ଲକ୍ଷ୍ନୌ: ଶେଷରେ ମହିଳା ବିକ୍ଷୋଭ ପ୍ରଦର୍ଶନକାରୀଙ୍କୁ ବି ଛାଡ଼ିଲାନି ପୁଲିସ୍ । ନାଗରିକତା ସଂଶୋଧନ ଆଇନ୍ ବିରୋଧରେ ଉତ୍ତରପ୍ରଦେଶର ଇଟାୱା ଜିଲ୍ଲାରେ ବିକ୍ଷୋଭ ପ୍ରଦର୍ଶନ କରୁଥିବା ମହିଳାଙ୍କୁ ୟୁପି ପୁଲିସ ଅତ୍ୟନ୍ତ ନିର୍ମମ ଭାବେ ଗୋଡ଼ାଇ ଗୋଡ଼ାଇ ପିଟିଛି । ଏହି ଘଟଣାର ଭିଡିଓ ମୋବାଇଲକୁ ମୋବାଇଲ ଘୁରି ବୁଲୁଛି । ମହିଳାଙ୍କୁ ପିଟିବା ପରେ ଉକ୍ତ ସ୍ଥାନରେ ଖୋଲାଥିବା ଦୋକାନଗୁଡ଼ିକୁ ବି ଜୋରଜବରଦସ୍ତ ବନ୍ଦ କରିଦେଇଥିଲେ ପୁଲିସ।
Sambad is now on WhatsApp
Join and get latest news updates delivered to you via WhatsApp
ବିକ୍ଷୋଭ ପ୍ରଦର୍ଶନ ସମୟରେ ପୁଲିସ ଦମନଲୀଲାକୁ ନେଇ ଏବେ ବିରୋଧର ସ୍ବର ଉଠିଛି । ଭିଡ଼ିଓ କ୍ଲିପରେ ସ୍ପଷ୍ଟ ଦେଖିବାକୁ ମିଳୁଛି, ପୋଲିସ ଗଳିକନ୍ଦିରେ ପଶି ମହିଳାଙ୍କୁ ପିଛା କରିବା ସହ ଜୋରରେ ମାଡ଼ ମାରୁଛି । ୧୭ ସେକେଣ୍ଡର ଏହି ଭିଡ଼ିଓରେ ମହିଳାମାନେ ମାଡ଼ରୁ ରକ୍ଷା ପାଇବା ପାଇଁ ପ୍ରାଣ ବିକଳରେ ଚିତ୍କାର କରୁଛନ୍ତି । ହେଲେ ପୁଲିସବାବୁମାନେ କିଛି ବି ଶୁଣିବାକୁ ନାରାଜ ।
ତେବେ ମହିଳାଙ୍କୁ ମାଡ଼ ମାରୁଥିବା ପୁଲିସକର୍ମୀମାନ ମହିଳା ନା ପୁରୁଷ ତାହା ସ୍ପଷ୍ଟ ଜଣାପଡ଼ୁନାହିଁ । ପୁଲିସ୍ ସୂତ୍ର ଅନୁସାରେ ମହିଳା ବିକ୍ଷୋଭ ପ୍ରଦର୍ଶନକାରୀଙ୍କ ଉପରେ କେବଳ ମହିଳା ପୁଲିସକର୍ମୀମାନେ କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି । ସ୍ଥାନୀୟ ମିଡ଼ିଆ ରିପୋର୍ଟ ଅନୁସାରେ ଗତକାଲି ମଧ୍ୟାହ୍ନ ସମୟରେ ଏହି ବିକ୍ଷୋଭ ଆରମ୍ଭ ହୋଇଥିଲା । ଆରମ୍ଭରେ ପ୍ରାୟ ୧୫୦ ଜଣ ମହିଳା ସିଏଏ ବିରୋଧରେ ବିକ୍ଷୋଭ ପ୍ରଦର୍ଶନ କରୁଥିଲେ । କିନ୍ତୁ ରାତି ବଢ଼ିବା କ୍ରମେ ଏହି ସଂଖ୍ୟା ୫୦୦ରେ ପହଞ୍ଚିଥିଲା । ବଢ଼ୁଥିବା ବିକ୍ଷୋଭ ପ୍ରଦର୍ଶନକାରୀଙ୍କୁ ଦେଖି ପୁଲିସ ଏପରି ଦମନଲୀଳା ଚଳାଇଥିଲା ।
ହେଲେ ପ୍ରଶ୍ନ ଉଠୁଛି, କାର୍ଯ୍ୟାନୁଷ୍ଠାନ ନାମରେ ଏ କି ପ୍ରକାର ନିର୍ଯାତନା ? ସିଏଏକୁ ବିରୋଧ କରି ଦେଶର ଅନେକ ସ୍ଥାନରେ ବିକ୍ଷୋଭ ପ୍ରଦର୍ଶନ କରାଯାଉଛି । ୟୁପିରେ ମଧ୍ୟ ଅନେକ ସହରରେ ସିଏଏକୁ ବିରୋଧ କରି ପ୍ରଦର୍ଶନ ଜାରି ରହିଛି । ତେବେ ସାଧାରଣ ଜନତାଙ୍କ ଉପରେ ପୁଲିସର ଏପରି ଜୁଲମ୍ କେତେଦୂର ଯୁକ୍ତିଯୁକ୍ତ ?