ହସ୍ପିଟାଲ୍‌ରେ ପଶି ପାରୋଲ୍‌ରେ ଆସିଥିବା କଏଦୀଙ୍କୁ ଗୁଳି ଗଲା ଅଜଣା ଗ୍ୟାଙ୍ଗ୍‌

ପାଟ୍‌ନା: ଗୁରୁବାର ଦିନ ପାଟନାର ଏକ ଘରୋଇ ହସ୍ପିଟାଲ ଭିତରେ ଦେଖିବାକୁ ମିଳିଛି ଏକ ଅପ୍ରୀତିକର ଘଟଣା।  ହସ୍ପିଟାଲ ଭିତରେ ପାରୋଲରେ ଥିବା ଜଣେ କଏଦୀଙ୍କୁ ପାଞ୍ଚ ଜଣ ଅଜଣା ଲୋକ ଗୁଳି କରିଥିବା ଅଭିଯୋଗ ହୋଇଛି। ଯାହାକି ଏବେ  ବିହାରର ଆଇନ ଶୃଙ୍ଖଳା ପରିସ୍ଥିତି ଉପରେ ପ୍ରଶ୍ନ ଉଠାଇଛି।

ପୁଲିସର ସୂଚନା ଅନୁଯାୟୀ, ସହରର ରାଜା ବଜାର ଅଞ୍ଚଳର ପାରସ ହସ୍ପିଟାଲରେ ଏହି ଗୁଳିକାଣ୍ଡ ଘଟିଥିଲା। ବକ୍ସର ଜିଲ୍ଲାର ଏକ ହତ୍ୟା ମାମଲାର ଅଭିଯୁକ୍ତ ଚନ୍ଦନ ମିଶ୍ର ନାମକ ପୀଡିତଙ୍କୁ ବେଉର ଜେଲରୁ ମେଡିକାଲ ପାରୋଲରେ ମୁକ୍ତ କରାଯାଇଥିଲା ଏବଂ ତାଙ୍କୁ ଚିକିତ୍ସା ପାଇଁ ହସ୍ପିଟାଲରେ ଭର୍ତ୍ତି କରାଯାଇଥିଲା।

ଘଟଣାର ସିସିଟିଭି ଫୁଟେଜରେ ପାଞ୍ଚ ଜଣ ସଶସ୍ତ୍ର ବ୍ୟକ୍ତି ଦିନ ଦି’ପ୍ରହରେ ହସ୍ପିଟାଲ ପରିସରରେ ପ୍ରବେଶ କରି କଏଦୀଙ୍କ ଉପରେ ଗୁଳି ଚଳାଉଥିବାର ଦେଖାଯାଇଛି। ତାଙ୍କ ଦେହରେ ଅନେକ ଗୁଳି ବାଜିଛି ଏବଂ ସେ ବର୍ତ୍ତମାନ ସେହି ହସ୍ପିଟାଲରେ ଚିକିତ୍ସାଧୀନ ଅଛନ୍ତି।

ପୁଲିସ ଦଳ ଘଟଣାସ୍ଥଳରେ ପହଞ୍ଚି ବକ୍ସର ପୁଲିସ ସହାୟତାରେ ଗୁଳି ଚଳାଇଥିବା ଲୋକଙ୍କୁ ଚିହ୍ନଟ କରିବା ପାଇଁ ଖୋଜାଖୋଜି ଆରମ୍ଭ କରିଛନ୍ତି। ଅଧିକାରୀମାନେ କହିଛନ୍ତି ଯେ ସେମାନେ ହସ୍ପିଟାଲ ସୁରକ୍ଷାରେ ସମ୍ଭାବ୍ୟ ତ୍ରୁଟି ଏବଂ ହସ୍ପିଟାଲ ସୁରକ୍ଷାକର୍ମୀଙ୍କ କୌଣସି ସମ୍ପୃକ୍ତି ଥିଲା କି ନାହିଁ ତାହା ମଧ୍ୟ ଯାଞ୍ଚ କରୁଛନ୍ତି।