ମୁମ୍ବାଇ : ଲାବରେଟୋରି ରିପୋର୍ଟରେ ଗୋଟିଏ ଛୋଟିଆ ତ୍ରୁଟି ଯୋଗୁଁ ଜଣେ ନାଇଜେରିଆ ନାଗରିକଙ୍କୁ ଭାରତୀୟ ଜେଲରେ ୧୮ ମାସ କଟାଇବାକୁ ପଡ଼ିଲା । ଏପରି ଘଟଣା ଘଟିଛି ମହାରାଷ୍ଟ୍ରରେ ।
Sambad is now on WhatsApp
Join and get latest news updates delivered to you via WhatsApp
୨୭ ବର୍ଷୀୟ ନାଇଜେରୀୟ ଯୁବକଙ୍କୁ ଗତ ୨୦୨୦ ଅକ୍ଟୋବର ମାସ ୨୩ ତାରିଖରେ ମହାରାଷ୍ଚ୍ର ପୁଲିସର ଏଟିଏସ ଗିରଫ କରିଥିଲା । ତାଙ୍କ ପାଖରୁ ମିଳିଥିବା ସାମଗ୍ରୀକୁ କେମିକାଲ ଆନାଲିସିସ ପାଇଁ ପଠାଯାଇଥିଲା । କେମିକାଲ ଆନାଲିସିସ ରିପୋର୍ଟରେ ତାହା କୋକେନ ବା ଏକଟାସି ନ ଥିଲା ବୋଲି ଜଣାପଡ଼ିଥିଲା । କିନ୍ତୁ ଫୋରେନସିକ ଲାବରେଟୋରୀର ସହକାରୀ ନିର୍ଦ୍ଦେଶକ ନିଜ ରିପୋର୍ଟରେ ଭୁଲରେ ଉକ୍ତ ସାମଗ୍ରୀ ଏନଡିପିଏସ ଆଇନ ଅଧିନରେ ଆସୁଥିବା ବୋଲି ଦର୍ଶାଇଥିଲେ । କିନ୍ତୁ ପ୍ରକୃତରେ ତାଙ୍କର କୌଣସି ନିଷିଦ୍ଧ ସାମଗ୍ରୀ ମିଳିନଥିଲା ।
ମାମଲାର ବିଚାର କରି ବମ୍ବେ ହାଇକୋର୍ଟ ବୁଧବାରଦିନ ତାଙ୍କୁ ମୁକ୍ତ କରିବା ସହ କ୍ଷତିପୂରଣ ଦେବାକୁ ମହାରାଷ୍ଟ୍ର ସରକାରଙ୍କୁ ନିର୍ଦ୍ଦେଶ ଦେଇଛନ୍ତି । ଆସନ୍ତା ଅଗଷ୍ଟ ୧୨ ସୁଦ୍ଧା ମହାରାଷ୍ଟ୍ର ସରକାର କ୍ଷତିପୂରଣ ରାଶି ସଂପର୍କରେ ନିଷ୍ପତ୍ତି ନ ନେଲେ କୋର୍ଟ ନିଜେ କ୍ଷତିପୂରଣ ରାଶି ଘୋଷଣା କରିବେ ବୋଲି ହାଇକୋର୍ଟର ବିଚାରପତି ଜଷ୍ଟିସ ଭାରତୀ ଡାଙ୍ଗରେ କହିଛନ୍ତି ।
ବୁଧବାର ଦିନ ଅନୁଷ୍ଠିତ ମାମଲାରେ ଶୁଣାଣି ବେଳେ ବମ୍ବେ ହାଇକୋର୍ଟ ସଂପୃକ୍ତ ଯୁବକଠାରୁ ମିଳିଥିବା ସାମଗ୍ରୀର ସତ୍ୟତା ଜାଣିବାକୁ ଚାହିଁଥିଲେ । ଏହି ସମୟରେ ସରକାରୀ ଓକିଲ ଜଣାଇଥିଲେ ଯେ ଫୋରେନସିକ ଲାବରୋଟୋରୀ ରିପୋର୍ଟରେ ସାମାନ୍ୟ ମୁଦ୍ରଣଗତ ତ୍ରୁଟି ରହିଥିଲା ।