କଲମ୍ବୋ : ଶ୍ରୀଲଙ୍କାରେ ଚାଲିଥିବା ହିଂସା ଜାରି ରହିଛି । ସାରା ଦେଶରେ କର୍ଫ୍ୟୁ ଲଗାଯିବା ସହ ସେନା ମୁତୟନ କରାଯାଇଛି । ଉପଦ୍ରବକାରୀଙ୍କୁ ଦେଖିବାମାତ୍ରେ ଗୁଳି ଚଳାଇବାକୁ ନିର୍ଦ୍ଦେଶ ଦିଆଯାଇଛି । ଯେଉଁମାନେ ହିଂସାକାଣ୍ଡରେ ଲିପ୍ତ ଅଛନ୍ତି ଓ ସର୍ବସାଧାରଣ ସଂପତ୍ତି ଲୁଟ କରୁଛନ୍ତି ସେମାନଙ୍କୁ ଗୁଳି କରିବାକୁ ଶ୍ରୀଲଙ୍କା ପ୍ରତିରକ୍ଷା ମନ୍ତ୍ରାଳୟ ପକ୍ଷରୁ ଜାରି ନିର୍ଦ୍ଦେଶରେ କୁହାଯାଇଛି । ଏହା ସତ୍ତ୍ବେ ଦେଶରେ ବିକ୍ଷୋଭ ଜାରି ରହିଛି । ଅନ୍ୟପକ୍ଷରେ ଶାନ୍ତି ବଜାୟ ରଖିବାକୁ ଓ ହିଂସାକାଣ୍ଡରେ ଲିପ୍ତ ନହେବାକୁ ରାଷ୍ଟ୍ରପତି ଗୋଟାବାୟା ରାଜପକ୍ଷେ ନିବେଦନ କରିଛନ୍ତି । ଏକ ଟୁଇଟ କରି ସେ ଏହି ନିବେଦନ କରିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ସୂଚନାଯୋଗ୍ୟ ଯେ, ନିଜ ସ୍ବାଧୀନତା ପରର ସବୁଠାରୁ ଖରାପ ଆର୍ଥିକ ସଂକଟ ଦେଇ ଗତିକରୁଥିବା ଶ୍ରୀଲଙ୍କାରେ ଜନ ଆନ୍ଦୋଳନ ତୀବ୍ର ହେବାରେ ଲାଗିଛି । ହିଂସାକାଣ୍ଡ ଯୋଗୁଁ ମୃତ୍ୟୁସଂଖ୍ୟା ୮ରେ ପହଞ୍ଚିଥିବାବେଳେ ଆହତଙ୍କ ସଂଖ୍ୟା ୨୦୦ ଟପିଯାଇଛି । ଗତ ସୋମବାରଦିନ ଶାସକ ଦଳ ସମର୍ଥିତ ଶ୍ରୀଲଙ୍କା ପିପୁଲ୍ସ ଫ୍ରଣ୍ଟର ଜଣେ ସାଂସଦ ଅମରକିର୍ତ୍ତୀ ଅତୁକୋରାଲା ଦୁଇଜଣଙ୍କୁ ଗୁଳିକରି ହତ୍ୟା କରିବା ପରେ ଆତ୍ମହତ୍ୟା କରିଥିଲେ । ବିକ୍ଷୋଭକାରୀଙ୍କ ଆକ୍ରମଣରେ ଆଉ ଜଣେ ସାଂସଦ ଆହତ ହୋଇଛନ୍ତି । ଏହାକୁ ନେଇ ସାରା ଦେଶରେ ତୀବ୍ର ପ୍ରତିକ୍ରିୟା ସୃଷ୍ଟି ହେବା ପରେ ଲୋକମାନେ ପୂର୍ବତନ ପ୍ରଧାନମନ୍ତ୍ରୀ ମହିନ୍ଦ୍ରା ରାଜପକ୍ଷେଙ୍କ ଘରେ ନିଆଁ ଲଗାଇଦେଇଥିଲେ ।