ଆର୍‌ଏମ୍‌ଏଲ୍‌ ହସ୍‌ପିଟାଲ୍‌ରୁ ବାହାରିଲେ ଦୁଇ ବିଜେପି ସାଂସଦ

ନୂଆଦିଲ୍ଲୀ: ଡିସେମ୍ବର ୧୯ରେ ସଂସଦରେ ଠେଲାପେଲା ସମୟରେ ବିରୋଧୀ ଦଳ ନେତା ତଥା କଂଗ୍ରେସ ସାଂସଦ ରାହୁଲ ଗାନ୍ଧୀଙ୍କ ଧକ୍କାରେ ଆହତ ହୋଇଥିବା ଦୁଇ ବିଜେପି ସାଂସଦ ପ୍ରତାପ ଷଡ଼ଙ୍ଗୀ ଓ ମୁକେଶ ରାଜପୁତ ଆଜି ସୁସ୍ଥ ହୋଇ ହସ୍‌ପିଟାଲ୍‌ରୁ ବାହାରିଛନ୍ତି। ଉଭୟ ସାଂସଦଙ୍କ ମୁଣ୍ଡରେ ଆଘାତ ଲାଗିଥିଲା। ସେମାନଙ୍କୁ ରାମ ମନୋହର ଲୋହିଆ (ଆର୍‌ଏମ୍‌ଏଲ୍‌) ହସ୍‌ପିଟାଲ୍‌ରେ ଭର୍ତ୍ତି କରାଯାଇଥିଲା। ହସ୍‌ପିଟାଲ୍‌‌ରୁ ପ୍ରକାଶିତ ସୂଚନାନୁସାରେ, ପ୍ରଥମେ ସେମାନଙ୍କୁ ଆଇସିୟୁରେ ରଖାଯାଇଥିଲା। ଶନିବାର ସାଧାରଣ ପ୍ର କୋଷ୍ଠକୁ ସ୍ଥାନାନ୍ତର କରାଯାଇଥିଲା। 

ସଂପ୍ରତି ଉଭୟ ସାଂସଦଙ୍କ ସ୍ବାସ୍ଥ୍ୟାବସ୍ଥାରେ ସୁଧାର ଆସିଛି। ସେମାନଙ୍କ ସ୍ବାସ୍ଥ୍ୟ ଯାଞ୍ଚ ପରେ ଛାଡ଼ି ଦିଆଯାଇଛି। ପ୍ରତାପ ଷଡ଼ଙ୍ଗୀ (୬୯) ଜଣେ ହୃଦ୍‌ରୋଗୀ ତାଙ୍କ ଛାତିରେ ଷ୍ଟେଣ୍ଟ୍‌ ଲାଗିଛି। ହସ୍‌ପିଟାଲ୍‌କୁ ଆଣିବା ବେଳେ ପ୍ରତାପଙ୍କ ମୁ୍ଣ୍ଡରେ ଗଭୀର ଆଘାତ ଲାଗି ରକ୍ତସ୍ରାବ ଘଟିଥିଲା। ସିଲେଇ କରିବାକୁ ପଡ଼ିଥିଲା । ସେହିଭଳି ସାଂସଦ ରାଜପୁତଙ୍କ ମୁଣ୍ଡରେ ଆଘାତ ଲାଗିଥିଲା ଓ ସେ ତୁରନ୍ତ ଅଚେତ ହୋଇଯାଇଥିଲେ। ତେବେ ହସ୍‌ପିଟାଲ୍‌କୁ ଆଣିବା ବେଳେ ତାଙ୍କର ରକ୍ତଚାପ ବଢ଼ିଯାଇଥିଲା। ଚିକିତ୍ସା ପରେ ସ୍ଥିତିରେ ସୁଧାର ଆସିଥିଲା ବୋଲି ହସ୍‌ପିଟାଲ୍‌ର ଡାକ୍ତର ଏମ୍‌ଏସ୍‌ ଶୁକ୍ଳା କହିଛନ୍ତି। ତେବେ ଉଭୟ ସାଂସଦଙ୍କୁ ନଏଡାର କୈଳାଶ ହସ୍ପିଟାଲକୁ ପଠାଯାଇଥିବା ଚର୍ଚ୍ଚା ହେଉଛି।