ଅନ୍ଲକ୍-୩ ନିର୍ଦ୍ଦେଶାବଳି : ରାତି କଟକଣା ଉଠିଲା
ସ୍କୁଲ୍, ମେଟ୍ରୋ, ସିନେମାହଲ୍ ବନ୍ଦ ରହିବ, ଅବରୋଧ ଅଞ୍ଚଳରେ ୩୧ ଅଗଷ୍ଟ ପର୍ଯ୍ୟନ୍ତ ଲକ୍ଡାଉନ୍
ନୂଆଦିଲ୍ଲୀ : କେନ୍ଦ୍ର ଗୃହ ମନ୍ତ୍ରାଳୟ ଅନ୍ଲକ୍-୩ ପାଇଁ ଆଜି ନିର୍ଦ୍ଦେଶାବଳି ଜାରି କରିଛନ୍ତି। ପୂର୍ବରୁ ଜାରି ରହିଥିବା ରାତ୍ରୀକାଳୀନ କର୍ଫ୍ୟୁ ଏବେ ହଟାଇ ଦିଆଯାଇଛି। ୫ ଅଗଷ୍ଟରୁ ଦେଶରେ ଯୋଗ କେନ୍ଦ୍ର ଏବଂ ଜିମ୍ ଖୋଲିବା ପାଇଁ ଅନୁମତି ମିଳିଥିବା ବେଳେ ୩୧ ଅଗଷ୍ଟ ପର୍ଯ୍ୟନ୍ତ ସମସ୍ତ ସ୍କୁଲ, କଲେଜ ବନ୍ଦ ରହିବ। ମେଟ୍ରୋ ଟ୍ରେନ୍, ସିନେମା ହଲ୍ ସ୍ବିମିଂ ପୁଲ ମଧ୍ୟ ଖୋଲିପାରିବ ନାହିଁ। କଣ୍ଟେନ୍ମେଣ୍ଟ ଜୋନ୍ (ଅବରୋଧ ଅଂଚଳ)ରେ ୩୧ ଅଗଷ୍ଟ ୨୦୨୦ ପର୍ଯ୍ୟନ୍ତ ଲକ୍ଡାଉନ୍ କଟକଣାରେ କୌଣସି କୋହଳ ହେବନାହିଁ। ତେବେ ଅବରୋଧ ଅଂଚଳ ବାହାରେ କେତେକ ଅନ୍ୟ ଗତିବିଧି ପାଇଁ ଅନୁମତି ପ୍ରଦାନ କରାଯାଇଛି।
Sambad is now on WhatsApp
Join and get latest news updates delivered to you via WhatsApp
ସାମାଜିକ, ଧାର୍ମିକ, ରାଜନୈତିକ, ସାଂସ୍କୃତିକ ଏବଂ ମନୋରଂଜନ କାର୍ଯ୍ୟକ୍ରମ ଉପରେ କଟକଣା ବଳବତ୍ତର ରହିବ। ଯେଉଁ କାର୍ଯ୍ୟକ୍ରମରେ ଭିଡ଼ ଜମୁଛି, ତାହାଠାରୁ ଦୂରେଇ ରହିବା ପାଇଁ କୁହାଯାଇଛି।
ସ୍ବାଧୀନତା ଦିବସ ସମାରୋହରେ ସାମାଜିକ ଦୂରତ୍ବ ଏବଂ ଅନ୍ୟ ସ୍ବାସ୍ଥ୍ୟ ସଂପର୍କିତ ନିୟମାବଳି କଡ଼ାକଡ଼ି ଭାବେ ପାଳନ ହେବ। ସମସ୍ତ ପ୍ରୋଟକଲ ସହିତ ସମାରୋହ ପାଇଁ ଅନୁମତି ମିଳିବ। କଣ୍ଟେନମେଣ୍ଟ୍ ଜୋନ୍ରେ ୩୧ ଅଗଷ୍ଟ ପର୍ଯ୍ୟନ୍ତ କେବଳ ଜରୁରୀ ଗତିବିଧିକୁ ହିଁ ଅନୁମତି ମିଳିବ। ଅବରୋଧ ଅଂଚଳଗୁଡ଼ିକ ସଂକ୍ରାନ୍ତରେ ନିଷ୍ପତ୍ତି ପରିସ୍ଥିତିକୁ ଦେଖି ଜିଲ୍ଲା ପ୍ରଶାସନ ନିର୍ଦ୍ଧାରଣ କରିବ।
