ରୁଷୀୟ ଯବାନଙ୍କ ମା’ମାନଙ୍କୁ ଆକୁଳ ନିବେଦନ କଲେ ୟୁକ୍ରେନ ରାଷ୍ଟ୍ରପତି, କହିଲେ…..

ନୂଆଦିଲ୍ଲୀ: ୟୁକ୍ରେନ ରାଷ୍ଟ୍ରପତି ଭୋଲୋଦିମିର ଜେଲେନସ୍କି କଲେ ଆକୁଳ ନିବେଦନ। ଶାନ୍ତି ଆଲୋଚନା ବିଫଳ ପରେ ରୁଷ ସେନା ଆକ୍ରମଣ ତୀବ୍ର କରିଥିବା ‌ବେଳେ ଏବେ ଜେଲେନସ୍କି ରୁଷୀୟ ଯବାନଙ୍କ ପରିବାରକୁ ଏକ ନିବେଦନ କରିଛନ୍ତି। ଜେଲେନସ୍କି ସୈନିକମାନଙ୍କ ମା’ମାନଙ୍କୁ ନିବେଦନ କରିଛନ୍ତି ଯେ, ୟୁକ୍ରେନ ଉପରେ ଆକ୍ରମଣ କରିବାକୁ ନିଜ ପୁଅମାନଙ୍କୁ ପଠାନ୍ତୁ ନାହିଁ।

ଜେଲେନସ୍କି କହିଛନ୍ତି ଯେ, ମୁଁ ପୁଣି ଥରେ ରୁଷିଆର ମା’ମାନଙ୍କୁ ବିଶେଷକରି ସୈନିକମାନଙ୍କ ମା’ମାନଙ୍କୁ କହିବାକୁ ଚାହୁଁଛି ଯେ ସେମାନଙ୍କ ପିଲାମାନଙ୍କୁ ୟୁକ୍ରେନକୁ ଯୁଦ୍ଧ କରିବା ପାଇଁ ପଠାନ୍ତୁ ନାହିଁ। ଆପଣଙ୍କ ପୁଅ କେଉଁଠାରେ ଅଛି ତାହା ଜାଣନ୍ତୁ। ଯଦି ଆପଣଙ୍କୁ ଲାଗୁଛି ଯେ ଆପଣଙ୍କ ପୁଅକୁ ୟୁକ୍ରେନ ବିରୋଧରେ ଯୁଦ୍ଧ କରିବାକୁ ପଠାଯାଉଛି, ତେବେ ତୁରନ୍ତ ରୋକନ୍ତୁ।

ବୁଧବାର ରୁଷ ପ୍ରଥମ ଥର ପାଇଁ ସ୍ୱୀକାର କରିଥିଲା ଯେ ରୁଷର ଅନେକ ସୈନିକଙ୍କୁ ବନ୍ଦୀ କରାଯାଇଛି। ଯେତେବେଳେ ଦେଶର ସମସ୍ତ ମହିଳା ସୋସିଆଲ ନେଟୱାର୍କରେ ନିଜ ପୁଅମାନଙ୍କୁ ୟୁକ୍ରେନକୁ ପଠାଯିବାର ଖବର ଦେଇଥିଲେ ସେତେବେଳେ ରୁଷ ଏହି ସୂଚନା ଦେଇଥିଲା। ଗତ ସପ୍ତାହରେ ୟୁକ୍ରେନ ଆସି ରୁଷର ସୈନିକମାନଙ୍କୁ ନେବା ପାଇଁ ସେମାନଙ୍କ ମା’ଙ୍କୁ କହିଥିଲେ ୟୁକ୍ରେନ ସରକାର। ଏହା ପରେ ୟୁକ୍ରେନ ପ୍ରତିରକ୍ଷା ମନ୍ତ୍ରାଳୟ ଫୋନ୍ ନମ୍ବର ଏବଂ ଏକ ଇମେଲ୍ ପ୍ରକାଶ କରିଥିଲା ​​ଯାହା ମାଧ୍ୟମରେ ବନ୍ଦୀ ଥିବା ରୁଷୀୟ ସୈନ୍ୟମାନଙ୍କ ପରିବାର ସେମାନଙ୍କ ବିଷୟରେ ସୂଚନା ପାଇପାରିବେ।

ଉଲ୍ଲେଖଯୋଗ୍ୟ, ପ୍ରାୟ ତିନି ସପ୍ତାହ ଧରି ୟୁକ୍ରେନ ଏବଂ ରୁଷ ମଧ୍ୟରେ ଏକ ଭୟଙ୍କର ଯୁଦ୍ଧ ଲାଗି ରହିଛି। ରୁଷ କ୍ରମାଗତ ଭାବରେ ୟୁକ୍ରେନର ଅନେକ ସହର ଉପରେ ବୋମା ଏବଂ କ୍ଷେପଣାସ୍ତ୍ର ମାଡ କରୁଛି । ବର୍ତ୍ତମାନ ପର୍ଯ୍ୟନ୍ତ ୟୁକ୍ରେନର ପ୍ରାୟ ଦୁଇ ଲକ୍ଷ ଲୋକ ଯୁଦ୍ଧ ହେତୁ ଅନ୍ୟ ଦେଶରେ ଆଶ୍ରୟ ନେଇଥିବାବେଳେ ଶହ ଶହ ଲୋକ ପ୍ରାଣ ହରାଇଛନ୍ତି।