ଜାତିସଂଘ ରିପୋର୍ଟ: ଭାରତ ସୀମାରେ ଆଶ୍ରୟ ନେବାକୁ ଚାହୁଥିଲେ ୪ ହଜାର ବାଂଲାଦେଶୀ ହିନ୍ଦୁ

ନୂଆଦିଲ୍ଲୀ: ବାଂଲାଦେଶରେ ଗତବର୍ଷ ଅଗଷ୍ଟ ୫ ତାରିଖରେ ଶେଖ୍‌ ହସିନାଙ୍କ ସରକାରର ପତନ ହେବାର ୩ ଦିନ ପରେ ବାଂଲାଦେଶରେ ସଂଖ୍ୟାଲଘୁ ହିନ୍ଦୁଙ୍କ ଉପରେ ବର୍ବର ଆକ୍ରମଣ ଆରମ୍ଭ ହୋଇଥିଲା। ଗତବର୍ଷ ଅଗଷ୍ଟରେ ବାଂଲାଦେଶରେ ୫  ହିନ୍ଦୁଙ୍କୁ ହତ୍ୟା ସମେତ ହିନ୍ଦୁଙ୍କ ଉପରେ ୨୦୦ରୁ ଅଧିକ ଥର ଆକ୍ରମଣ ହୋଇଥିବା ଏକ ରିପୋର୍ଟରୁ ଜଣାପଡ଼ିଛି। ତେ‌ବେ ହିନ୍ଦୁଙ୍କ ଉପରେ ଟାର୍ଗେଟ୍‌ ଆକ୍ରମଣ ରିପୋର୍ଟକୁ ୟୁନୁସ୍‌ ସରକାର କେବଳ ଏକ ପ୍ରଚାର କହି ଖଣ୍ଡନ କରିଥିଲେ। କିନ୍ତୁ ଜାତିସଂଘ ରିପୋର୍ଟ ଆକ୍ରମଣ ପରବର୍ତ୍ତୀ ତଥ୍ୟ ସାମ୍ନାକୁ ଆଣିଛି।  

ଜାତିସଂଘ ରିପୋର୍ଟ କହୁଛି ଯେ ସେ ସମୟରେ ବାଂଲାଦେଶରେ  ଆକ୍ରମଣର ଶିକାର ହୋଇଥିବା ହିନ୍ଦୁମାନଙ୍କୁ କେଉଁଠାରୁ କିଛି ଆଶ୍ବସ୍ତି ମିଳିନଥିଲା। ଏପରିକି ଭାରତ-ବାଂଲାଦେଶ ସୀମା ନିକଟରେ ସେମାନେ ସୁରକ୍ଷା ପାଇଁ ଚାହିଥିଲେ ସୁଦ୍ଧା ସେମାନଙ୍କୁ ଭାରତର ବିଏସ୍‌ଏଫ୍‌ (ସୀମା ସୁରକ୍ଷା ବାହିନୀ) ଘଉଡ଼ାଇ ଦେଇଥିବା ରିପୋର୍ଟ କହୁଛି।  ଜାତିସଂଘ ତଥ୍ୟ ସନ୍ଧାନକାରୀ ଟିମ୍‌ ଦ୍ବାରା ବାଂଲାଦେଶରେ କରାଯାଇଥିବା ସାକ୍ଷାତକାରକୁ ଆଧାର କରି ଏହି ରିପୋର୍ଟ ପ୍ରସ୍ତୁତ ହୋଇଛି।   ପ୍ରତ୍ୟକ୍ଷଦର୍ଶୀ ତଥା ସାକ୍ଷୀମାନେ ଜାତିସଂଘ ତଥ୍ୟ ସନ୍ଧାନକାରୀ ଟିମ୍‌କୁ କହିଥିଲେ ଯେ ପ୍ରାୟ ୪ ହଜାର ହିଂସା ପୀଡ଼ିତ ହିନ୍ଦୁ ଭାରତୀୟ ସୀମା ନିକଟରେ ଶରଣ ନେବାକୁ ଚାହିଥିଲେ।  କିନ୍ତୁ ବିଏସଏଫ୍‌ ସେମାନଙ୍କୁ କୌଣସି ସହାୟତା ଦେବାକୁ ମନା କରିଦେଇଥିଲା। 

ମିଳିଥିବା ସୂଚନାନୁଯାୟୀ ଠାକୁରଗାଓଁରେ ହିନ୍ଦୁ ମନ୍ଦିର ଏବଂ ଶ୍ମଶାନ ଭଙ୍ଗାରୁଜା ଏବଂ ଆକ୍ରମଣ ହୋଇଥିଲା।  ସେ ସମୟରେ ସାମ୍ପ୍ରଦାୟିକ ହିଂସା ଭୟ‌ରେ ପ୍ରାୟ ୪,୦୦୦ ହିନ୍ଦୁ ଭାରତୀୟ ସୀମା ନିକଟରେ ଆଶ୍ରୟ ନେବାକୁ ଚାହିଥିଲେ।  ଜାତିସଂଘ ରିପୋର୍ଟ ‘ ହ୍ୟୁମାନ ରାଇଟ୍‌ସ ଭାଓଲେସନ୍ସ ଆଣ୍ଡ୍‌ ଆବ୍ୟୁଜେସ୍‌ ରିଲେଟେଡ୍‌ ଟୁ ଦି ପ୍ରୋଟେଷ୍ଟ୍‌ସ ଅଫ୍‌ ଜୁଲାଇ ଆଣ୍ଡ୍‌ ଅଗଷ୍ଟ ୨୦୨୪ ଇନ୍‌ ବାଂଲାଦେଶ’ ରେ ଏ ବାବଦ ବିସ୍ତୃତ ତଥ୍ୟ ପ୍ରଦାନ କରାଯାଇଛି।