ନୂଆଦିଲ୍ଲୀ : ୟୁକ୍ରେନର ରାଜଧାନୀ କିବରେ ପୁଣି ଥରେ ଖୋଲିବ ଭାରତୀୟ ଦୂତାବାସ । ରୁଷ ଆକ୍ରମଣ ଯୋଗୁଁ ଗତ ମାର୍ଚ୍ଚ ୧୩ରେ ଏହି ଦୂତାବାସକୁ ଅସ୍ଥାୟୀଭାବେ ବନ୍ଦ କରି ପୋଲାଣ୍ଡର ରାଜଧାନୀ ଓ୍ବାର୍ସାକୁ ଉଠାଇ ନିଆଯାଇଥିଲା । ମେ ୧୭ରେ କିବରେ ଥିବା ଭାରତୀୟ ଦୂତାବାସ ଖୋଲିବ ବୋଲି ଭାରତୀୟ ବୈଦେଶିକ ମନ୍ତ୍ରାଳୟ ପକ୍ଷରୁ ସୂଚନା ଦିଆଯାଇଛି ।
Sambad is now on WhatsApp
Join and get latest news updates delivered to you via WhatsApp
ଯୁଦ୍ଧର ପ୍ରଥମ ଭାଗରେ ରୁଷ ପକ୍ଷରୁ କିବକୁ ଅଧିକାର ପାଇଁ ଘନ ଘନ ଆକ୍ରମଣ କରାଯାଉଥିବାବେଳେ ଗତ ମାସରେ ରୁଷ ସେନା ନିଜର ରଣନୀତି ବଦଳାଇଥିଲା ଓ କିବ ଉପରେ ଆକ୍ରମଣ ବନ୍ଦ କରି ପୂର୍ବ ଓ ଦକ୍ଷିଣ ୟୁକ୍ରେନ ଉପରେ ଫୋକସ କରାଯାଇଥିଲା । ବିଶେଷ କରି ଓଡେସା ବନ୍ଦର, ମାରିୟୁପୋଲ ଆଦି ସହରରେ ନିଜର ନିୟନ୍ତ୍ରଣକୁ ଦୃଢ କରିବା ଉପରେ ରୁଷ ଗୁରୁତ୍ବ ଦେଉଛି । କିବରେ ଆକ୍ରମଣ ବନ୍ଦ ହୋଇଯାଇଥିବାରୁ ସେଠାରେ ଧୀରେ ଧୀରେ ସ୍ଥିତି ସ୍ବାଭାବିକ ହେଉଛି । ଏହା ସହିତ ୟୁକ୍ରେନ ସେନା ବି ସେଠାରେ ନିଜର ନିୟନ୍ତ୍ରଣକୁ ଦୃଢ କରିଛି । ଏହି କାରଣରୁ ସେଠାରେ ପୁଣି ଭାରତୀୟ ଦୂତାବାସ ଖୋଲିବାକୁ ନିଷ୍ପତ୍ତି ନିଆଯାଇଛି ।
ନିକଟରେ ଜାତିସଂଘ ମହାସଚିବ ଆଣ୍ଟୋନିଓ ଗୁଟେରେସ ଓ କାନାଡାର ପ୍ରଧାନମନ୍ତ୍ରୀ ଜଷ୍ଟିନ ଟ୍ରୁଡୋ କିବ ପ୍ରରିଦର୍ଶନ କରି ସେଠାରେ ରୁଷ ସେନା ପକ୍ଷରୁ କରାଯାଇଥିବା ଧ୍ବଂସଲୀଳା ଗଣହତ୍ୟା ଦେଖିଥିଲେ ।