ଆଲିଗଡ଼ ବିଶ୍ୱବିଦ୍ୟାଳୟ ହିଂସା, ୧୦୦୦ ଛାତ୍ରଛାତ୍ରୀଙ୍କ ନାଁରେ ମାମଲା ରୁଜ୍ଜୁ କଲା ପୁଲିସ
ଲକ୍ଷ୍ନୌ : ନାଗରିକତା (ସଂଶୋଧନ) ଆଇନ ବିରୋଧରେ ଗତ ୧୫ ତାରିଖରେ ଉତ୍ତରପ୍ରଦେଶର ଆଲିଗଡ଼ ମୁସଲିମ ବିଶ୍ୱ ବିଦ୍ୟାଳୟର ଛାତ୍ରମାନେ କରିଥିବା ହିଂସାକାଣ୍ଡର ତଦନ୍ତ ଆରମ୍ଭ କରିଛି ପୁଲିସ । ପୁଲିସ ପକ୍ଷରୁ ପ୍ରାୟ ୧ ହଜାରରୁ ଅଧିକ ଛାତ୍ରଛାତ୍ରୀଙ୍କ ବିରୁଦ୍ଧରେ ମାମଲା ଦାଏର କରାଯାଇଛି ।
Sambad is now on WhatsApp
Join and get latest news updates delivered to you via WhatsApp
ଦିଲ୍ଲୀର ଜାମିଆ ମିଲିଆ ଇସ୍ଲାମିଆ ବିଶ୍ୱବିଦ୍ୟାଳୟର ଛାତ୍ରଛାତ୍ରୀଙ୍କ ଉପରେ ପୁଲିସ ଅତ୍ୟାଚାରର ପ୍ରତିବାଦ କରି ଏଏମୟୁ ଛାତ୍ରଛାତ୍ରୀମାନେ ବିରୋଧ ପ୍ରଦର୍ଶନ କରୁଥିଲେ । ତେବେ ପରେ ଏହି ଆନ୍ଦୋଳନ ହିଂସାତ୍ମକ ହୋଇଯାଇଥିଲା । ଏହାର ମୁକାବିଲା କରିବାକୁ ଯାଇ ପୁଲିସ ପକ୍ଷରୁ ଲାଠିଚାର୍ଜ କରାଯାଇଥିଲା । ଏହି ଘଟଣାରେ ଉଭୟ ଛାତ୍ର ଓ ପୁଲିସ କର୍ମଚାରୀମାନେ ଆହତ ହୋଇଥିଲେ । ଏହି ହିଂସାକାଣ୍ଡ ପାଇଁ ରାପିଡ ଆକ୍ସନ ଫୋର୍ସ ପକ୍ଷରୁ ପ୍ରାୟ ୧୦୦୦ ଜଣ ଅଜଣା ଛାତ୍ରଛାତ୍ରୀଙ୍କ ବିରୁଦ୍ଧରେ ମାମଲା ରୁଜ୍ଜୁ କରାଯାଇଛି । ଗତ ୨୩ ତାରିଖରେ ରାପିଡ ଆକ୍ସନ ଫୋର୍ସ କମାଣ୍ଡାଣ୍ଟ ପୁନୀତ କୁମାର ଏହି ମାମଲା ରୁଜ୍ଜୁ କରିଛନ୍ତି ବୋଲି ଆଲିଗଡ଼ ଏସପି ଆକାଶ କୁହ୍ଲାଡ଼ି କହିଛନ୍ତି । ଡିସେମ୍ବର ୨୪ରେ ପୁଲିସ ପକ୍ଷରୁ ପ୍ରାୟ ୧୨୦୦ ଲୋକଙ୍କ ବିରୁଦ୍ଧରେ ଆଉ ଏକ ମାମଲା ରୁଜ୍ଜୁ ହୋଇଥିଲା । ଏମାନଙ୍କ ମଧ୍ୟରେ ରହିଛନ୍ତି ଛାତ୍ରଛାତ୍ରୀ, ଅଧ୍ୟାପକ ଓ କର୍ମଚାରୀ । ଧାରା ୧୪୪ ଉଲ୍ଲଙ୍ଘନ ଅଭିଯୋଗରେ ଏହି ମାମଲା ରୁଜ୍ଜୁ କରାଯାଇଛି ବୋଲି ଆଲିଗଡ଼ ପୁଲିସ ପକ୍ଷରୁ କୁହାଯାଇଛି ।