ଜମ୍ମୁ-କଶ୍ମୀର ଓ ଲେହକୁ ଚୀନର ଅଂଚଳ ଦର୍ଶାଇବା ପ୍ରସଙ୍ଗରେ ଭାରତ ନିକଟରେ କ୍ଷମା ମାଗିଲା ଟ୍ୱିଟର୍
ନୂଆଦିଲ୍ଲୀ : ଭାରତର ଜମ୍ମୁ ଓ କଶ୍ମୀର ଏବଂ ଲେହକୁ ଚୀନର ଅଂଚଳ ବୋଲି ଦର୍ଶାଇଥିବାରୁ ମାଇକ୍ରୋ ବ୍ଲଗିଂ ସାଇଟ୍ ଟ୍ୱିଟର କ୍ଷମା ପ୍ରାର୍ଥନା କରିଛି ।
Sambad is now on WhatsApp
Join and get latest news updates delivered to you via WhatsApp
ଟ୍ୱିଟର ପକ୍ଷରୁ ଭାରତୀୟ ସଂସଦର ବ୍ୟକ୍ତିଗତ ତଥ୍ୟ ସୁରକ୍ଷା ସମ୍ପର୍କିତ ଯୁଗ୍ମ ସଂସଦୀୟ କମିଟି ନିକଟରେ ଏହି କ୍ଷମାପ୍ରାର୍ଥନା କରାଯ଼ାଇଛି । ଟ୍ୱିଟରର ମୁଖପାତ୍ର କହିଛନ୍ତି ଯେ ତାଙ୍କ କମ୍ପାନି ଏହି ପ୍ରସଙ୍ଗର ସଂବେଦନଶୀଳତାକୁ ହୃଦୟଙ୍ଗମ କରୁଛି । କମ୍ପାନି ଭାରତର ଅଖଣ୍ଡତାକୁ ସମ୍ମାନ ଜଣାଏ ।
କିଛି ଦିନ ତଳେ ଏକ ଲାଇଭ ପ୍ରସାରଣ ବେଳେ ଟ୍ୱିଟରରେ ଜମ୍ମୁକଶ୍ମୀର ଓ ଲେହକୁ ଚୀନର ଅଂଚଳ ବୋଲି ଦର୍ଶାଇଥିଲା । ଏହାକୁ ନେଇ ସାରା ଭାରତରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଥିଲା । ଏ ପ୍ରସଙ୍ଗରେ ତୁରନ୍ତ ଏକ ଲିଖିତ କ୍ଷମାପ୍ରାର୍ଥନା କରିବା ସହ ଏକ ସତ୍ୟପାଠ ଦାଖଲ କରିବାକୁ ବ୍ୟକ୍ତିଗତ ତଥ୍ୟ ସୁରକ୍ଷା ସମ୍ପର୍କିତ ଯୁଗ୍ମ ସଂସଦୀୟ କମିଟି ଟ୍ୱିଟରକୁ ନିର୍ଦେଶ ଦେଇଥିଲା ।
କେନ୍ଦ୍ର ଇଲେକ୍ଟ୍ରୋନିକ୍ସ ଓ ସୂଚନାପ୍ରଯ଼ୁକ୍ତି ମନ୍ତ୍ରାଳୟ ପକ୍ଷରୁ ମଧ୍ୟ ଟ୍ୱିଟର ମୁଖ୍ୟ ଜାକ୍ ଡୋରସେଙ୍କୁ ଏକ ପତ୍ର ଲେଖି ଜମ୍ମୁ କଶ୍ମୀର ଓ ଲଦାଖର ରାଜଧାନୀ ଲେହ ଭାରତର ଅଭିନ୍ନ ଅଂଗ ବୋଲି ଦର୍ଶାଇଥିଲା ।