ନୂଆଦିଲ୍ଲୀ: ଆରମ୍ଭ ହେବ ଶ୍ରାବଣ ମାସ, ଆରମ୍ଭ ହେବ କାଉଡ଼ିଆ ଯାତ୍ରା । ଉତ୍ତର ପ୍ରଦେଶରେ କାଉଡ଼ିଆ ଯାତ୍ରାକୁ ସୁରକ୍ଷିତ, ସୁଗମ ଏବଂ ଶାନ୍ତିପୂର୍ଣ୍ଣ ଭାବରେ ସମ୍ପନ୍ନ କରିବା ପାଇଁ ସରକାର ଏବଂ ପୁଲିସ-ପ୍ରଶାସନ ନିଜର ପ୍ରସ୍ତୁତି ଶେଷ କରିଛନ୍ତି । ପୁଲିସ ମହାନିର୍ଦ୍ଦେଶକ ରାଜୀବ କୃଷ୍ଣା ସୁରକ୍ଷା ବ୍ୟବସ୍ଥା ଏବଂ ଟ୍ରାଫିକ ପରିଚାଳନା ପାଇଁ ବ୍ୟାପକ ନିର୍ଦ୍ଦେଶନାମା ଜାରି କରିଛନ୍ତି । ଲକ୍ଷ ଲକ୍ଷ ଶିବ ଭକ୍ତଙ୍କର ଏହି ପବିତ୍ର ଯାତ୍ରାରେ ଯେମିତି କୌଣସି ଅସୁବିଧା ନହୁଏ ସେଥିପ୍ରତି ଧ୍ୟାନ ଦିଆଯାଇଛି । କାଉଡ଼ିଆ ଯାତ୍ରା ପାଇଁ ଉତ୍ତର ପ୍ରଦେଶ ପୁଲିସ ସୁରକ୍ଷ ବ୍ୟବସ୍ଥା ଉପରେ ଗୁରୁତ୍ବ ଦେଇଛି। 

Advertisment

କାଉଡ଼ିଆ ଭକ୍ତମାନେ ଯାତ୍ରା କରୁଥିବା ମାର୍ଗ ପୂରା ସିସିଟିଭି ନଜରରେ ରହିବ ।  ୨୯ ହଜାର ସିସିଟିଭି କ୍ୟାମେରା ଲାଗିବାର ବ୍ୟବସ୍ଥା ହେଉଛି । ୩୯୫ ଡ୍ରୋନ୍ ଉଡିବ, ୧୮୪୫ ଜଳ ସେବା କେନ୍ଦ୍ର, ୮୨୯ ଚିକିତ୍ସା ଶିବିର ଏବଂ ୧୨୨୨ ପୁଲିସ ସହାୟତା କେନ୍ଦ୍ର ସ୍ଥାପନ କରାଯାଇଛି । ସବୁ କାଉଡ଼ିଆ ଶିବିରରେ ସୁରକ୍ଷା ପାଇଁ ବ୍ୟବସ୍ଥା ଏବଂ ସିସିଟିଭି କ୍ୟାମେରା ବାଧ୍ୟତାମୂଳକ କରାଯାଇଛି । ପୁଲିସ ଅଧିକାରୀ ଏବଂ ଥାନା ପ୍ରଭାରୀଙ୍କ ସମ୍ପର୍କ ନମ୍ବର, ଟ୍ରାଫିକ ଡାଇଭର୍ସନ ସ୍କିମ୍ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ସୂଚନା ବାରକୋଡ୍ ମାଧ୍ୟମରେ ଖବରକାଗଜ, ହୋର୍ଡିଂ ଏବଂ ସୋସିଆଲ ମିଡିଆ ଜରିଆରେ ଶ୍ରଦ୍ଧାଳୁଙ୍କ ପାଖରେ ପହଞ୍ଚାଯିବ ।

ଯାତ୍ରାର ସୁରକ୍ଷା ପାଇଁ ବ୍ୟାପକ ପୁଲିସ ବଳ ନିୟୋଜିତ କରାଯାଇଛି, ଯେଉଁଥିରେ ୨୦୪୦ ଇନ୍ସପେକ୍ଟର, ୧୩,୫୨୦ ଉପନିରୀକ୍ଷକ, ୩୯,୯୬୫ ମୁଖ୍ୟ ଆରକ୍ଷୀ\ ଆରକ୍ଷୀ ,୧୪୮୬ ମହିଳା ଉପନିରୀକ୍ଷକ, ୮୫୪୧ ମହିଳା ମୁଖ୍ୟ ଆରକ୍ଷୀ/ଆରକ୍ଷୀ, ୫୦ କମ୍ପାନି କେନ୍ଦ୍ରୀୟ ପୁଲିସ ବଳ/ପିଏସି, ଏବଂ ୧୪୨୪ ହୋମଗାର୍ଡ ସାମିଲ ଅଛନ୍ତି । 

ଏହା ବ୍ୟତୀତ, ରାପିଡ ଆକ୍ସନ ଫୋର୍ସ, କ୍ଵିକ ରିଆକ୍ସନ ଟିମ ଏବଂ ଆଣ୍ଟି ଟେରର ସ୍କ୍ଵାଡର ନିୟୋଜନ ମଧ୍ୟ କରାଯାଇଛି । ସମସ୍ତ ପୁଲିସ କର୍ମଚାରୀଙ୍କୁ ଭିଡିଓ କନଫରେନ୍ସିଂ ମାଧ୍ୟମରେ ଯାତ୍ରା ପରିଚାଳନା ଏବଂ ନିର୍ଦ୍ଦେଶନାମା ବିଷୟରେ ସୂଚନା ଦିଆଯାଇଛି । ଯାତ୍ରାକୁ ସୂଚାରୁ ରୂପେ ପରିଚାଳନା କରିବା ପାଇଁ ଉତ୍ତର ପ୍ରଦେଶ, ଉତ୍ତରାଖଣ୍ଡ, ହରିୟାଣା, ଦିଲ୍ଲୀ ଏବଂ ରାଜସ୍ଥାନର ଅଧିକାରୀଙ୍କ ମଧ୍ୟରେ ଏକ ଆନ୍ତଃରାଜ୍ୟ ୱାଟ୍ସଆପ୍ ଗ୍ରୁପ୍ ଗଠନ କରାଯାଇଛି । ଏହା ମାଧ୍ୟମରେ ରିଅଲ-ଟାଇମ ସୂଚନା ଆଦାନ ପ୍ରଦାନ, ମାର୍ଗଗୁଡ଼ିକର ସ୍ଥିତି ଏବଂ ସୁରକ୍ଷା ବ୍ୟବସ୍ଥାର ସୂଚନା ସେୟାର କରାଯିବ ।