ଆସାମ : ଯୁଦ୍ଧବିରତିକୁ ଆଉ ତିନିମାସ ପାଇଁ ବଢାଇଲା ଉଲଫା
ଗୁଆହାଟୀ : ନିଷିଦ୍ଧ ଘୋଷିତ ବିଛିନ୍ନତାବାଦୀ ସଂଗଠନ ଉଲଫା (ସ୍ବାଧୀନ) ନିଜର ଯୁଦ୍ଧ ବିରତିକୁ ଆଉ ତିନିମାସ ପାଇଁ ବଢାଇଦେଇଛି । କରୋନା ମହାମାରୀକୁ ଦୃଷ୍ଟିରେ ରଖି ଏହି ନିଷ୍ପତ୍ତି ନିଆଯାଇଥିବା ଉଲଫା ପକ୍ଷରୁ କୁହାଯାଇଛି ।
Sambad is now on WhatsApp
Join and get latest news updates delivered to you via WhatsApp
ଉଲଫା କମାଣ୍ଡର–ଇନ–ଚିଫ ପରେଶ ବରୁଆ ଗଣମାଧ୍ୟମକୁ ଏକ ଇମେଲ କରି କହିଛନ୍ତି ଯେ ଆସାମରେ ମହାମାରୀ ସ୍ଥିତି ଏବେ ବି ସୁଧୁରି ନାହିଁ । ମହାମାରୀ ଯୋଗୁଁ ଲୋକମାନେ ସମସ୍ୟାର ସମ୍ମୁଖୀନ ହେଉଛନ୍ତି । ନିଜର ସାମାଜିକ ଦାୟିତ୍ବକୁ ନିର୍ବାହ କରି ଯୁଦ୍ଧବିରତିକୁ ଆଉ ତିନି ମାସ ପାଇଁ ବଢାଇବାକୁ ନିଷ୍ପତ୍ତି ନିଆଯାଇଛି । ଏହି ସମୟରେ କୌଣସି ଅପରେସନ କରାଯିବ ନାହିଁ ।
ଆସାମରେ ଗତ ମେ 15 ଠାରୁ ଉଲଫା ଓ ସୁରକ୍ଷାବାହିନୀ ମଧ୍ୟରେ ଯୁଦ୍ଧ ବିରତି ଚାଲୁ ରହିଛି । ଯୁଦ୍ଧବିରତି ସଂପ୍ରସାରଣକୁ ଆସାମ ମୁଖ୍ୟମନ୍ତ୍ରୀ ହେମନ୍ତ ବିଶ୍ବଶର୍ମା ସ୍ବାଗତ କରିବା ସହ ଏହା ଏକ ଉତ୍ସାହଜନକ ଘଟଣା ବୋଲି କହିଛନ୍ତି । ସେହିପରି ଆସନ୍ତା ଅଗଷ୍ଟ 15 ପାଇଁ ବି ଉଲଫା ବନ୍ଦ ଡାକରା ଦେଇନାହିଁ । ଏହା ଏକ ସକାରାତ୍ମକ ପଦକ୍ଷେପ । ଅସ୍ଥାୟୀ ଯୁଦ୍ଧବିରତି ସ୍ଥାୟୀ ହେଉ ଓ ଉଲଫା ଅସ୍ତ୍ରଛାଡ଼ି ମୁଖ୍ୟଧାରାରେ ସାମିଲ ହେଉ ବୋଲି ସେ କହିଛନ୍ତି ।