ହମାସ, ଲସ୍କର ସହଯୋଗୀ ଗୋଷ୍ଠୀକୁ ୟୁଏସ୍‌ଏଡ୍‌ ସମର୍ଥନ କରୁଥିଲା: ୨୬/୧୧ ମୁମ୍ବାଇ ଆକ୍ରମଣରେ ସଂପୃକ୍ତ ଏଫ୍‌ଆଇଏଫ୍‌କୁ

ୱାସିଂଟନ: ୟୁଏସ୍ଏଡ୍‌ ମାମଲାରେ ଆମେରିକା କଂଗ୍ରେସର ଗୃହ କମିଟି ଶୁଣାଣି ସମୟରେ ଚାଞ୍ଚଲ୍ୟକର ତଥ୍ୟ ସାମ୍ନାକୁ ଆସିଛି। ଉପସ୍ଥାପିତ ସାକ୍ଷ୍ୟ ଅନୁଯାୟୀ, ୨୦୨୩ ଅକ୍ଟୋବର ୭ରେ ଇସ୍ରାଏଲ ଉପରେ ହୋଇଥିବା ଆକ୍ରମଣ ପରଠାରୁ ହମାସ ଆତଙ୍କବାଦୀ ସଂଗଠନକୁ ସମର୍ଥନ କରିବା ପାଇଁ ଆମେରିକାର ଏଜେନ୍ସି ଫର୍ ଇଣ୍ଟର୍‌ନ୍ୟାସ୍‌ନାଲ ଡେଭ୍‌ଲପ୍‌ମେଣ୍ଟ (ୟୁଏସ୍ଏଡ୍‌) ୨ ବିଲିୟନ ଡଲାରରୁ ଅଧିକ ପଠାଇଛି। ଆମେରିକା ସରକାରଙ୍କ ଦ୍ୱାରା ଆତଙ୍କବାଦୀ ସଂଗଠନ ଘୋଷଣା କରାଯାଇଥିବା ଭାରତ ବିରୋଧୀ ସଂଗଠନକୁ ମଧ୍ୟ ୟୁଏସ୍ଏଡ୍‌ ସହାୟତା ପ୍ରଦାନ କରିଛି।

ପାକିସ୍ତାନରେ ଥିବା ଲସ୍କର-ଏ-ତୋଇବା (ଏଲ୍‌ଇଟି)ର ଏକ ସଂଗଠନ ଫଲାହ-ଏ-ଇନସାନିୟତ ଫାଉଣ୍ଡେସନ (ଏଫ୍ଆଇଏଫ୍)କୁ ଏଥିରେ ପାଣ୍ଠି ଯୋଗାଇ ଦିଆଯାଇଛି। ୨୬/୧୧ ମୁମ୍ବାଇ ଆକ୍ରମଣ ପାଇଁ ଲସ୍କର ଦାୟୀ ଥିଲା, ଯେଉଁଥିରେ ୧୬୬ ଜଣଙ୍କ ମୃତ୍ୟୁ ଘଟିଥିଲା ଏବଂ ୩୦୦ରୁ ଅଧିକ ଆହତ ହୋଇଥିଲେ। ତଦନ୍ତ ଚାଲିଥିବା ସତ୍ତ୍ୱେ ପୂର୍ବରୁ ୟୁଏସ୍ଏଡ୍‌ ଏଫ୍‌ଆଇଏଫ୍‌କୁ ସମର୍ଥନ ଜାରି ରଖିଥିବା ଅଭିଯୋଗ ହୋଇଥିଲା। ଉଭୟ ଭାରତ ଓ ଆମେରିକା ଦ୍ୱାରା ଆତଙ୍କବାଦୀ ସଂଗଠନ ଭାବେ ନିଷିଦ୍ଧ ହୋଇଥିବା ଉଭୟ ଲସ୍କର ଓ ଏହାର ସହଯୋଗୀ ଜେୟୁଡି ଜମ୍ମୁ-କାଶ୍ମୀର ସମେତ ସମଗ୍ର ଭାରତରେ ଏକାଧିକ ଆତଙ୍କବାଦୀ ଆକ୍ରମଣ କରିଛନ୍ତି।  ଏବେ ଆଶ୍ଚର୍ଯ୍ୟଜନକ ଅଭିଯୋଗ ସାମ୍ନାକୁ ଆସିଛି ଯାହା ସୂଚାଉଛି ଯେ ପୂର୍ବରୁ ୟୁଏସ୍ଏଡ୍‌ ନିଷିଦ୍ଧ ସଂଗଠନକୁ ସକ୍ରିୟ ଭାବରେ ପାଣ୍ଠି ଯୋଗାଉଥିଲା।