ଆଜିଠାରୁ ମାତା ବୈଷ୍ଣୋଦେବୀଙ୍କ ଯାତ୍ରା ଆରମ୍ଭ ,ଦିନକୁ ଅତି ବେଶିରେ ୫୦୦ ଭକ୍ତଙ୍କୁ ମନ୍ଦିର ପରିସରକୁ ଯିବା ପାଇଁ ଅନୁମତି
ନୂଆଦିଲ୍ଲୀ : କରୋନା ମହାମାରୀ ସତ୍ତ୍ବେ ଆଜିଠାରୁ ମାତା ବୈଷ୍ଣୋଦେବୀଙ୍କ ଯାତ୍ରା ଆରମ୍ଭ ହୋଇଛି। କରୋନା ସଂକ୍ରମଣ ଯୋଗୁଁ ଗତ ୫ ମାସ ଧରି ବୈଷ୍ଣୋଦେବୀ ପୀଠ ଭକ୍ତ ଓ ପର୍ଯ୍ୟଟକଙ୍କ ଉଦ୍ଦେଶ୍ୟରେ ବନ୍ଦ ରଖାଯାଇଥିଲା। ତେବେ ଆଜିଠାରୁ ବୈଷ୍ଣୋଦେବୀ ଯାତ୍ରା ପୁନର୍ବାର ଆରମ୍ଭ କରିବାକୁ ଜମ୍ମୁ-କାଶ୍ମୀର ପ୍ରଶାସନ ଘୋଷଣା କରିଥିଲେ। ଏଥିନେଇ ବୈଷ୍ଣୋଦେବୀ ମନ୍ଦିର ବୋର୍ଡ ପକ୍ଷରୁ ବ୍ୟାପକ ପ୍ରସ୍ତୁତି କରାଯାଇଛି।
Sambad is now on WhatsApp
Join and get latest news updates delivered to you via WhatsApp
ମନ୍ଦିରକୁ ନିୟମିତ ବ୍ୟବଧାନରେ ସାନିଟାଇଜ୍ କରାଯିବା ସହ କରୋନା ଗାଇଡଲାଇନ୍ ନିୟମ ମାନି ଯାତ୍ରା ପାଳନ କରାଯିବ ବୋଲି ମନ୍ଦିର ବୋର୍ଡ ପକ୍ଷରୁ କୁହାଯାଇଛି। ଭକ୍ତମାନେ ମୁହଁରେ ମାସ୍କ ପିନ୍ଧି ଓ ସାମାଜିକ ଦୂରତା ରକ୍ଷା କରି ମନ୍ଦିରକୁ ଆସିପାରିବେ ବୋଲି ମନ୍ଦିର ବୋର୍ଡ ପକ୍ଷରୁ ଘୋଷଣା କରାଯାଇଛି। ପ୍ରଥମ ସପ୍ତାହରେ କେବଳ ୨,୦୦୦ ତୀର୍ଥଯାତ୍ରୀ ଦର୍ଶନ କରି ପାରିବେ। ୨,୦୦୦ ତୀର୍ଥଯାତ୍ରୀଙ୍କ ମଧ୍ୟରୁ ୧୯୦୦ ଜମ୍ମୁ କଶ୍ମୀରରୁ ଏବଂ କେନ୍ଦ୍ରଶାସିତ ଅଞ୍ଚଳ ବାହାରୁ ୧୦୦ଜଣଙ୍କୁ ଅନୁମତି ଦିଆଯିବ। ଅନ୍ଲାଇନ୍ ଜରିଆରେ ଭକ୍ତ ଓ ତୀର୍ଥଯାତ୍ରୀଙ୍କର ରେଜିଷ୍ଟ୍ରେସନ କରାଯିବାକୁ ମନ୍ଦିର ବୋର୍ଡ ନିଷ୍ପତ୍ତି ନେଇଛି।
ମନ୍ଦିର ବୋର୍ଡର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ରମେଶ କୁମାରଙ୍କ ଅନୁଯାୟୀ ଜମ୍ମୁ କଶ୍ମୀର ପ୍ରଶାସନ ଏହି ଯାତ୍ରାରେ ଯୋଗଦେବା ପାଇଁ ଅନେକ ନିୟମ କରିଛନ୍ତି। ଏହି ସମୟ ମଧ୍ୟରେ, ଭକ୍ତମାନଙ୍କୁ ସାମାଜିକ ଦୂରତା ଏବଂ ମାସ୍କ ପିନ୍ଧିବା ଭଳି ଜିନିଷର ବିଶେଷ ଯତ୍ନ ନେବାକୁ ପଡିବ | ଯାତ୍ରୀମାନେ ସମସ୍ତ ପ୍ରବେଶ ପଥରେ ଥର୍ମାଲ ସ୍କ୍ରିନିଂ କରାଯିବ। ଭକ୍ତଙ୍କୁ ଫୋନରେ ଆରୋଗ୍ୟ ସେତୁ ଆପ୍ ଡାଉନଲୋଡ୍ କରିବା ବାଧ୍ୟତାମୂଳକ ହେବ |