ନୂଆଦିଲ୍ଲୀ: ବିବାଦୀୟ ବୟାନ ଦେଇ ବିଜେପିରୁ ନିଲମ୍ବିତ ହୋଇଥିବା ମୁଖପାତ୍ର ନୁପୁର ଶର୍ମାଙ୍କ ବାବଦରେ ବଡ ବୟାନ ଦେଇଛନ୍ତି ବିଜେପିର ଫାୟାର ବ୍ରାଣ୍ଡ ନେତ୍ରୀ ଉମାଭାରତୀ | ଉମା ନୁପୁରଙ୍କ ସମର୍ଥନରେ ବାହାରିଥିବାବେଳେ ସେ କହିଛନ୍ତି ଯେ ତାଙ୍କ ବୟାନ ପାଇଁ ଦଳ ତାଙ୍କ ବିରୋଧରେ ସଠିକ୍ କାର୍ଯ୍ୟାନୁଷ୍ଠାନ ଗ୍ରହଣ କରିଛି, କିନ୍ତୁ ଏହା ସତ୍ତ୍ୱେ ଆମେ ସମସ୍ତେ ନୁପୁରଙ୍କ ସହିତ ଛିଡ଼ା ହେବା ଉଚିତ୍ | ଉମାଭାରତୀ ଖୋଲାଖୋଲି ଭାବେ କହିଛନ୍ତି ଯେ ନୁପୁରଙ୍କୁ ଦିଆଯାଉଥିବା ଧମକକୁ ଦୃଷ୍ଟିରେ ରଖି ମୁସଲିମ ନେତାମାନେ ମଧ୍ୟ ତାଙ୍କ ସପକ୍ଷରେ ଠିଆ ହେବା ଉଚିତ। ଧର୍ମ ବିରୁଦ୍ଧରେ କଥା କହିଥିବାରୁ ଦଳ ଠିକ୍ ପଦକ୍ଷେପ ନେଇଛି ।
Sambad is now on WhatsApp
Join and get latest news updates delivered to you via WhatsApp
ତେବେ ନୁପୁର ଶର୍ମାଙ୍କୁ ହତ୍ୟା କରିବାର ଧମକକୁ ନେଇ ବିଜେପି ନେତ୍ରୀ ଉମାଭାରତୀ ଉଦବେଗ ପ୍ରକାଶ କରିଛନ୍ତି। ସେ କହିଛନ୍ତି ଯେ ନୁପୁରଙ୍କୁ ହତ୍ୟା ଧମକ ଦେବା ଭୁଲ ଓ ଏହା ଆମ ସମାଜର ପରମ୍ପରା ନୁହେଁ | ସେ କହିଛନ୍ତି, “ମୁସଲମାନ ନେତା ଏବଂ ଆମେ ସମସ୍ତେ ଏବେ ତାଙ୍କ ସହିତ ଛିଡ଼ା ହେବା ଉଚିତ୍ | ତାଙ୍କୁ ଗଧିଆମାନଙ୍କ ଗହଳିକୁ ଫିଙ୍ଗି ଦିଆଯିବା ଉଚିତ୍ ନୁହେଁ। ”
ସୂଚନା ଥାଉ କି ନିକଟ ଅତୀତରେ ଜ୍ଞାନବାପି ମସ୍ଜିଦ୍ ମାମଲାରେ ଏକ ଟେଲିଭିଜନ୍ ଚାନେଲ୍ରେ ସମ୍ବାଦ ବିତର୍କ ଚାଲିଥିବା ବେଳେ ବିଜେପିର ମୁଖପାତ୍ର ନୁପୁର ଶର୍ମା ମହାପୁରୁଷ ମହମ୍ମଦଙ୍କ ସଂକ୍ରାନ୍ତରେ ଅସମ୍ମାନଜନକ ମନ୍ତବ୍ୟ ଦେଇଥିଲେ | ଆଉ ଏହା ପରେ ବିଜେପି ତାଙ୍କୁ ଦଳର ପ୍ରାଥମିକ ସଦସ୍ୟତାରୁ ନିଲମ୍ବନ କରିଥିଲା | ସେହିପରି ତାଙ୍କର ଏପରି ବୟାନ ହେତୁ ଉପସାଗରୀୟ ରାଷ୍ଟ୍ରମାନଙ୍କ ମଧ୍ୟରେ ଅସନ୍ତୋଷ ବ୍ୟାପିବାରେ ଲାଗିଥିଲା । ଏଭଳି ଟିପ୍ପଣୀର ନିନ୍ଦା କରିବା ସହିତ କାର୍ଯ୍ୟାନୁଷ୍ଠାନ ଲାଗି ସେମାନେ ଭାରତ ସରକାର ଉପରେ ଚାପ ପକାଇବା ଆରମ୍ଭ କରିଦେଇଛନ୍ତି।