ୟୁକ୍ରେନ୍‌ର ଦାବି: ଯୁଦ୍ଧରେ ୬ଲକ୍ଷ ୫୦ହଜାରରୁ ଅଧିକ ରୁଷୀୟ ସୈନିକ ନିହତ

କିବ୍: ୨୦୨୨ ଫେବ୍ରୁଆରି ୨୪ରେ ୟୁକ୍ରେନ ଉପରେ ଆକ୍ରମଣ ଆରମ୍ଭ ହେବା ପରଠାରୁ ଅଦ୍ୟାବଧି ରୁଷ୍ ୬,୫୧,୮୧୦ ସୈନିକଙ୍କୁ ହରାଇଛି ବୋଲି ୟୁକ୍ରେନ ସଶସ୍ତ୍ର ବାହିନୀର ଜେନେରାଲ ଷ୍ଟାଫ୍ କହିଛନ୍ତି। ସେପ୍ଟେମ୍ବର ୨୯ରେ ପ୍ରକାଶିତ ଏହି ରିପୋର୍ଟରେ ଗୋଟିଏ ଦିନରେ ୧୧୭୦ ରୁଷୀୟ ମୃତାହତ ହୋଇଥିବା ଉଲ୍ଲେଖ କରାଯାଇଛି। ସୈନ୍ୟଙ୍କ ମୃତ୍ୟୁ ବ୍ୟତୀତ ରୁଷିଆ ୮,୮୬୯ଟି ଟ୍ୟାଙ୍କ, ୧୭,୪୭୬ଟି ଯୁଦ୍ଧଯାନ, ୨୫,୪୯୫ଟି ଯାନ ଓ ଇନ୍ଧନ ଟ୍ୟାଙ୍କ ହରାଇଛି ବୋଲି ରିପୋର୍ଟରେ କୁହାଯାଇଛି। ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ କ୍ଷୟକ୍ଷତି ମଧ୍ୟରେ ୧୮,୭୯୫ ଆର୍ଟିଲେରି ସିଷ୍ଟମ୍, ୧,୨୦୪ ମଲ୍ଟିପଲ୍ ଲଞ୍ଚ ରକେଟ୍ ସିଷ୍ଟମ୍, ୯୬୨ ଏୟାର୍ ଡିଫେନ୍ସ ସିଷ୍ଟମ୍, ୩୬୯ ବିମାନ, ୩୨୮ ହେଲିକପ୍ଟର, ୧୬,୧୮୬ ଡ୍ରୋନ୍, ୨୮ଟି ଜାହାଜ ଓ ଡଙ୍ଗା ଓ ଗୋଟିଏ ବୁଡ଼ାଜାହାଜ ରହିଛି।

ୟୁକ୍ରେନ ରାଷ୍ଟ୍ରପତି ବୋଲଡିମିର ଜେଲେନସ୍କିଙ୍କ କାର୍ଯ୍ୟାଳୟର ମୁଖ୍ୟ ଆଣ୍ଡ୍ରି ୟେରମାକ୍ ରୁଷ୍ ବେସାମରିକ ଜନସାଧାରଣଙ୍କୁ ଆତଙ୍କିତ କରିବାକୁ ଚେଷ୍ଟା କରୁଛି ବୋଲି ଅଭିଯୋଗ କରିଛନ୍ତି। ରୁଷ୍‌ର କ୍ଷେପଣାସ୍ତ୍ର ଆକ୍ରମଣକୁ ରୋକିବା ପାଇଁ ଅତ୍ୟାଧୁନିକ ଅସ୍ତ୍ରଶସ୍ତ୍ର ସମେତ ପାଶ୍ଚାତ୍ୟ ସହଯୋଗୀଙ୍କ ସାମରିକ ସମର୍ଥନ ବୃଦ୍ଧି ପାଇଁ ସେ ଆହ୍ୱାନ ଦେଇଛନ୍ତି। ୟୁକ୍ରେନର ସେନାକୁ ସମର୍ଥନ କରିବା ପାଇଁ ଡେନମାର୍କ ୧୯୪ ନିୟୁତ ଡଲାର ଦେବାକୁ ପ୍ରତିଶ୍ରୁତି ଦେଇଥିବା ବେଳେ ନରୱେ ସୀମା ସୁରକ୍ଷା ବ୍ୟବସ୍ଥା ଉପରେ ବିଚାର କରୁଛି। ଏହା ପୂର୍ବରୁ ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ‘ଟ୍ରମ୍ପ ଟାୱାର’ଠାରେ ୟୁକ୍ରେନର ରାଷ୍ଟ୍ରପତି ବୋଲଡିମିର ଜେଲେନସ୍କିଙ୍କୁ ଭେଟି ୟୁକ୍ରେନରେ ଯୁଦ୍ଧ ଶେଷ କରିବା ଉପରେ ଗୁରୁତ୍ୱାରୋପ କରିଥିଲେ। ଜେଲେନସ୍କି ଟ୍ରମ୍ପଙ୍କୁ ୟୁକ୍ରେନ ଗସ୍ତ ପାଇଁ ନିମନ୍ତ୍ରଣ କରିଥିବା ବେଳେ ରିପବ୍ଲିକାନ ରାଷ୍ଟ୍ରପତି ପ୍ରାର୍ଥୀ ଦାବି କରିଛନ୍ତି ଯେ ଯଦି ପୁନର୍ବାର ନିର୍ବାଚିତ ହୁଅନ୍ତି ତେବେ ବିବାଦର ଶୀଘ୍ର ସମାଧାନ କରିପାରିବେ।