ମୁଁ କେବଳ ଭାରତର ଝିଅ ନୁହେଁ, ସାରା ପୃଥିବୀର ଝିଅ: ଜଳବାୟୁ ସମ୍ମିଳନୀରେ ଭାରତୀୟ ଝିଅଙ୍କ ଭାଷଣ ଶୁଣିଲା ସାରା ବିଶ୍ୱ

ନୂଆଦିଲ୍ଲୀ: ସ୍କଟଲ୍ୟାଣ୍ଡର ଗ୍ଲାସଗୋରେ ଆୟୋଜିତ ଜଳବାୟୁ ସମ୍ମିଳନୀରେ ବିଶ୍ୱର ନେତାମାନେ ଏକତ୍ରିତ ହୋଇଥିଲେ | ତେବେ ଏହି ବୈଠକରେ ଯୋଗ ଦେଇଥିବା ଜଣେ ଭାରତୀୟ ଝିଅ ଏବେ ଚର୍ଚ୍ଚାରେ ଅଛନ୍ତି | ନିଜର ତଥ୍ୟମୂଳକ ଓଜସ୍ୱିନୀ ଭାଷଣରେ ସେ ସାରା ବିଶ୍ୱକୁ ସ୍ତବ୍ଧ କରିଦେଇଛନ୍ତି | ଏହି ଝିଅ ଜଣକ ହେଉଛନ୍ତି ୧୪ ବର୍ଷୀୟା ଭିନିଶା ଉମାଶଙ୍କର | ଭିନିଶା କହିଛନ୍ତି ଯେ ତାଙ୍କ ପିଢ଼ି ବିଶ୍ୱର ନେତାଙ୍କ ମିଥ୍ୟା ପ୍ରତିଶ୍ରୁତିରେ ଅସନ୍ତୁଷ୍ଟ ଅଛନ୍ତି ଏବଂ ରାଗିଛନ୍ତି। 'ଇକୋ ଓସ୍କାର' ନାମରେ ଜଣାଶୁଣା ଆର୍ଥସଟ୍ ପୁରସ୍କାରର ଫାଇନାଲିଷ୍ଟମାନଙ୍କ ମଧ୍ୟରୁ ଭିନିଶା ଅନ୍ୟତମ ଥିଲେ । ଜଳବାୟୁ ସମ୍ମିଳନୀର କ୍ଲିନ୍ ଟେକ୍ନୋଲୋଜି ଏବଂ ଇନୋଭେସନ୍ ପ୍ରସଙ୍ଗ ଉପରେ ଆୟୋଜିତ ବୈଠକରେ ଭାଷଣ ଦେବା ପାଇଁ ବ୍ରିଟେନର ପ୍ରିନ୍ସ ୱିଲିୟମ୍ ଭିନିଶାଙ୍କୁ ନିମନ୍ତ୍ରଣ କରିଥିଲେ।

ତାମିଲନାଡୁର ଭିନିଶା ବିଶ୍ୱ ନେତାଙ୍କ ସାମ୍ନାରେ କହିଛନ୍ତି ଯେ ଚାଲନ୍ତୁ କେବଳ କଥା କହିବା ବନ୍ଦ କରିବା ଏବଂ ପ୍ରକୃତରେ କାର୍ଯ୍ୟ କରିବା। ଆମେ ଧୂଆଁ, ପ୍ରଦୂଷଣ ଏବଂ ଜୀବାଶ୍ମ ଇନ୍ଧନ ଉପରେ ଆଧାରିତ ଅର୍ଥନୀତି ଅପେକ୍ଷା ଆମର ଉଦ୍ଭାବନ, ପ୍ରକଳ୍ପ ଏବଂ ସମାଧାନରେ ଆପଣଙ୍କର ସାହାଯ୍ୟ ମାଗୁଛୁ | ଆମକୁ ପୁରୁଣା ବିତର୍କ ବାବଦରେ ଚିନ୍ତା କରିବା ବନ୍ଦ କରିବାକୁ ପଡିବ କାରଣ ଭବିଷ୍ୟତ ପାଇଁ ଏକ ନୂତନ ଦୃଷ୍ଟିକୋଣ ସୃଷ୍ଟି କରିବା ଆବଶ୍ୟକ ଅଛି | ତେଣୁ ଆମର ଭବିଷ୍ୟତ ପ୍ରସ୍ତୁତ କରିବାକୁ ଆପଣଙ୍କୁ ଅର୍ଥ, ସମୟ ଏବଂ ପରିଶ୍ରମ ଦେବାକୁ ପଡିବ | ଭିନିଶାଙ୍କ ସମ୍ବୋଧନ ସମୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ବୋରିସ୍ ଜନସନ, ଜୋ ବାଇଡେନଙ୍କ ସମେତ ଅନ୍ୟମାନେ ଉପସ୍ଥିତ ଥିଲେ।

photo-Dainik Bhaskar

ଭିନିଶା ତାଙ୍କ ଅଭିଭାଷଣରେ କହିଛନ୍ତି ଯେ ଯଦି ବି ଆପଣ ଆମ ପଦକ୍ଷେପର ନେତୃତ୍ୱ ନ ନିଅନ୍ତି, ତଥାପି ମଧ୍ୟ କରିବୁ। ଯଦି ବି ଆପଣ ବିଳମ୍ବ କରନ୍ତି, ଆମେ ଆଗକୁ ବଢ଼ିବୁ | କିନ୍ତୁ ଦୟାକରି ଆମକୁ ସମର୍ଥନ କରିବାକୁ ଏହି ନିମନ୍ତ୍ରଣ ଗ୍ରହଣ କରନ୍ତୁ, ଆପଣଙ୍କୁ ଅନୁତାପ କରିବାକୁ ପଡିବ ନାହିଁ | ମୁଁ କେବଳ ଭାରତର ଝିଅ ନୁହେଁ, ବରଂ ପୃଥିବୀର ଝିଅ, ଆଉ ଏଥିପାଇଁ ମୁଁ ଗର୍ବିତ ଅନୁଭବ କରୁଛି | ସୂଚନା ଥାଉ କି ଯେ ଭିନିଶା ଉମାଶଙ୍କର ଆର୍ଥସଟ୍ ପୁରସ୍କାର ପାଇଁ ଏକ ସୌର ଚାଳିତ ଆଇରନିଂ କାର୍ଟ ତିଆରି କରିଥିଲେ | ଏହାର ଉଦ୍ଦେଶ୍ୟ ଥିଲା ଯେ ଦୂଷିତ ଅଙ୍ଗାରକୁ ସୌର ଶକ୍ତିରେ ବଦଳାଇବା | ଏଥିପାଇଁ ସେ ଫାଇନାଲରେ ସ୍ଥାନ ପାଇଥିଲେ |