଗୁର (ହନୁ ମାଙ୍କଡ଼)ଙ୍କୁ ନିୟୋଜିତ କରାଯାଇଛି । ଏହି ଅବସରରେ ସାଧାରଣ ଦର୍ଶକଙ୍କ ପାଇଁ ତାଜମହଲକୁ ବନ୍ଦ ରଖାଯାଇଥିଲା ।