ନୂଆଦିଲ୍ଲୀ : କେନ୍ଦ୍ର କ୍ୟାବିନେଟ ବୁଧବାରଦିନ ସମଗ୍ର ଶିକ୍ଷା ଯୋଜନା ୨.୦କୁ ମଂଜୁରୀ ଦେଇଛି । ଏହି ଯୋଜନା ୧ ଏପ୍ରିଲ ୨୦୨୧ରୁ ଆରମ୍ଭ ହୋଇ ୩୧ ମାର୍ଚ୍ଚ ୨୦୨୬ ପର୍ଯ୍ୟନ୍ତ ଚାଲିବ । ଏହି ଯୋଜନା ପାଇଁ ମୋଟ ୨.୯୪ ଲକ୍ଷ କୋଟିର ବ୍ୟୟ ଅଟକଳ କରାଯାଇଛି ।
Sambad is now on WhatsApp
Join and get latest news updates delivered to you via WhatsApp
ଏହି ଯୋଜନାରେ ପ୍ରି ପ୍ରାଇମେରୀରୁ ସିନିୟର ସେକେଣ୍ଡାରୀ ସ୍ତର ପର୍ଯ୍ୟନ୍ତ ମୋଟ ୧.୧୬ ନିୟୁତ ସ୍କୁଲ, ୧୫୬ ନିୟୁତ ଛାତ୍ରଛାତ୍ରୀ ଓ ୫.୭ ନିୟୁତ ଶିକ୍ଷକ ଶିକ୍ଷୟିତ୍ରୀଙ୍କୁ ସାମିଲ କରାଯିବ ।
ଏହି ଯୋଜନା ସମ୍ପର୍କରେ ସୂଚନା ଦେଇ କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ କହିଛନ୍ତି ଯେ ସ୍କୁଲ ଶିକ୍ଷା କ୍ଷେତ୍ରରେ ଆରମ୍ଭ ହେବ ନୂଆ ଯୁଗ । ପ୍ରି-ସ୍କୁଲରୁ ଦ୍ବାଦଶ ଶ୍ରେଣୀ ପର୍ଯ୍ୟନ୍ତ ଏହି ଯୋଜନାରେ ସାମିଲ ହେବେ । ସାର୍ବଜନୀନ ଶିକ୍ଷା ସହ ସ୍କୁଲର ଭିତ୍ତିଭୂମି ବିକାଶ ଓ ପିଲାମାନେ ଯେପରି ସ୍କୁଲ ଛାଡ଼ି ଯିବେନି ତାହା ଉପରେ ଗୁରୁତ୍ବ ଦିଆଯିବ । ସ୍କୁଲରେ ଧନ୍ଦାମୂଳକ ଓ ଶାରିରୀକ ଶିକ୍ଷା ଉପରେ ଗୁରୁତ୍ବ ଦିଆଯିବ । ସେହିପରି ସରକାରୀ ସ୍କୁଲରେ ବି ପ୍ଲେ ସ୍କୁଲ ଆରମ୍ଭ କରାଯିବ । ସରକାରୀ ସ୍କୁଲରେ ପ୍ରି-ପ୍ରାଇମେରୀ ପିଲାମାନଙ୍କ ପାଇଁ ମୁଣ୍ଡପିଛା ୫୦୦ ଟଙ୍କା ବ୍ୟୟରେ ଶିକ୍ଷା ଉପକରଣ ଯୋଗାଇ ଦେବାର ବ୍ୟବସ୍ଥା କରାଯାଇଛି ବୋଲି ଶ୍ରୀ ପ୍ରଧାନ କହିଛନ୍ତି ।