ଅନ୍ଲକ୍ ୩ରେ ଅନ୍ତର୍ଜାତୀୟ ବିମାନ ଯାତ୍ରା କେବଳ ବନ୍ଦେଭାରତ ମିସନ୍ ଅଧୀନରେ ହିଁ ସୀମିତ ରହିବ। ରାଜ୍ୟ ଏବଂ କେନ୍ଦ୍ର ଶାସିତ ଅଂଚଳମାନେ ନିଜ ନିଜ କ୍ଷେତ୍ରରେ କୋଭିଡ-୧୯ ସ୍ଥିତିକୁ ଦୃଷ୍ଟିରେ ରଖି କଣ୍ଟେନ୍ମେଣ୍ଟ ଜୋନ୍ ବାହାରେ କଟକଣା ଲାଗୁ କରିପାରିବେ। ତେବେ ରାଜ୍ୟ ଭିତରେ କିମ୍ବା ଅନ୍ୟ ରାଜ୍ୟକୁ ଜନସଧାରଣଙ୍କ ଗମନାଗମନ ଏବଂ ସାମଗ୍ରୀ ନେବା ଆଣିବା କ୍ଷେତ୍ରରେ କୌଣସି ପ୍ରତିବନ୍ଧକ ରହିବ ନାହିଁ। ଏଥିପାଇଁ କୌଣସି ମଂଜୁରି କିମ୍ବା ଇ ପର୍ମିଟ୍ ଆବଶ୍ୟକ ପଡ଼ିବ ନାହିଁ।
କ’ଣ କୋହଳ ହେଲା
୧. ରାତି ସମୟରେ ଲୋକଙ୍କ ଯାତାୟତ
୨. ଯୋଗ କେନ୍ଦ୍ର, ଜିମ୍ ନିର୍ଦ୍ଧାରିତ ନିୟମ ସହିତ ଅଗଷ୍ଟ ୫ରୁ ଖୋଲିବ
୩. ସ୍ବାଧୀନତା ଦିବସ ସମାରୋହ ସାମାଜିକ ଦୂରତ୍ବ ସହ ପାଳନ ହେବ
୪. ଅନ୍ତର୍ଜାତୀୟ ବିମାନଯାତ୍ରା ‘ବନ୍ଦେ ଭାରତ ମିସନ୍’ରେ ସୀମିତ ରହିବକ’ଣ ବନ୍ଦ ରହିବ
୧. ମେଟ୍ରୋ ରେଳ ସେବା
୨. ସିନେମା ହଲ୍, ସ୍ବିମିଂ ପୁଲ, ପାର୍କ, ବାର୍, ଅଡିଟୋରିୟମ, ସଭାଗୃହ ଏବଂ ଏଭଳି ଅନୁଷ୍ଠାନ
୩. ବିଭିନ୍ନ ସଭା ସମିତି, ଧାର୍ମିକ କାର୍ଯ୍ୟକ୍ରମ, କ୍ରୀଡ଼ା କାର୍ଯ୍ୟକ୍ରମ ଓ ଏଭଳି ସମାବେଶ ବନ୍ଦ ରହିବ
୪. ୧୦ ବର୍ଷରୁ କମ୍ ବୟସର ଶିଶୁ, ୬୫ ବର୍ଷରୁ ଅଧିକ ବୟସର ବ୍ୟକ୍ତି, ଅସୁସ୍ଥ ବ୍ୟକ୍ତି, ଗର୍ଭବତୀ ମହିଳାଙ୍କୁ ଘରେ ରହିବାକୁ ପରାମର୍ଶ