ପୁଟିନଙ୍କ ଭାରତ ଗସ୍ତ ସମୟରେ ଉଠିପାରେ ଏସ୫୦୦ କ୍ରୟ ପ୍ରସଙ୍ଗ

ନୂଆଦିଲ୍ଲୀ: ଡିସେମ୍ବର ୬ ରେ ଋଷିଆର ରାଷ୍ଟ୍ରପତି ଭ୍ଲାଦିମିର ପୁଟିନ ଭାରତ ଗସ୍ତରେ ଆସିବେ। ବୈଦେଶିକ ମନ୍ତ୍ରାଳୟର ମୁଖପାତ୍ର ଅରିନ୍ଦମ ବାଗଚି କହିଛନ୍ତି ଯେ ପୁଟିନ ଏକବିଂଶତମ ଭାରତ-ଋଷ ବାର୍ଷିକ ସମ୍ମିଳନୀରେ ଅଂଶଗ୍ରହଣ କରିବେ। ଏହି ସମ୍ମିଳନୀରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଧ୍ୟ ଅଂଶଗ୍ରହଣ କରିବେ। ସ୍ୱତନ୍ତ୍ର କୂଟନୈତିକ ସହଭାଗୀତା ଏବଂ ସମ୍ପର୍କର ଉନ୍ନତି ବାବଦରେ ମୋଦୀ-ପୁଟିନଙ୍କ ମଧ୍ୟରେ ଆଲୋଚନା ହେବ ବୋଲି କୁହାଯାଇଛି। ଏହା ବ୍ୟତୀତ, ଜି-୨୦ ରୁ ବ୍ରିକ୍ସ ଏବଂ ସାଂଘାଇ ସହଯୋଗ ସଂଗଠନ ପର୍ଯ୍ୟନ୍ତ ଆନ୍ତର୍ଜାତୀୟ ଏଜେଣ୍ଡା ଅଧୀନରେ କରାଯାଇଥିବା କାର୍ଯ୍ୟର ସମୀକ୍ଷା କରିବେ |

ତେବେ  ଯେଉଁ କାରଣରୁ ପୁଟିନଙ୍କ ଏହି ଗସ୍ତ ଉପରେ ନଜର ରଖାଯାଇଛି, ତାହା ହେଉଛି ଭାରତକୁ ଏସ୫୦୦ ଓ ଏସ୫୫୦ ବିକ୍ରି ପ୍ରସଙ୍ଗ । ଏ ନେଇ ପୁଟିନ ଓ ମୋଦୀଙ୍କ ମଧ୍ୟରେ ଆଲୋଚନା ହୋଇପାରେ ।

ବୈଦେଶିକ ବ୍ୟାପାର ମନ୍ତ୍ରାଳୟର ସୂଚନା ଅନୁଯାୟୀ, ଡିସେମ୍ବର ୬ ରେ ପ୍ରଥମ ଥର ପାଇଁ ଦିଲ୍ଲୀରେ ଭାରତ ଏବଂ ଋଷର ବୈଦେଶିକ ଓ ପ୍ରତିରକ୍ଷା ମନ୍ତ୍ରୀଙ୍କ ମଧ୍ୟରେ ଆଲୋଚନା ହେବ। ଏହି ବୈଠକରେ ଭାରତର ବୈଦେଶିକ ବ୍ୟାପାର ମନ୍ତ୍ରୀ ଏସ ଜୟଶଙ୍କର, ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ଏବଂ ଋଷର ବୈଦେଶିକ ମନ୍ତ୍ରୀ ସରଗେଇ ଲାଭ୍ରୋଭ ଏବଂ ପ୍ରତିରକ୍ଷା ମନ୍ତ୍ରୀ ସରଗେଇ ଶୋଏଗୁ ଯୋଗଦେବେ।

ଋଷ ଦୂତାବାସର ମୁଖପାତ୍ର ଆଶା କରିଛନ୍ତି ଯେ ଏସିଆ-ପ୍ରଶାନ୍ତ ମହାସାଗରୀୟ ଅଞ୍ଚଳ ଏବଂ ଆଫଗାନିସ୍ତାନ-ସିରିଆର ବିକାଶ ସମେତ ଦୁଇ ଦେଶର ମନ୍ତ୍ରୀମାନେ ପ୍ରମୁଖ ଆଞ୍ଚଳିକ ତଥା ଆନ୍ତର୍ଜାତୀୟ ପ୍ରସଙ୍ଗରେ ଆଲୋଚନା କରିବେ।