ଟିକେଟ୍ କରିନଥିଲେ ବୋଲି ଟ୍ରେନ୍ ବାହାରକୁ ଠେଲି ଦେଲେ ଟିଟିଇ, ଯାତ୍ରୀ ମୃତ
Sambad is now on WhatsApp
Join and get latest news updates delivered to you via WhatsApp
ଲକ୍ଷ୍ନୌ: ଯାତ୍ରୀଙ୍କୁ ଚଳନ୍ତା ଟ୍ରେନରୁ ବାହାରକୁ ଠେଲିଦେଲେ ଟିଟିଇ । ଟ୍ରେନରୁ ପଡି ଚାଲିଗଲା ଯାତ୍ରୀଙ୍କ ଜୀବନ । ଲକଡାଉନ୍ ସମୟରେ ଲକ୍ଷ୍ନୌରୁ ଘରକୁ ଫେରୁଥିବା ଜଣେ ଯାତ୍ରୀଙ୍କୁ ଚଳନ୍ତା ଟ୍ରେନରୁ ଧକ୍କା ଦିଆଯାଇଥିବାର ଖବର ସାମ୍ନାକୁ ଆସିଛି । ଅଭିଯୋଗ ଅନୁଯାୟୀ, ୫୦୦ ଟଙ୍କା ଚାଲାଣ ବିବାଦକୁ ନେଇ ଜଣେ ଟିଟିଇ, ଚଳନ୍ତା ଟ୍ରେନରୁ ଯାତ୍ରୀଙ୍କୁ ଠେଲି ଦେଇଛନ୍ତି । ଏହାପରେ ଟ୍ରେନରେ ଥିବା ଜିଆରପି ଅଭିଯୁକ୍ତ ଟିଟିଇଙ୍କୁ ଗିରଫ କରି ଆଇନଗତ ପ୍ରକ୍ରିୟା ଆରମ୍ଭ କରିଛନ୍ତି ।
ଜାତୀୟ ଗଣମାଧ୍ୟମରୁ ମିଳିଥିବା ସୂଚନା ଅନୁଯାୟୀ, ସିକନ୍ଦରାବାଦରେ ଚାକିରି କରୁଥିବା ବସନ୍ତଙ୍କର ଲକଡାଉନରେ ଚାକିରି ଚାଲିଯାଇଥିଲା । ଏଥିପାଇଁ ସେ ସିକନ୍ଦରାବାଦ-ଗୋରଖପୁର ସ୍ପେସାଲ ଟ୍ରେନରେ ଘରକୁ ପ୍ରତ୍ୟାବର୍ତ୍ତନ କରୁଥିଲେ । ତେବେ ବ୍ୟସ୍ତତା ଭିତରେ ଟିକେଟ୍ କରିପାରିନଥିଲେ ବସନ୍ତ । ଯେତେବେଳେ ଟିକେଟ୍ ଚେକ୍ କରିବା ପାଇଁ ଟିଟିଇ ପହଞ୍ଚିଥିଲେ, ଟିଟିଇ ୧୫୦୦ ଟଙ୍କା ଜୋରିମାନା ଦେବାକୁ କହିଥିଲେ । କିନ୍ତୁ ବସନ୍ତଙ୍କ ପାଖରେ ମାତ୍ର ୧୦୦୦ ଟଙ୍କା ଥିଲା ।
ତେବେ ୫୦୦ ଟଙ୍କାକୁ ନେଇ ଟିଟିଇ ଏବଂ ବସନ୍ତଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା । ଅଭିଯୋଗ ଅନୁଯାୟୀ, ଟିଟିଇ ବସନ୍ତଙ୍କୁ ମାଡ ମାରିବା ସହ ଚଳନ୍ତା ଟ୍ରେନରୁ ତଳକୁ ଠେଲିଦେଲେ । ଆଉ ଟ୍ରେନ ତଳେ ପଡି ବସନ୍ତଙ୍କର ମୃତ୍ୟୁ ହୋଇଗଲା । ଏହି ଘଟଣା ପରେ ଟ୍ରେନରେ ଉପସ୍ଥିତ ଥିବା ଅନ୍ୟ ଯାତ୍ରୀମାନେ ରାଗିଯାଇଥିଲେ । ଟ୍ରେନର ଚେନ୍ ଟାଣି ଅଟକାଇବା ସହିତ, ଟିଟିଇଙ୍କୁ ନିସ୍ତୁକ ମାଡ଼ ମଧ୍ୟ ମାରିଥିଲେ ।