ପାର୍କିଂକୁ ନେଇ ଗୋଷ୍ଠୀ ସଂଘର୍ଷ: ଗୁଳିମାଡରେ ୨ ମୃତ

ପାଟନା: ବିହାରର ରାଜଧାନୀ ପାଟନା ନିକଟ ଜେଥୁଲି ଗାଁରେ ରବିବାର ଏକ ଅଭାବନୀୟ ଘଟଣା ଘଟିଛି। ଗାଡି ପାର୍କିଂକୁ ନେଇ ଗୋଷ୍ଠୀ ସଂଘର୍ଷ ହେବାରୁ ଗୁଳିମାଡରେ ୨ଜଣଙ୍କ ଜୀବନ ଯାଇଛି। କେତେକ ଯାନବାହନରେ ନିଆଁ ଲଗାଇ ଦିଆଯାଇଛି। ଫଳରେ କେତେକ କୋଠାରେ ବି ନିଆଁ ଲାଗିଯାଇଛି। ଉକ୍ତ ଘଟଣାରେ ପୋଲିସ ୬ଜଣଙ୍କୁ ଗିରଫ କରିଛି। ଗୁରୁତରମାନଙ୍କୁ ସ୍ଥାନୀୟ ମେଡିକାଲରେ ଭର୍ତ୍ତି କରାଯାଇଛି। ଉତ୍ତେଜନାକୁ ନିୟନ୍ତ୍ରଣ କରାଯାଇଛି ବୋଲି ପାଟନା ଏସଏସପି କହିଛନ୍ତି।

ଗୌତୁମ କୁମାର ନାମକ ଜଣେ ବ୍ୟକ୍ତି ଏକ କୋଠାରେ ହୋଇଥିବା ଘରୋଇ ଗାଡି ପାର୍କିଂ ସ୍ଥାନରୁ ତାଙ୍କ ଗାଡି ବାହାର କରିବା ବେଳେ ଆଉ ଜଣେ ବ୍ୟକ୍ତି ରାସ୍ତାରେ କିଛି ସାମଗ୍ରୀ ତାଙ୍କ ଗାଡିରୁ ଅନଲୋଡ କରୁଥିଲେ। ଗାଡି ଯିବାକୁ ବାଧା ଉପୁଜିବାରୁ ଗୌତମ ଉକ୍ତ ଗାଡିକୁ ବାହାର କରିବାକୁ ଅନୁରୋଧ କରିଥିଲେ। ଫଳରେ ଉମେଶ ରାୟ ନାମକ ଜଣେ ବ୍ୟକ୍ତିଙ୍କ ସହିତ ବଚସା ହେବାରୁ ଉମେଶ ହଠାତ ଗୁଳି ଚଳାଇଥିଲେ। ପରେ ଉଭୟ ଗୋଷ୍ଠୀ ପକ୍ଷରୁ ସଂଘର୍ଷ ଉପୁଜିଥିଲା। ଏଥିରେ ଚାନାରିକ ରାୟ, ମୁନାରିକ ରାୟ, ରୋଶନ ରାୟ, ଗୌତମ କୁମାର ଏବଂ ନଗେନ୍ଦ୍ର ରାୟ ଗୁରୁତର ହୋଇଥିଲେ। ସମସ୍ତଙ୍କୁ ମେଡିକାଲକୁ ନିଆଯାଇଥିବାବେଳେ ଗୌତମ କୁମାର ଏବଂ ରୋଶନ ରାୟଙ୍କ ଚିକିତ୍ସାଧୀନ ଅବସ୍ଥାରେ ମୃତ୍ୟୁ ହୋଇଥିବା ପୋଲିସ କହିଛି। ପୋଲିସ ତଦନ୍ତ ଜାରି ରହିଛି।