କରୋନା ଭାଇରସ ଟୀକା ବାହାରିବାକୁ ବର୍ଷେ ଲାଗିବ : ବିଶେଷଜ୍ଞ
ନୂଆଦିଲ୍ଲୀ : କରୋନା ଭାଇରସ ସମଗ୍ର ବିଶ୍ୱକୁ କବଳିତ କରିଥିବାବେଳେ ଏହାର ଟୀକା କେବେ ବାହାରିବ ତାହାକୁ ନେଇ ସମସ୍ତେ ଚାତକ ପରି ଚାହିଁ ରହିଛନ୍ତି । କିନ୍ତୁ ନିକଟ ଭବିଷ୍ୟତରେ ଏହି ରୋଗର ଟୀକା ବାହାରିବାର ସମ୍ଭାବନା କମ ବୋଲି ଜଣାପଡ଼ିଛି । ବିଶ୍ୱର ଜଣେ ଜଣାଶୁଣା ଭୁତାଣୁ ବିଶେଷଜ୍ଞ (ଭାଇରୋଲୋଜିଷ୍ଟ) ଇଆନ ଲିପକିନ କହିଛନ୍ତି ଯେ କରୋନା ଭାଇରସର ଟୀକା ବାହାରିବାକୁ ପ୍ରାୟ ବର୍ଷେ ଲାଗିଯିବ ।
Sambad is now on WhatsApp
Join and get latest news updates delivered to you via WhatsApp
ସେ କହିଛନ୍ତି ଯେ କରୋନା ଭାଇରସର ଟୀକା ବାହାରିନଥିଲେ ମଧ୍ୟ ଲୋକମାନେ କେତେକ ସତର୍କତାମୂଳକ ପଦକ୍ଷେପ ନେଇ ନିଜକୁ ସୁରକ୍ଷିତ ରଖିପାରିବେ । ନିୟମିତ ଭାବେ ହାତ ଧୋଇବା, ପାଟି କିମ୍ବା ମୁହଁରେ ହାତ ଲଗାଇବା ପରେ ହାତ ଧୋଇବାକୁ ସେ ପରାମର୍ଶ ଦେଇଛନ୍ତି ।
ଅନ୍ୟପକ୍ଷରେ କରୋନା ଭାଇରସ ଯୋଗୁଁ ସମଗ୍ର ବିଶ୍ୱରେ ମୃତ୍ୟୁସଂଖ୍ୟା ୩୧୬୦ ଛୁଇଁଛି । ଏହା ସହିତ ବିଶ୍ୱରେ ପ୍ରାୟ ୯୧ ହଜାର ଜଣ ସଂକ୍ରମିତ ହୋଇଛନ୍ତି, ଏହା ମଧ୍ୟରୁ ୮୦ ହଜାର ଚୀନର ବୋଲି ଜଣାପଡ଼ିଛି । ଇରାନରେ ମୃତ୍ୟୁସଂଖ୍ୟା ୯୨ରେ ପହଞ୍ଚିଛି ଓ ୨୯୨୨ଟି ନୂଆ ମାମଲା ଚିହ୍ନଟ ହୋଇଛି । ଇଟାଲୀରେ ମୃତ୍ୟୁସଂଖ୍ୟା ୭୯ରେ ପହଞ୍ଚିଛି । ସେହିପରି ଭାରତରେ କରୋନା ସଂକ୍ରମିତ ଲୋକମାନଙ୍କ ସଂଖ୍ୟା ୨୮ରେ ପହଞ୍ଚିଛି । ସମଗ୍ର ବିଶ୍ୱର ପ୍ରାୟ ୬୦ଟି ଦେଶକୁ କରୋନା ଭାଇରସ ସଂକ୍ରମଣ ପହଞ୍ଚିସାରିଲାଣି ।