ଦୀପ ଜଳିବ, ବାଣ ଭଳି ଶବ୍ଦ ବି ହେବ, ୧୨ ବର୍ଷର ଝିଅ ପ୍ରସ୍ତୁତ କଲେ ନିଆରା ଦୀପ
ନୂଆଦିଲ୍ଲୀ: ଦୀପାବଳି ପର୍ବ ଅତ୍ୟନ୍ତ ଅନନ୍ୟ | ତେବେ ଦୁଇ ବର୍ଷ ଧରି କରୋନା କଟକଣା ଯୋଗୁଁ ରାଜ୍ୟ ସରକାର ବାଣ ବିକ୍ରିକୁ ଅନୁମତି ଦେଇନାହାନ୍ତି | ପ୍ରଦୂଷଣ ସହ ସଂକ୍ରମଣ ବ୍ୟାପିବାର ଆଶଙ୍କା କରି ବାଣ ଫୁଟାଇବା ଉପରେ ପ୍ରତିବନ୍ଧକ ରହିଛି | ତେବେ ଏଥର ଦୀପାବଳି ପାଇଁ ଏକ ବିଶେଷ ପ୍ରକାରର ଦୀପ ପ୍ରସ୍ତୁତ କରିଛନ୍ତି ଜଣେ ଛାତ୍ରୀ | ଏହି ଦୀପ ଜଳିବା ସାଙ୍ଗକୁ ବାଣ ଭଳି ଶବ୍ଦ ମଧ୍ୟ କରିବ | ଉତ୍ତରପ୍ରଦେଶର ବାରାଣାସୀର ଜଣେ ଛାତ୍ରୀ ପିଲାମାନଙ୍କ ପାଇଁ ଏକ ସ୍ୱତନ୍ତ୍ର ଦୀପ ତିଆରି କରିଛନ୍ତି। ଯେଉଁଥିରେ କୌଣସି ବିପଦ ନାହିଁ କିମ୍ବା ଏହା ପ୍ରଦୂଷଣର କାରଣ ସାଜିବ ନାହିଁ |
Sambad is now on WhatsApp
Join and get latest news updates delivered to you via WhatsApp
ସୂଚନାନୁସାରେ, ବାରାଣାସୀର ସପ୍ତମ ଶ୍ରେଣୀରେ ଛାତ୍ରୀ ଅପେକ୍ଷା ପଟେଲ ଏହି ଅନନ୍ୟ ଦୀପ ତିଆରି କରିଛନ୍ତି। ଏହି ଦୀପ ସେ ମାଟିରେ ପ୍ରସ୍ତୁତ କରିଥିବାବେଳେ ଏହାକୁ ଆପଣ ଗ୍ରୀନ ଦୀପ ବୋଲି ମଧ୍ୟ କହିପାରିବେ | କାରଣ ଏହି ଦୀପ ସୌର ଶକ୍ତିରେ ମଧ୍ୟ ଚାର୍ଜ ହୋଇପାରିଥାଏ | ଏହି ଦୀପରେ ଜଣେ ଚାହିଁଲେ ତେଲ ମଧ୍ୟ ବ୍ୟବହାର କରିପାରିବେ | ଅପେକ୍ଷାଙ୍କ ଏହି ସ୍ମାର୍ଟ ଦୀପରେ ଏପରି କୌଶଳ ବ୍ୟବହାର କରାଯାଇଛି ଯେ ଆଲୋକ ସହିତ ଏଥିରେ ବାଣ ଭଳି ଶବ୍ଦ ମଧ୍ୟ ସୃଷ୍ଟି ହୋଇପାରିବ | ଏହି ଦୀପର ନାମ ସେ ଚାରଜେବୁଲ ପ୍ରଦୂଷଣ ମୁକ୍ତ ଦୀପ ରଖିଛନ୍ତି |
ଏହି ଦୀପ ଏକ ରିମୋଟ ମାଧ୍ୟମରେ ଜଳୁଥିବାବେଳେ, ଏଥିରେ ଏକ ସେନସର ଲାଗିଛି ଏବଂ ଦୀପ ସାମ୍ନାକୁ ଆସିବା ମାତ୍ରେ ବାଣ ଫୁଟିବା ପରି ଶବ୍ଦ କରିଥାଏ | ଥରେ ଚାର୍ଜ କରିବା ମାତ୍ରେ ଏହି ଦୀପ ୪୫୦ ଥର ଶବ୍ଦ ସୃଷ୍ଟି କରିଥାଏ | ତିନି ଘଣ୍ଟା ଚାର୍ଜ କରିବା ଦ୍ୱାରା, ଏହି ଦୀପ ୪-୫ ଦିନ ପର୍ଯ୍ୟନ୍ତ କାର୍ଯ୍ୟକ୍ଷମ ହେବ | ପ୍ରଦୂଷଣମୁକ୍ତ ସ୍ମାର୍ଟ ଦୀପ ତିଆରି କରିବାକୁ ୧୨ ଦିନ ସମୟ ଲାଗିଥିବାବେଳେ ଏହାକୁ ନିର୍ମାଣ କରିବାକୁ ୩୫୦ ଟଙ୍କା ଖର୍ଚ୍ଚ ହୋଇଛି ବୋଲି ସେ କହିଛନ୍ତି।