ହୁବ୍‌ଲିରେ ପ୍ରଧାନମନ୍ତ୍ରୀଙ୍କ ସୁରକ୍ଷା ଉଲ୍ଲଂଘନ: ଫୁଲମାଳ ଧରି ପଶି ଆସିଲା ବାଳକ

ବେଙ୍ଗାଲୁରୁ: କର୍ଣ୍ଣାଟକର ହୁବ୍‌ଲିଠାରେ ପ୍ରଧାନମନ୍ତ୍ରୀ ନରେଦ୍ର ମୋଦୀ ଆଜି ୨୯ତମ ନ୍ୟାସନାଲ ୟୁଥ୍‌ ଫେଷ୍ଟିଭାଲ୍‌ର ଉଦ୍‌ଘାଟନ ପାଇଁ ରେଲୱେ ସ୍ପୋର୍ଟସ ଗ୍ରାଉଣ୍ଡକୁ ରୋଡ୍‌ ସୋ’ରେ ଯିବା ସମୟରେ ସୁରକ୍ଷାରେ ବଡ଼ ଧରଣର ଉଲ୍ଲଂଘନ ହୋଇଛି। ମୋଦୀ ଏକ ଏସୟୁଭିରେ ଛିଡ଼ା ହୋଇ ଲୋକଙ୍କୁ ହାତ ହଲାଇ ରୋଡ୍‌ ସୋ’ରେ ଯିବା ସମୟରେ ତାଙ୍କ ନିକଟକୁ ମାଡ଼ି ଆସିଥିଲା ପ୍ରାୟ ଚଉଦ ପନ୍ଦର ବର୍ଷର ବାଳକ। ବାଳକଟି ହାତରେ ଫୁଲମାଳ ଧରି ପ୍ରଧାନମନ୍ତ୍ରୀଙ୍କ ଗାଡ଼ି ନିକଟକୁ ସାମ୍ନାପଟୁ ଖୁବ୍‌ ଜୋରରେ ଦୌଡ଼ି ଆସିଥିଲା। ଏହି ସମୟରେ ପ୍ରଧାନମନ୍ତ୍ରୀଙ୍କ ଏସ୍‌ପିଜି ସଦସ୍ୟ ସଂପୃକ୍ତ ପିଲାଟିକୁ ଧରି ପକାଇ ବାହାରକୁ ନେଇଯାଇଥିଲେ। ତେବେ ଯିବା ସମୟରେ ସୁରକ୍ଷା ଦାୟିତ୍ବରେ ଥିବା ଜଣେ ସଦସ୍ୟ ପିଲାଟିଠାରୁ ଫୁଲମାଳ ଆଣି ପ୍ରଧାନମନ୍ତ୍ରୀଙ୍କୁ ଦେଇଥିଲେ। ପ୍ରଧାନମନ୍ତ୍ରୀ ତାହାକୁ ହାତରେ ଧରିବା ସହିତ ପୁନର୍ବାର ଏସପିଜି ଅଧିକାରୀଙ୍କୁ ଫେରାଇ ଦେଇଥିଲେ। ପ୍ରଧାନମନ୍ତ୍ରୀଙ୍କ ରୋଡ୍‌ ସୋ’‌ ବେଳେ ସୁରକ୍ଷାରେ ଏଭଳି ତ୍ରୁଟି ଲୋକଙ୍କୁ ଚକିତ କରିଛି। ସଂପୃକ୍ତ ବାଳକ ପ୍ରଧାନମନ୍ତ୍ରୀଙ୍କ କଡ଼ା ସୁରକ୍ଷା ବଳୟ ଭେଦ କରି ଗାଡ଼ି ନିକଟରେ ଫୁଲମାଳ ଧରି ପହଞ୍ଚିବା ଘଟଣାକୁ ସହଜରେ ଗ୍ରହଣ କରାଯାଇ ପାରିବ ନାହିଁ। ପ୍ରଧାନମନ୍ତ୍ରୀଙ୍କ ହଜାର ହଜାର ସମର୍ଥକ ସ୍ଳୋଗାନ ଦେଉଥିଲେ ମଧ୍ୟ ‌ସେମାନେ ସବୁ ରାସ୍ତାକଡ଼ରେ ବାରିକେଡ୍‌ ପଛରେ ରହିଥିଲେ।

ଅନ୍ୟପକ୍ଷରେ ପୁଲିସ ପକ୍ଷରୁ ଏହି ସୁରକ୍ଷା ଉଲ୍ଲଂଘନକୁ ଖଣ୍ଡନ କରାଯାଇଛି। ପ୍ରଧାନମନ୍ତ୍ରୀ ଲୋକଙ୍କ ଆଡ଼କୁ ହାତ ହଲାଉଥିଲେ। ଏହି ସମୟରେ ସମ୍ଭବତଃ ପ୍ରଧାନମନ୍ତ୍ରୀ ତାକୁ ଡାକୁଥିବା ଭାବି ପିଲାଟି ଗାଡ଼ି ନିକଟକୁ ପଳାଇ ଆସିଥିଲା ବୋଲି ପୁଲିସ କହିଛି। ଏହା ପୂର୍ବରୁ ଗତବର୍ଷ ଜାନୁଆରି ୫ ତାରିଖରେ ପ୍ରଧାନମନ୍ତ୍ରୀ ପଞ୍ଜାବର ଫିରୋଜପୁରକୁ ଏକ ନିର୍ବାଚନୀ ସଭାରେ ଉଦ୍‌ବୋଧନ ପାଇଁ ଯିବା ସମୟରେ ବାଟରେ ତାଙ୍କର ସୁରକ୍ଷା ଉଲ୍ଲଂଘନ ହୋଇଥିଲା। କୃଷକମାନଙ୍କ ଆନ୍ଦୋଳନ ଯୋଗୁ ପ୍ରଧାନମନ୍ତ୍ରୀଙ୍କ ଗାଡ଼ି ଗୋଟିଏ ଫ୍ଲାଏଓଭର ଉପରେ ପାଖାପାଖି ୨୦ ମିନିଟ ଧରି ଅଟକି ରହିଥିଲା। ପ୍ରଧାନମନ୍ତ୍ରୀଙ୍କ ସୁରକ୍ଷାରେ ତ୍ରୁଟିର ଅନୁଧ୍ୟାନ ପାଇଁ ଏକ କମିଟି ଗଠନ କରାଯାଇଥିଲା। ସୁପ୍ରିମକୋର୍ଟର ପୂର୍ବତନ ବିଚାରପତି ଇନ୍ଦୁ ମା‌ଲ‌ହୋତ୍ରାଙ୍କ ଅଧ୍ୟକ୍ଷତାରେ ଗଠିତ ୫ ଜଣିଆ କମିଟି ପ୍ରଧାନମନ୍ତ୍ରୀଙ୍କ ସୁରକ୍ଷା ବ୍ୟବସ୍ଥାକୁ ସୁଦୃଢ଼ କରିବା ପାଇଁ ପରାମର୍ଶ ଦେଇଥିଲା।

ସମ୍ବନ୍ଧିତ ଖବର