ସରିଲା ଜ୍ଞାନବାପି ମସଜିଦ୍ର ଭିଡିଓଗ୍ରାଫି ସର୍ଭେ: ଶିବଲିଙ୍ଗ ମିଳିବାକୁ ନେଇ ବିବାଦ
ଅଞ୍ଚଳକୁ ସିଲ୍ ପାଇଁ ନିର୍ଦ୍ଦେଶ ଦେଲେ ଅଦାଲତ, ସୁପ୍ରିମ୍ କୋର୍ଟରେ ଶୁଣାଣି ଆଜି
ବାରଣାସୀ: ସ୍ଥାନୀୟ ଅଦାଲତଙ୍କ ନିର୍ଦ୍ଦେଶକ୍ରମେ କାଶୀ ବିଶ୍ବନାଥ ମନ୍ଦିର ନିକଟରେ ଥିବା ଜ୍ଞାନବାପି ମସଜିଦ୍ର ଭିଡିଓଗ୍ରାଫି ସର୍ଭେ କାର୍ଯ୍ୟ ଆଜି ଶେଷ ହୋଇଛି। ତୃତୀୟ ଦିନର ସର୍ଭେ ଶେଷ ହେବା ପରେ ଆଇନଜୀବୀ ବିଷ୍ଣୁ ଜୈନ ମସଜିଦ ପରିସରରେ ଥିବା ଏକ କୂଅରୁ ଏକ ଶିବଲିଙ୍ଗ ମିଳିଥିବା ଦାବି କରିଛନ୍ତି। ୧୨ ଫୁଟ ଉଚ୍ଚର ଏବଂ ୮ ଇଞ୍ଚ ଗୋଲେଇର ଶିବଲିଙ୍ଗ ମିଳିଥିବା କୁହାଯାଇଛି। ଭିଡିଓଗ୍ରାଫି ସର୍ଭେ କାର୍ଯ୍ୟ ଶେଷ ହେବା ପରେ ହିନ୍ଦୁ ପକ୍ଷର ଆଇନଜୀବୀ ଶିବଲିଙ୍ଗ ଥିବା ଦାବି କରିବା ପରେ ସେହି ଅଞ୍ଚଳକୁ ସିଲ୍ କରିବା ପାଇଁ ଜିଲ୍ଲା ପ୍ରଶାସନ, ପୁଲିସ ଓ ସିଆରପିଏଫ୍କୁ ସିଭିଲ ଜଜ୍(ସିନିୟର ଡିଭିଜନ) କୋର୍ଟର ବିଚାରପତି ରବି କୁମାର ଦିବାକର ନିର୍ଦ୍ଦେଶ ଦେଇଛନ୍ତି। ସର୍ଭେକୁ ସ୍ଥଗିତ ରଖିବା ପାଇଁ ମୁସଲିମ ପକ୍ଷରୁ ହୋଇଥିବା ଆବେଦନର ଶୁଣାଣି ଆସନ୍ତାକାଲି (ମଙ୍ଗଳବାର) ହେବ। ଅଞ୍ଜୁମାନ ଇନ୍ତେଜାମିଆ ମସଜିଦ କମିଟିର ଆବେଦନର ଶୁଣାଣି ସୁପ୍ରିମ କୋର୍ଟର ବିଚାରପତି ଡିୱାଇ ଚନ୍ଦ୍ରଚୂଡ଼ ଏବଂ ବିଚାରପତି ପିଏସ୍ ନରସିଂହାଙ୍କ ଖଣ୍ଡପୀଠ କରିବେ।
Sambad is now on WhatsApp
Join and get latest news updates delivered to you via WhatsApp
ହିନ୍ଦୁ ପକ୍ଷରୁ ଶିବଲିଙ୍ଗ ମିଳିଥିବା ନେଇ ଯେଉଁ ଦାବି କରାଯାଇଛି ତାହାକୁ ମସଜିଦ୍ ପରିଚାଳନା କମିଟି ଅସ୍ବୀକାର କରିଛି। କମିଟିର ପ୍ରବକ୍ତା କହିଛନ୍ତି ତାହା ହେଉଛି ଏକ ଝରଣାର ଅଂଶ। ଅଞ୍ଚଳକୁ ସିଲ୍ କରିବା ପାଇଁ ଆଦେଶ ଦେବା ପୂର୍ବରୁ ମୁସଲିମ ପକ୍ଷର ଆଇନଜୀବୀଙ୍କ ଯୁକ୍ତିକୁ ସଂପୂର୍ଣ୍ଣ ଭାବେ ଶୁଣାଯାଇନାହିଁ ବୋଲି କୁହାଯାଇଛି। ସର୍ଭେର ତୃତୀୟ ଦିନରେ ଏକ ପ୍ରସ୍ତର ମିଳିଥିଲା। ତାହାକୁ ଆମେ ଶିବଲିଙ୍ଗ ବୋଲି ଦାବି କରୁଛୁ। ଏଠାରେ ମୁସଲମାନମାନେ ୱାଜୁ କରିଥାନ୍ତି। ମୁସଲିମ ପକ୍ଷ ଏହାକୁ ଏକ ଝରଣା ବୋଲି କହୁଛନ୍ତି। କିନ୍ତୁ ସଫା କରାଯିବା ପରେ ଏହା ଶିବଲିଙ୍ଗ ବୋଲି ହିନ୍ଦୁ ପକ୍ଷର ଓକିଲ ଦୀପକ ସିଂହ କହିଛନ୍ତି।