ଉତ୍ତରକାଶୀ ସୁଡ଼ଙ୍ଗ ଉଦ୍ଧାର ଅଭିଯାନ ଶେଷ ପରେ ଟନେଲ୍ ରେସକ୍ୟୁ ଏକ୍ସପର୍ଟ ଡିକ୍ସ କହିଲେ- ‘ଏହା କେବଳ ଏକ ଚମତ୍କାର ଥିଲା’

ଉତ୍ତରକାଶୀ: ଉତ୍ତରାଖଣ୍ଡର ସିଲ୍‌କିୟାରା ସୁଡ଼ଙ୍ଗ (ଟନେଲ) ଭିତରେ ଦୀର୍ଘ ୧୭ ଦିନ ଧରି ଫସି ରହିଥିବା ସମସ୍ତ ୪୧ ଜଣ ଶ୍ରମିକଙ୍କୁ ସଫଳତାର ସହ ସ୍ଥାନାନ୍ତର କରାଯିବା ପରେ ଅନ୍ତର୍ଜାତୀୟ ଟନେଲିଂ ବିଶେଷଜ୍ଞ ଆର୍ନୋଲ୍‌ଡ ଡିକ୍ସ ବୁଧବାର କହିଛନ୍ତି ଯେ ଉଦ୍ଧାର କାର୍ଯ୍ୟରେ ଏକାଧିକ ଚ୍ୟାଲେଞ୍ଜ ଥିଲେ ମଧ୍ୟ ୪୧ଜଣଙ୍କୁ ବଞ୍ଚାଇବାର ମିଳିତ ଉଦ୍ୟମ ସମସ୍ତ ଚ୍ୟାଲେଞ୍ଜକୁ ଦୂର କରିଛି।

ଉଦ୍ଧାର କାର୍ଯ୍ୟ ସମୟରେ କେଉଁ ପ୍ରକାର ଆହ୍ଵାନର ସମ୍ମୁଖୀନ ହେବାକୁ ପଡିଛି ବୋଲି ପଚରାଯିବାରୁ ଆର୍ନୋଲ୍‌ଡ ଡିକ୍ସ କହିଛନ୍ତି, ‘‘ମୁଁ ଭାବୁଛି ଏହା କହିବା ଭଲ ହେବ ଯେ ଆମର ସବୁଠୁ ବଡ଼ ଆହ୍ବାନ ଥିଲା୪୧ ଜଣଙ୍କୁ ବଞ୍ଚାଇବା।  ଅପରେସନ୍‌ରେ ସାମିଲ ଥିବା ସମସ୍ତଙ୍କର ଗୋଟିଏ ଉଦ୍ଦେଶ୍ୟ ଓ ଲକ୍ଷ୍ୟ ଥିଲା ଫସିଥିବା ଶ୍ରମିକଙ୍କୁ ସୁରକ୍ଷିତ ଭାବେ ଉଦ୍ଧାର କରିବା।’’

ଅପରେସନ ପାଇଁ ସଫଳତାର ମନ୍ତ୍ର ବିଷୟରେ ଅନ୍ତର୍ଜାତୀୟ ଟନେଲିଂ ବିଶେଷଜ୍ଞ କହିଛନ୍ତି ଯେ ସେମାନେ ଶାନ୍ତ ରହିଥିଲେ ଏବଂ ସେମାନେ କ’ଣ ଚାହୁଁଛନ୍ତି ତାହା ସେମାନେ ଠିକ୍‌ ଭାବରେ ଜାଣିଥିଲେ। ଆମେ ଏକ ଚମତ୍କାର ଦଳ ଭାବେ କାମ କରିଥିଲୁ । ଏହି  ଚମତ୍କାର ଦଳରେ ଥିଲେ ଭାରତର ଶ୍ରେଷ୍ଠ ଇଞ୍ଜିନିୟର, ସେନା, ସେମାନଙ୍କର ଇଞ୍ଜିନିୟର, ଯେଉଁମାନଙ୍କ ସହିତ ମିଶି ମୁଁ କାମ କରିଛି, ସମସ୍ତ ଏଜେନ୍‌ସି, ସଂଘୀୟ କର୍ତ୍ତୃପକ୍ଷ, ରାଜ୍ୟ ଏବଂ ସମସ୍ତ ସ୍ଥାନୀୟ ଲୋକ। ଏହି ସଫଳ ଅଭିଯାନରେ ସାମିଲ ହୋଇ ବହୁତ ଖୁସି ଲାଗୁଛି ବୋଲି ସେ କହିଛନ୍ତି।

