ପୁଣି ପାକିସ୍ତାନକୁ ସାମରିକ ତାଲିମ ଦେବ ଆମେରିକା
ଓ୍ଵାସିଂଟନ : ମଧ୍ୟ ପ୍ରାଚ୍ୟରେ ଇରାନ ଓ ଆମରିକା ମଧ୍ୟରେ ଉତ୍ତେଜନା ବଢୁଥିବାବେଳେ ନିଜର ପୁରୁଣା ବନ୍ଧୁ ପାକିସ୍ତାନକୁ ମନେପକାଇଛି ଆମେରିକା ।
Sambad is now on WhatsApp
Join and get latest news updates delivered to you via WhatsApp
ଶୁକ୍ରବାରଦିନ ଇରାନର କମାଣ୍ଡର କାସିମ ସୁଲେମାନୀଙ୍କୁ ହତ୍ୟା କରିବାପରେ ଆମେରିକାର ପରରାଷ୍ଟ୍ର ସଚିବ ମାଇକ ପମ୍ପେଓ ପାକିସ୍ତାନର ସେନାମୁଖ୍ୟ ଜେନେରାଲ କମର ଜାଭେଦ ବାଜଓ୍ଵାଙ୍କୁ ଫୋନ କରି ଏହି ପ୍ରସଙ୍ଗରେ ଆଲୋଚନା କରିଥିଲେ ।
ଏହି ଆଲୋଚନା ପରେ ଆଜି ଖବର ଆସିଛି ଯେ ଆମେରିକା ପୁଣି ଥରେ ପାକିସ୍ତାନୀ ସେନାକୁ ତାଲିମ ଦେବା ଆରମ୍ଭ କରିବ । ଅନ୍ତର୍ଜାତୀୟ ମିଲିଟାରୀ ଶିକ୍ଷା ଓ ତାଲିମ କାର୍ଯ୍ୟକ୍ରମ ଅଧିନରେ ଏହି ତାଲିମ ପ୍ରଦାନ କରିବ ଆମେରିକା । ଗତ ୨୦୧୮ରେ ଆମେରିକା ପାକିସ୍ତାନ ସେନାକୁ ତାଲିମ ପ୍ରଦାନ ବନ୍ଦ କରିଥିଲା । ତେବେ ପାକିସ୍ତାନକୁ ଅନୁଦାନ ପ୍ରଦାନ ବନ୍ଦ ରହିବ । ଏ ସଂପର୍କରେ ଶନିବାରଦିନ ଆମେରିକାର ଦକ୍ଷିଣ ଓ କେନ୍ଦ୍ର ଏସିଆ ବିଭାଗ ଉପସଚିବ ଆଲିସ େଓ୍ଵଲସ ଟ୍ଵିଟ କରି ସୂଚନା ଦେଇଛନ୍ତି । ୨୦୧୮ରେ ନିଜର ନବବର୍ଷ ଟ୍ଵିଟରେ ଟ୍ରମ୍ପ ପାକିସ୍ତାନକୁ ୨ ବିଲିୟନ ଡଲାର ସହାୟତା ପ୍ରଦାନ ବନ୍ଦ କରିବା ବିଷୟ ଘୋଷଣା କରିଥିଲେ । କିନ୍ତୁ ଏବେ ଇରାନ ସହ ଉତ୍ତେଜନା ବୃଦ୍ଧି ପରେ ଆମେରିକା ପାଇଁ ପାକିସ୍ତାନର ଆବଶ୍ୟକତା ବଢିଯାଇଛି । ଇରାନ ଆମେରିକା ଯୁଦ୍ଧ ହେଲେ ପାକିସ୍ତାନକୁ ଆମେରିକା ଏକ ଘାଟି ଭାବେ ବ୍ୟବହାର କରିପାରିବ ।