୩୩୪ଜଣ କରୋନା ସୁପରସ୍ପ୍ରେଡ଼ର ମିଳିବାରୁ ମେ ୧୫ ଯାଏଁ ବନ୍ଦ ରହିବ ସବୁ ପନିପରିବା ଦୋକାନ
ଅହମ୍ମଦାବାଦ: କରୋନା ସୁପରସ୍ପ୍ରେଡ଼ରଙ୍କ ପାଇଁ ଏବେ ଚିନ୍ତାରେ ଅହମ୍ମଦାବାଦ ପ୍ରଶାସନ | ଏଥିପାଇଁ ମେ ୧୫ ପର୍ଯ୍ୟନ୍ତ ସମସ୍ତ ତେଜରାତି ଓ ପନିପରିବା ଦୋକାନକୁ ବନ୍ଦ ରଖିବାକୁ ନିର୍ଦ୍ଦେଶ ଦିଆଯାଇଛି | ମିଳିଥିବା ସୂଚନା ମୁତାବକ ଏପର୍ଯ୍ୟନ୍ତ ଅହମ୍ମଦାବାଦରେ ୩୩୪ ଜଣ କରୋନାଭାଇରସ୍ ‘ସୁପର-ସ୍ପ୍ରେଡର୍’ ମିଳିଛନ୍ତି, ଯେଉଁମାନେ ବହୁ ସଂଖ୍ୟକ ଲୋକଙ୍କୁ ଏହି ରୋଗ ସଂକ୍ରମଣ କରିପାରନ୍ତି। ସେମାନେ ପନିପରିବା ବିକ୍ରେତା, ଖାଦ୍ୟ ସାମଗ୍ରୀ ଏବଂ ଦୁଗ୍ଧ ଦୋକାନ ମାଲିକ କିମ୍ବା ଅଳିଆ ସଂଗ୍ରହକାରୀ ହୋଇପାରନ୍ତି, ଯାହାକୁ ନଜରରେ ରଖି ଏଭଳି ପଦକ୍ଷେପ ନେଇଛନ୍ତି |
Sambad is now on WhatsApp
Join and get latest news updates delivered to you via WhatsApp
ଏପର୍ଯ୍ୟନ୍ତ ଗୁଜୁରାଟରେ ୭,୭୯୭ କରୋନାଭାଇରସ୍ ପଜିଟିଭ୍ ଚିହ୍ନଟ ହୋଇଥିବାବେଳେ ଏବଂ ୪୭୨ ଜଣଙ୍କର ମୃତ୍ୟୁ ହୋଇଥିବାର ଜଣାଯାଇଛି। ଏଥିମଧ୍ୟରୁ କେବଳ ଅହମ୍ମଦାବାଦରେ ୫,୫୪୦ ମାମଲା ଥିବାବେଳେ ଏବଂ ୩୬୩ ଜଣଙ୍କର ମୃତ୍ୟୁ ହୋଇଥିବା ସୂଚନା ମିଳିଛି। ଜଣେ ଅଧିକାରୀ କହିଛନ୍ତି ଯେ ସହରରେ ପ୍ରାୟ ୧୪୦୦୦ ସୁପର-ସ୍ପ୍ରେଡର୍ ଅଛନ୍ତି ବୋଲି ଆକଳନ କରାଯାଉଛି | ଯେଉଁଥିପାଇଁ ଆସନ୍ତା ତିନି ଦିନ ମଧ୍ୟରେ ସେ ସମସ୍ତଙ୍କୁ ସ୍କ୍ରିନିଙ୍ଗ କରିବାକୁ ନିଷ୍ପତ୍ତି ନିଆଯାଇଛି।
ଗୁଜୁରାଟର ଭେଜାଲପୁର ଅଞ୍ଚଳରେ ଥିବା ଜଣେ ଦୋକାନୀ ଶନିବାର ଦିନ କରୋନା ଭାଇରସ୍ ପଜିଟିଭ୍ ଜଣାପଡିବା ପରେ, ଗତ ୧୫ ଦିନ ମଧ୍ୟରେ ତାଙ୍କ ଦୋକାନକୁ ସାମଗ୍ରୀ କିଣିବାକୁ ଯାଇଥିବା ସମସ୍ତ ଗ୍ରାହକଙ୍କୁ ଘରେ କ୍ଵାରାଣ୍ଟିନରେ ରହିବାକୁ କୁହାଯାଇଥିଲା । ସେହିପରି ଢ଼ୋଲକାରେ ଜଣେ ତରଭୁଜ ବିକ୍ରେତା କରୋନା ଭାଇରସ୍ ପଜିଟିଭ୍ ଥିବା ଜଣାପଡିବା ପରେ ତାଙ୍କୁ ସୁପର ସ୍ପ୍ରେଡର୍ ଭାବରେ ଚିହ୍ନଟ କରାଯାଇଥିଲା। ତାଙ୍କ ଦ୍ୱାରା ୧୨ ଜଣ ପଜିଟିଭ୍ ବୋଲି ଜଣାପଡିଥିଲା | ଯାହାକୁ ନଜରରେ ରଖି ମେ ୧୫ ଯାଏଁ ସବୁ ଦୋକାନ ବନ୍ଦ ରଖି ଦୋକାନୀମାନଙ୍କ ପରୀକ୍ଷା କରାଯିବାକୁ ସ୍ଥାନୀୟ ପ୍ରଶାସନ ନିଷ୍ପତ୍ତି ନେଇଛି |