ଉଦ୍ଧାର ଅଭିଯାନର ସଫଳତା ପରେ ତାଙ୍କ ମନ୍ଦିର ପରିଦର୍ଶନ ବିଷୟରେ ଡିକ୍ସ କହିଛନ୍ତି ଯେ ଫସି ରହିଥିବା ସମସ୍ତ ଶ୍ରମିକଙ୍କ ସୁରକ୍ଷିତ ଉଦ୍ଧାର ଏବଂ ସ୍ଥାନାନ୍ତର ପାଇଁ ଧନ୍ୟବାଦ ଜଣାଇବାକୁ ସେ ଭଗବାନଙ୍କୁ ପ୍ରତିଶ୍ରୁତି ଦେଇଥିଲେ। ସେଥିପାଇଁ ଅପରେସନ୍‌ର ସଫଳତା ପରେ ଈଶ୍ୱରଙ୍କୁ ଧନ୍ୟବାଦ ଜଣାଇବାକୁ ମନ୍ଦିର ଯାଇଥିଲେ। ସେ କହିଛନ୍ତି, ‘ମୁଁ ଭାବୁଛି ଆମେ କେବଳ ଏକ ଚମତ୍କାର ଦେଖିଛୁ।’

ସଫଳ ଉଦ୍ଧାର କାର୍ଯ୍ୟ ପାଇଁ ଅଷ୍ଟ୍ରେଲିଆ ପ୍ରଧାନମନ୍ତ୍ରୀ ତାଙ୍କୁ ଏବଂ ଭାରତୀୟ କର୍ତ୍ତୃପକ୍ଷଙ୍କୁ ଅଭିନନ୍ଦନ ଜଣାଇବା ପରେ ଅନ୍ତର୍ଜାତୀୟ ଟନେଲିଂ ବିଶେଷଜ୍ଞ ପ୍ରତିକ୍ରିୟା ପ୍ରକାଶ କରି କହିଛନ୍ତି, ‘ଧନ୍ୟବାଦ, ପ୍ରଧାନମନ୍ତ୍ରୀ। ଜଣେ ଅଷ୍ଟ୍ରେଲୀୟ ଭାବେ ମୋର ସୌଭାଗ୍ୟ ଯେ ଆମେ ସୁଡ଼ଙ୍ଗ ଉଦ୍ଧାର ସମେତ ଅନ୍ୟାନ୍ୟ କାର୍ଯ୍ୟ ମଧ୍ୟ କରିଥାଉ।’ ଡିକ୍ସ କହିଛନ୍ତି ଯେ ଏହି ଉଦ୍ଧାର କାର୍ଯ୍ୟ ସେ କରିଥିବା ଅନ୍ୟ ଉଦ୍ଧାର କାର୍ଯ୍ୟ ତୁଳନାରେ ଭିନ୍ନ ଥିଲା। କାରଣ ଏହି ଅପରେସନ ସମୟରେ କେହି ଆହତ ହୋଇ ନଥିଲେ, ଯାହା ସାଧାରଣତଃ ଉଦ୍ଧାର କାର୍ଯ୍ୟରେ ହୁଏ ନାହିଁ। ଏହା ବହୁତ ଅଲଗା । ଏହା କେବଳ ଏକ ଚମତ୍କାର ଥିଲା ବୋଲି ସେ କହିଛନ୍ତି।